's-Hertogenbosch

Jan sone wijlen Cornelis Jan Sijmonssz. woonende tot Tilborch, heeft wittelick ende ǁ erffelick vercoft ende vercoopt mits desen Willemen Donckers tot behoeff van Nicolaes Janssen Donckers, Eenen jaerlicken ende erffelicken ǁ chijns van twelff ende eenen halven Carolus gulden, tot twintich stuijvers den gulden goets gelts gereeckent, Te betaelen alle jaer erffelick den ǁ twintichsten junij, ende voor den iersten termijn van betaelinge den twintichsten junij anno sestienhondert eenentwintich, Ende inne S'harto ǁ genbossche vrij van alle beden ons heeren des hertochs, exactien, subventien, soo thiende, twintichste, honderste, als alle andere meerdere ende mindere ǁ penningen, commeren, scattingen ende lasten, ordinarisse, extraordinarisse, ingestelt ofte bij avontueren naermaels ingestelt te wordene, ǁ egeene lasten uutgesceijden te leveren ende te vergelden, van ende uut huijs, erve, hoff, boomgaert ende ackerlant malcanderen aenliggende, ǁ groot omtrent vijff lopensaten, gelegen onder de prochie ende heerlijcheijt van Tilborch, ter plaetssen geheeten aende Velthoven, tussen ǁ erve Jans sone Cornelis Jans Tonissen aen d'een sijde, ende tussen erve Peeters Janssen aen d'ander sijde, streckende van erve des ǁ heere van Tilborch tot aen de gemeijne straete, ende alnoch van ende uut een stucxken ackerlants, groot omtrent een loopensaet ǁ gelegen onder de prochie ende ter plaetsse voorn., tussen erve Peeters Gerartsz. Henssen aen d'een sijde, ende tussen erve des ǁ voors. heere van Tilborch aen d'ander sijde ende metten eenen eijnde, streckende met den anderen eijnde aen de gemeijne straete, ǁ soo hij seede, van den selven Niclaessen Donckers mitten erffrecht te hebben ende te besitten, ende heeft die voors. vercoopere den ǁ voorn. chijns den voors. Willemen Donckers tot behoeff van den voorn. Niclaessen Donckers opgedraegen mit helmelinge ǁ verthijdenisse inne manieren inne dijen gewoonlijck sijnde, Geloevende de voorn. vercooper als schuldenaer principael ǁ op verbant van sijnen persoon ende allen sijne goederen present ende toecoemende dat hij den voorn. Nicolaessen Donckers ǁ van den voors. chijns sculdige ende gerechte sall doen warantschappe, ende dat hij allen anderen commer, calaengie ende aentael in de ǁ voors. onderpanden wesende oft commende den selven Nicolaessen Donckers aff sall doen geheelicken, ende dat hij de voors. ǁ onderpanden voor de betaelinge des voors. chijns den voorn. Nicolaessen Donckers jaerlicx daeruut, soo voors. staet, ǁ te vergelden, altijt goet genoech ende welduegende sall maecken ende houden met conditie toegedaen dat de voorn. vercoopere desen ǁ voors. chijns ten allen tijden sall mogen lossen ende quijten ten eenenmaele met de somme van tweehondert Carolus gulden tot ǁ twintich stuijvers permissie gelts elcken gulden gereeckent, ende mit den loopenden jaerchijns ende achterstellen ten tijde der ǁ afflossinghe van den voorn. chijns t'achter ende ombetaelt staende, Behoudelick dat deselve vercoopere desen loss een halff ǁ jaer te voorens wittelick sal vercondigen ende opseggen, Getuigen waeren hier over scepenen inne S'hertogenbossche ǁ Goijaert Loeff van den Sloot ende Willem d'Absloons, Gegeven den twintichsthen dach der maent junij ǁ int jaer ons Heeren duijsent sesshondert ende twintich

A. van Hees Littera Nicolai Donckers dupliciteur van Hees

Dorsale aantekening:

De Joengen Jan Nellen tot ǁ Thelbuercht gelt jaerlycken ǁ 12 gulden 10 stuijvers