's-Hertogenbosch

Adriaen sone wijlen Jans Peeters Stevens wonende tot Thilborch heeft wit ǁ telick ende erffelick vercoft ende vercoopt mitz desen Meesteren Arnden van Asperen tot behoeff van Peeteren van Asperen ǁ zijnen wittigen sone, eenen jaerlicken ende erffelicken chijns van zess Carolus gulden den gulden tot twintich stuivers goets gelts ǁ gerekent te betalen alle jaer erffelick int hoochtijt van ons lieff vrouwe geboirten, Ende voorden ijersten ǁ termijne van betaelingen op ons lieff vrouwe geboirten dach, Anno xvic zevenentwintich, Ende inne Shertogen ǁ bossche vrij van alle beden ons heeren des hertochs exactien, subventien, tiensten, twintichsten, hondersten, ende ǁ allen andere meerder ende mindere penningen, commeren schattingen ende lasten, ordinarisse extraordina ǁ risse innegestelt ofte bij avontueren namaels ingestelt te worden, egeene lasten uutgescheijden te leveren ende ǁ te vergelden, van ende uit twee diversche huijsen ofte woningen, eene schuere henne gronden hoven boogarden ǁ ackerlant ende graeslant dijen aen eenen plack aenliggende, groot tesamen ontrent dertien lopensaten gelegen onder ǁ de parochie ende heerlicheijt van Thilborch, ter plaetze genoempt op te Hoirevoirt, tussen erffve ǁ Jans sone Adriaens Peetersz. alias Lappen aende noorden zijde, ende tussen erve Antonis sone Niclaes ǁ Antonisz. aende zuijdensijde, streckende met deen eijnde aende gemeijne straete, ende met ǁ dander eijnde aen erffenisse Sebastiaens Goijaerts Smitten zoo hij verclaerde van den zelven Peeteren ǁ van Asperen metten erffrecht te hebben ende te besitten, Ende heeft de voorn. vercoopere den voors. chijns ǁ den voorn. Meesteren Arnden tot behoeff des voors. Peeters van Asperen zijnen soon opgedragen met helmelinghe ǁ vertijdenis in manieren inne dijen gewoonlicken zijnde, Gelovende de voornoemde vercooper als schulde ǁ naer principael op verbant van zijnen persoon ende goederen present ende toecomende, dat hij den voorn. ǁ Peeteren van Asperen van den voors. chijns schuldige ende gerechte zall doen warantschap Ende dat hij ǁ allen anderen commer calangien ende aentael in de voors. onderpanden wesende ofte comende den voorn. ǁ Peeteren aff zall doen geheelicken, uutgenomen eenen chijns van achtien gulden aen Nijcolaes Jansz. ǁ Donckers tegenwoordelick schepen dezer stadt jaerlix van te voirens ende van rechts wegen uut den voors. onderpanden ǁ ende meer andere zijns vercoopers goederen te vergelden staende zoo hij seeden, Ende dat hij oock de voorn. ǁ onderpanden voor de betaelinge des voors. chijns den voorn. Peeteren jaerlicx daeruut als voore te vergelden altijt goet genoch ǁ en weldogende zall maecken ende houden, met conditie dat de voorn. vercoopere dezen voors. chijns van zess gulden ten ǁ allen tijden zall mogen lossen ende quijten ten eenen male mette somme van hondert Carolus gulden elcken ǁ gulden tot twintich stuivers permissie gelts bij placatie van den Raede van Brabant gepermitteert zijnde ǁ gerekent, ende dat in egeenen mindere penningen ofte seven en den halve Brabantse schillingen, Ende metten jaerchijns ende ǁ lossingen ende achterstellen alsdan daer aff ten achteren ende onbetaelt staende, behoudelick dat de voorn. vercoopere ǁ dezen loss een halff jaer te vorens wittelick zall vercondigen ende opseggen. Getuijgen waeren hier over schepenen ǁ in Shertogenbosche Nijcolaes Jansz. Donckers ende Henrick van Zoerendonck, Gegeven den vijften dach der maent van ǁ september int jaer ons heeren dusent zesshondert ende zessentwintich.

A. van Hees secretaris Littera  Petri

Dorsale aantekening:

Dese rente van sess ǁ gulden jaerlijcx is bij ǁ Jan Adrian Peterss. ǁ metten achterstel van ǁ dijn gelost ende gequeten ǁ in handen Meester Arnden van ǁ Asperen Op ten xven september ǁ XVI^c dertich