's-Hertogenbosch

Adriaen soene Jans Peter Stevens woonende tot Tilborch heeft wittelick ende erffelick vercost ende ǁ vercoopt midts desen Diercken van Kessel tot behoeff van den grooten Gasthuijse binnen deser stadt, Eenen jaerlicken ende erffelicken chijns van achtien Carolus ǁ gulden, tot twintich stuijvers goets gancbaers gelts elcken gulden gereeckent, te betaelen alle jaer erffelick den achtentwintichste dach den maent martij, ende voorden iersten ǁ termijn van betaelinge den achtentwintichsten dach der maent martij anno sestienhondert vijffendetwintich ende binnen deser stadt vrij van alle beden ons heeren des hertochs, ǁ exactien, subventien, thiende, twintichste, honderste, mindere ende meerdere penningen, commeren, schattingen ende lasten, ordinarisse extraordinarisse, gewoonlicke, onge ǁ woonlicke, ingestelt, ende alnoch naermaels ingestelt te worddene, egeene lasten uutgescheijden, te leveren ende te vergelden, van ende uut twee huijsen, schuere, met den ǁ groese ende ackerlande dijen aenliggende, twelff ende een halff lopensaet lants ofte daeromtrent groot zijnde, gelegen binnen der voors. parochie van Tilborch ter ǁ plaetse genoempt aen de Horevoert, aen de Velthoeven aldaer, neffen erve Jan Arien Peters noortwaerts aen d'een sijde, ende neffen erve Jan Goijaerts suijtwaerts aen ǁ d'ander sijde, Streckende met den eenen eijnde aen erve Bastiaen Goijaerts, ende mit den anderen eijnde aen de gemeijn straete, Ende alnoch van ende uut een stuck ǁ ackerlants, twee lopensaeten lants ofte daeromtrent begrijpende, gelegen binnen der parochie ende ter plaetsche voors., tussen erve Laureijns Gerarts noortwaerts ǁ aen d'een sijde, ende tusschen erve Peeters Janssen suijtwaerts aen d'ander sijde, ende mit den eenen eijnde, streckende mitten anderen eijnde aen erffenisse Jans Janssen ǁ zoo hij verclaerde, ende heeft die voors. vercooper den voorn. chijns den voors. Diercken van Kessel tot behoeff van den voorn. Gasthuijse opgedraegen mit ǁ helmelinge verthijdenisse inne manieren inne dijen gewoonlick sijnde, Geloevende die voors. vercooper als schuldenaer principael op verbant van sijnen ǁ persoon ende allen sijne goederen present ende toecoemende dat hij den voorn. Gasthuijse van den voors. chijns schuldighe ende gerechte sall doen warantschappe, ǁ ende dat hij allen anderen commer, calaengie ende aentael in de voors. onderpanden wesende oft commende den selven Gasthuijse aff sall doen geheelicken, ǁ ende dat hij de voors. onderpanden voor de betaelinge des voors. chijns den voorn. Gasthuijse jaerlicx daeruut, soo voors. staet, te vergelden, altijt ǁ goet genoech ende welduegende sall maecken ende houden, met conditien inne desen toegedaen dat die voors. vercooperen den voorn. chijns sall moegen lossen ǁ ende quijten tot allen tijden teffens ende ten eenemael, met de somme van drijehondert Carolus gulden tot twintich stuijvers goets gelts van ǁ wegen den raide van Brabant bij oepenbaeren placcaete gepermitteert sijnde elcken gulden gereeckent, ende mit den loopenden jaerchijns ende achterstellen ǁ die ten tijde der afflossinge van den voorn. chijns t'achter ende onbetaelt staen sullen, Behoudelijck dat men den voors. losch schuldich ende verbonden sall ǁ wesen een halff jaer te voorens wittelicken te vercondigen ende op te seggen, Getuijghen waeren hier over schepenen inne S'hertogenbossche ǁ Albert van Dungen ende Guiliaem d'Absloins, Gegeven den achtendetwintichsten dach der maent martij int jaer ons Heeren duijsent ǁ sesshondert vierendetwintich. ǁ Dankerse.

Littera  Hospitalis Duplicetur [*]

Dorsale aantekening:

Adriaen Jan Peter Stevens ǁ tot Tilborch gelevert sijne ǁ onderpanden aldaer den acht ǁ ende twintichste martij jaerlicx ǁ XVIII gulden.