Cont sij eenen jeghelijcken dat comen sijn voer ons scepenen onderghescreven Jan soen wilnere Jans van Son als man ende momber Mechtelden ǁ sijnen huijsvrouwen ende Wijllem soen Wijllens vanden Kerckhoff als man ende momber Aleijden sijnre huijsvrouwen ter eender, ende Katheǁlijn dochter wilnere Cornelis die Metzer met haren momber van hoer daer toe gecoren ende hoer vanden heer gegeven alzoe als recht ǁ is ter andere sijden, kijnderen alte samen wilnere Cornelis die Metzer voers., ende hebben bij rade van honnen vrijenden ende maghen ǁ een erffdeijlinge ende erffscheijdinge ghemaeckt ende gedaen van sommighen erffelijcken gueden hijer nae bescreven overmijdts ǁ metter erffdeijlingen ende erffscheijdingen wille, soe sal Wijllem zoen Wijllems vanden Kerckhoff voers. hebben houwen ende tot ǁ sijnder erffelijckheit besitten tot behoeff sijns selfs ende sijnder kijnderen die Wijllem voers. vercrighen mach bij Aleijden sijn witǁtighe huijsvrou dochter wilnere Cornelis die Metzer voers. Een stuck landts anderhalff loepensaet off daer omtreent begripende geǁlegen inder prochijen van Goerl ter plaetsen geheijten den breem acker tussen erffenis joncker Jans van Brecht deen sijde ende tussen ǁ erffenis Ariaen Stalparts dander sijde, hodende metten eenen eijnde aen erffenis Mijchiel Soffaerts, ende metten anderen eijnde aen die ǁ gemeijn straet Item hijer toe sal Willem voers. noch heffen ende boren een halff mud roggen jaerlijcken ende erffelijcken pacht op Wouǁter Soffaerts tot Goerl als zij zeden, op welck ghedeelt Jan van Son ende Kathelijn met hoeren momber voers. volcoemelijcken vertegen ǁ hebben tot behoeff Wijllems vanden Kerckhoff voers. met welcken ghedeelt Wijllem voers. jaerlijcken gelden ende betalen sal eenen penǁninck erffschijns aen die ghesworen van Tilborch te ghelden jaerlijcken van recht hijer uut te vergelden ende te betalen, ende hebben ǁ gelooft Jan van Son, Wijllem ende Kathelijn met hoeren momber voers die een den anderen dese erffdeijlinge ende erffscheijdinge ǁ altijt vast ende stendich te houden ende in honnen naem te doen houden sonder eenich wederseggen. ende dat een jegelijck sijnen comǁmer hon in deser deijlinghen toeghevoecht sijnde, alsoe gelden ende betalen sal datter die ander hier tegen ghedeijlt ende hun ǁ gueden daer af sullen blijven ongehouwen nu ende ten eewijghen dagen met voerwaerden toe gedaen of naemaels tot eenijgen ǁ toecomenden tijden verborghen commer quame op ijemonts ghedeelt ende hijer in deser deijlingen nijet benoempt en waer dien commer alsoe ǁ comende hebben sij deijlsluijden voers. malcanderen geloeft kijnts kijntsgelijck te helpen gelden ende te dragen Orconden hebben hijer over geweest ǁ scepenen in Tilborch ende in Goerl Lauwereijns Henrick Zwijsen soen ende Aert Merceliss. van Vessem die den zegel hoers gemeijns scependoms deǁsen beijene open aen hebben doen hangen in haer ons heeren duij(sent) vijffhondert seesentwentich op sinte Thomas dach appostel ǁ

In dorso: 

nota ǁ Wijllem Willems (***)