's-Hertogenbosch

Jan zone wilner Adriaens Veldekens woonende tot Tilborch heeft wittelijck ende erffelijck vercocht ende ǁ vercoopt midts desen Peteren Janssen Mutsaerts, Eenen jaerlijcken ende erffelijcken chijns van zess ende eenen halven Carolus gulden tot twintich ǁ stuvers elcken gulden goets gancbaers gelts gerekent, Te betaelen alle jaer erffelijck in den hoochtyde van Onser Liever Vrouwen ǁ Lichmisse, Ende voir den ijersten termijn van betaelingen in den hoochtyde van Onser Liever Vrouwen Lichmisse anno XVIc ende achthien, ǁ Ende binnen Shertogenbosche vrij van allen beden ons heeren des hertochs, soo thiende, twintichste, honderste, als allen andere ǁ meerdere, oft mindere penningen, commeren, scattingen, ende lasten, ordinarisse, extraordinarisse, innegestelt, oft bij avon ǁ tueren naermaels innegestelt te worddene, egeene lasten uutgescheijden te leveren ende te vergelden, van ende uut een stuck ǁ weylandts groot ontrent vijff lopensaeten gelegen in de voirs. parochie van Tilborch ter plaetsen genoemt aent Laer, tussen ǁ erve Jacob Jans Lamberts d'een sijde, ende tussen erve Jans sone wijlen Peters Adriaens Veldekens d'ander zijde ǁ streckende vande Heirbane tot aen erve Snel Joris weeduwe ende haere kijnderen, soo hij verclaerden, Vanden selven coopere ǁ metten erffrecht te hebben ende te besitten, ende heeft die voirn. vercooper den voirs. chijns den voirn. cooper opgedra ǁ gen met helmelingen vertijdenisse in manieren in dijen gewoonlijck zijnde, Gelovende die voirn. vercooper als ǁ schuldenaer principael op verbant van sijnen persoon ende goederen present ende toecommende, dat hij den voirn. cooper ǁ vande voirs. chijns schuldige ende gerechte sal doen warantscappe, ende dat hij allen anderen commer, calainge, ǁ ende aentael in t'voirs. onderpandt wesende oft comende den voirn. coopere aff sal doen geheelijck, Ende dat hij ǁ tvoirs. onderpandt voir de betalingen des voirs. cijns den voirn. coopere jaerlix daer uut soo voirs. staet te ǁ vergelden altijt goet genoch ende welduegende sal maecken ende houden, Getuijgen waeren hier over scepenen inne ǁ Shertogenbosche Handrick Franssen van Gestel ende Jan Bardoul, Gegeven den lesten dach der maendt van ǁ januario int jaer ons Heeren duijsent zesshondert ende seventhien

A. van Hees subscripsit

Dorsale aantekening:

Jan Ariaen Veldekens ǁ tot Tilborch VI 1/2  gulden