's-Hertogenbosch

Jan sone wijlen Peeter Foelen woonende tot Tilborch aen de Velthoeve heeft wittelick ǁ ende erffelick vercoft d'heer Laureijns van Berckel raet deser stadt, eenen jaerlicken ende erffelicken chijns van ǁ twintich carolus gulden tot twintich stuijvers goets gancbaers gelts elcken gulden gereeckent, te betaelen alle ǁ jaer erffelick opten iersten Augusti, ende voorden iersten termijn van betaelinge op den iersten Augusti anno XVIc ǁ tweeenvijftich, ende binnen dese stadt vrij van alle beeden, exactien, subventien, tiende, twintichste, honderste ǁ meerdere ende minderen penningen, commeren, schattingen ende lasten, ingestelt ende naermaels ingestelt te wordden ǁ egeene lasten uutgescheijden te leveren ende te vergelden van ende uut huijs, hoff ende voorder aengelach groot omtrent ǁ een loopensaet gelegen binnen Tilborch voors. ter plaetse genoemt Velthoeve, neffen erve Gerart ǁ Peeter Foelen des voors. vercoopers broeder hier tegens affgedeijlt aen d'een sijde, ende neffen erve van ǁ Freijsken Jan Denis wedue van Adriaen Foelen aen d'ander zijde, streckende voor vande gemeijn straet tot ǁ op erve Gerart Peeters voorn., soo hij verclaerde, vande selven heere van Berckel cooper mitten erffrecht ǁ te hebben ende te besitten, ende heeft die voorn. vercooper den voors. chijns den voorn. coopere opgedraegen mit helme ǁ linge vertijdenis inne maniren in dien gewoonlick zijnde, Geloovende die voors. vercooper als sculdenaer ǁ principael op verbant van sijnen persoon ende alle zijne goederen present ende toecomende dat hij den voorn. coopere ǁ vande voors. chijns sculdige ende gerechte sal doen warantschap, ende dat hij allen anderen commer, calangie ende ǁ aentael int voors. onderpandt wesende oft comende den voorn. coopere aff zal doen geheelicken, ende dat ǁ hij oijck het voorn. onderpandt voor de betaelinge des voors. chijns den voorn. cooper jaerlicx daer uut ǁ als voor te vergelden altijt goet genoch ende welduegende sal maecken ende houden, mit conditien inne desen ǁ toegedaen dat die voors. vercooper den voors. chijns tot allen tijden sal mogen lossen ende quijten teffens ende ten ǁ eenemael met de somme van vierhondert carolus gulden tot twintich stuijvers goet gancbaers gelts elcken gulden ǁ gereeckent in specie van rijcxdalders tot vijftich stuijvers t'stuck, ende mitten loopenden jaerchijns ǁ ende achterstellen ten tijde der afflossinge daervan t'achter ende ombetaelt staende behoudelick dat men den voors. ǁ los sculdich ende verbonden sal wesen een halff jaer te voorens wittelicken te vercondigen ende op te seggen, ǁ Getuijgen waeren hier over scepenen in sHertogenbossche Henrick Tielmans ende Gijsbert Kuijsten ǁ Gegeven den derthienden dach der maent Julij int jaer ons heeren duijsent sesshondert eenenvijftich.

Littera Domini Emptoris

Dorsale aantekening:

Tilborch ǁ Constitutie van XX gulden ǁ Jan Peeter Foelen