's-Hertogenbosch

Huijbert sone wilner Gerairts Janss. van Hove woonende tot Tilborch heeft wittelick ende erffelick vercoft ǁ ende vercoopt mits desen Peteren Janss. Mutsarts tot behoeff der Abdije ende Convente van Tongerloo, eenen jaerlicken ende ǁ erffelicken chijns van twelff ende eenen halven carolus gulden, tot twintich stuvers goets gelts elcken gulden gerekent te ǁ betalen alle jaer erffelijck inden hoochtijde van onser liever vrouwen lichtmisse, ende voorden iersten termijn van be ǁ talinge inden hoochtijde van onser liever vrouwen lichtmisse naestcomende, ende in sHertogenbossche vrij van allen ǁ beden ons heeren des hertochs, exactien, subventien, thiende, twintichste, honderste ende alle andere meerdere ende mindere ǁ penningen, commeren, scattingen ende lasten, ordinarisse extraordinarisse, innegestelt oft bij avontueren naemaels ǁ innegestelt te wordene egeene lasten uutgescheijden te leveren ende te vergelden, van ende uut huijs, scuere scaepskoije ǁ henne gronden, hoff, boomgaert, ackerlant ende weijlant dijen aen eenen plack aenliggende groot te samen ontrent ǁ tweentwintich lopensaten, gelegen onder de parochie ende heerlicheijt van Tilborch, ter plaetsen genoempt aen den Berck ǁ dijck, tussen erve Jans Jans Martenss. aen deen sijde, ende tussen erve Jacop Jan Wouters aen dander sijde, streckende met ǁ den eenen eijnde aen de Gemeijnen straet ende met den anderen eijnde aen de gemeijnte van Tilborch (soo hij verclaerde) ǁ vander selver Abdije ende conventie metten erffrecht te hebben ende te besitten, ende heeft die voorn. vercooper den selven ǁ chijns den voors. Peteren Janss. Mutsaerts tot behoeff vander voors. Abdije ende conventie opgedragen met helmelinge ǁ vertijdenisse inne manieren indijen gewoonlijck sijnde, Gelovende de voorn. vercooper als schuldenaer principael onder ǁ verbant van sijnen persoen ende allen sijnen goedens present ende toecoemende dat hij der voorn. Abdije ende conventie vanden ǁ selven chijns schuldige ende gerechte sal doen warantscappe, ende dat hij allen anderen commer calaingie ende aentael ǁ inde voors. onderpanden wesende oft comende den voors. conventie aff sal doen geheelijcken, uutgenomen eenen pacht van ǁ een mud roggen aen de scaemele weeskijnderen binnen deser stadt jaerlicx van te voorens ende van rechtswegen uut den voors. ǁ onderpande te vergelden staende (soo hij seede) ende dat hij de voors. onderpanden voerde betalinge des voors. chijns der voors. ǁ Abdije ende conventie jaerlicx als voors. staet daer vuijt te vergelden altijt goet genoch ende welduegende sal maecken ende houden ǁ met conditie inne desen toegedaen dat de voorn. vercoopere desen voors. chijns ten allen tijden sal mogen afflossen ende quijten, ǁ ten eenenmael met de somme van tweehondert carolus gulden, tot twintich stuvers inne permissie gelde bij openbaeren ǁ placcate vanden Rade van Brabant gepermitteert sijnde elcken gulden gerekent, ende metten jaerchijns der lossingen ende ǁ allen achterstellen alsdan ten achteren ende ombetaelt staende, behoudelijck dat de voorn. vercoopere desen loss een halff jaer ǁ te voorens wittelijck sal vercondigen ende opseggen, Getuijgen wairen hier over scepenen inne sHertogenbossche Rombout ǁ Rombouts ende Jan Pelgrom, Gegeven den sesten dach der maent van Mert int jaer ons heeren dusent sesshondert ende ǁ tweentwintich.

A. van Hees [***] Littera Abbatie et Conventios de Tongerloe dup.r but.h

Dorsale aantekening:

1622 huis enz aan den berckdijck ǁ Huijbert Geraerts ǁ Van Hoeff  in Tilborch ǁ XII ½ gulden [***]  in plaets ǁ Van XII gulden int [***] ǁ en beleijt als blijckende