's-Hertogenbosch

Joost Gijsmaers van Hedickhuijsen woonende tot Tilborch heeft mits desen wittelick ende erffelick vercoft Catharina ǁ Tijpoets tot behoeff van Barbara Tijpoets, Eenen jaerlicken ende erffelicken chijns van drijendertich Carolus gulden tot twintich stuijvers goets gancbaers gelts elcken gulden ǁ gereeckent, Te betaelen alle jaer erffelick opten vierden dach der maent junij, ende voor den iersten termijn van betaelinge opten vierden junij anno XVIc  vierenvijftich, Ende ǁ binnen dese stadt vrij van alle beeden, exactien, subventien, commeren, scattingen ende lasten ingestelt ende naermaels ingestelt te wordden egeene lasten uutgescheijden te ǁ leveren, van ende uut een stuck weijlants, genoemt het Kerckven, groot omtrent tussen de vier oft vijff loopensaten gelegen in de parochie van Tilborch, tussen erve ǁ der kinderen Anthonis Aelenarts aen d'een sijde oistwarts, ende tussen erve der wedue ende kinderen Cornelis Henricx van Heijst aen d'ander sijde, Streckende vande ǁ Hooge Heijde tot den waterloop genoemt de Jock, Ende alnoch van ende uut een stuck weijlants groot omtrent vierdalff loopensaten lants, gelegen inde voors. ǁ parochie van Tilborch ter plaetse genoemt in de Conins Hoelen, tussen erve der voorkinderen des voors. Joost vercoopers aen d'een sijde, ende tussen erve Jan Beris van Oerle ǁ met Catharina wedue Henrick Jansz. van Pelt aen d'ander sijde, Streckende van ander erve deses vercoopers tot den waterloop genoemt de Jock voors., Soo hij verclaerden ǁ vanden selver Barbara mitten erffrecht te hebben ende te besitten, Ende heeft die voorn. vercooper den voors. chijns de voorn. Catharina tot behoeff vande voors. Barbara ǁ haere sustere opgedraegen mit helmelinge vertijdenis inne manieren indien gewoonlick zijnde, Geloevende die voors. vercooper als sculdenaer principael op verbant ǁ van sijnen persoon ende allen sijne goederen present ende toecomende, dat hij de voorn. Barbara vande voors. chijns sculdige ende gerechte sal doen warantschap, ende dat hij ǁ allen anderen commer, calangie ende aentael in de voors. onderpanden wesende oft comende de voorn. Barbara aff zal doen geheelicken, Ende dat hij oijck de voors. onderpanden ǁ voor de betaelinge des voors. chijns de voorn. Barbara jaerlicx daer uut, als voor, te vergelden altijt goet genoch ende welduegende sal maecken ende houden, met conditien ǁ inne desen toegedaen dat die voors. vercooper den voors. chijns tot allen tijden sal moegen lossen ende quijten teffens ende ten eenemael met de somme van ǁ sesshondert Carolus gulden tot twintich stuijvers goets gelts elcken gulden gereeckent, in specien van rijcxdalders tot twee gulden thien stuijvers t'stuck ǁ Ende metten loopenden jaerchijns ende achterstellen ten tijde der afflossinge ende van t'achter ende ombetaelt staenden, Behoudelick dat men den voors. los ǁ schuldich ende verbonden sal wesen een halff jaer te voorens wittelicken te vercondigen ende op te seggen, Getuijgen waeren hier over scepenen in ǁ Shertogenbossche Laureijns van SGravesande ende Arnout van Thienen, Gegeven den vierden dach der maent junij int jaer ons ǁ Heeren duijsent sesshondert drijenvijftich

"H. Ruijsch "

Littera Barbarae

Dorsale aantekening:

Ick bekenne de binnen voors. somme ǁ ontfange te hebben van sesse hondert ǁ gulden met 2 jaren verlopen intrest ǁ en dat uut hande van Wijllem ǁ Ophuijsen waer mede bekenne ick ǁ te samen voldaen te zijn 1659 den ǁ 3 junij 1659 bij mij ǁ Catharina Tijpoets

Tilborch ǁ Constitutie van XXXIII gulden