's-Hertogenbosch

Joost Gijsmaers van Hedickhuijsen heeft wittelick ende erffelick vercoft Peeter van Haeren ende meester Geerlingh ǁ Ruijs als momboiren over de kijnderen meester Jans van Aerlebeeck tot behoeff vande selve kinderen, Eenen jaerlicken ende erffelicken chijns van dertich Carolus gulden tot twintich ǁ stuijvers goets gancbaers gelts elcken gulden gereeckent, Te betaelen alle jaer erffelick opten sestienden martij, ende voor den iersten termijn van betaelinge op den sestienden ǁ martij anno XVIc drijenvijfftich, Ende binnen dese stadt vrij van alle beeden, exactien, subventien thiende, twintichste, honderste, mindere ende meerdere penningen ǁ commeren ende lasten ingestelt ende naermaels ingestelt te wordden egeene lasten uutgescheijden te leveren, van ende uut de helfte van huijs, hoff, brouwhuijs ende ǁ de landerijen daeraen gelegen, gestaen ende gelegen in de heerlicheijt van Tilborch, neffen erve Cornelis Reijnders westwarts aen d'een sijde, ende neffen ǁ erve Cornelis Anthonissen oistwarts aen d'ander zijde, Streckende vande gemeijn Kerckstraet tot op erve Cornelis Reijnders voors. ende d'erffgenamen van ǁ Michiel Adam Weijtens, soo hij verclaerde, vande selve ommundige metten erffrecht te hebben ende te besitten, Ende heeft die voors. vercooper den voors. chijns ǁ de voorn. momboiren tot behoeff vande selve ommundige opgedraegen met helmelinge vertijdenis inne manieren in dien gewoonlick zijnde, Geloevende die voors. ǁ vercooper als sculdenaer principael op verbant van sijnen persoon ende alle zijne goederen present ende toecomende dat hij den voorn. ommundigen vanden voors. ǁ chijns sculdige ende gerecht sal doen warantschap, ende dat hij allen anderen commer, calangie ende aentael int voors. onderpandt wesende oft comende den ǁ voorn. ommundigen aff zal doen geheelicken, uutgenomen de helfte van eenen pacht van ses vaten roggen reductie aenden altaer tot Tilborch, Ende alnoch ǁ oijck de helfte van eenen chijns van dertich Carolus gulden aen heer Remigius van Grevenbroeck, ierst jaerlicx ende van rechtswegen uut het voorn. ǁ onderpandt te vergelden staenden soo hij verclaerde, Ende dat hij oijck het voors. onderpandt voor de betaelinge des voors. chijns den voorn. ommundigen ǁ jaerlicx daer uut, als voor, te vergelden altijt goet genoch ende welduegende sal maecken ende houden, met conditien inne desen toegedaen dat die voorn. ǁ vercooper den voorn. chijns van dertich Carolus gulden altijt zal mogen lossen ende quijten t'effens ende ten eenemael met de somme van vijff hondert ǁ Carolus gulden tot twintich stuijvers goets Hollants permissie gelts elcken gulden gereeckent, Ende metten loopende jaerchijns ende achterstellen ten tijde ǁ der afflossinge daervan t'achter ende ombetaelt staende, Behoudelick dat men den voorn. los sculdich ende verbonden sal wesen een halff jaer te voorens ǁ wittelicken te vercondigen ende op te seggen, Getuijgen waeren hierover scepenen in Shertogenbossche Jacob van Casteren ende Henrick ǁ Tielmans, Gegeven den sestienden dach der maent meert, Int jaer ons Heeren duijsent sesshonderd tweenvijftich

L.B. van Kessel littera liberorum magister Johannis van Arlebeerle?

Dorsale aantekening:

Ick onderscreven beken van seigneur van ǁ Ophuijsen ontfangen te hebben vijff ǁ hondert gulden van den los ǁ der rente ende negentich gulden ǁ van drije jaeren interesten den XVIe ǁ meert 1658

P. van Haren als momboir

Ick segge negentich ǁ gulden over het voors. ǁ verloop van drie jaeren ǁ renten bedragende 90 gulden ǁ P. van Haren

Tilborch ǁ constitutie van XXX gulden