's-Hertogenbosch

Adriaen sone wylen Anthonis Gerartss. de Beir woonende tot Tilborch ter ǁ plaetse genoempt Velthoven, heeft mits desen wittelick ende erffelick vercoft Balthasar Janss. Donckers ǁ ende Roelant sone wylen Jacops Servaess. van Wiert, tot behoeff van Jasparen Janss. Donckarts als wittich ǁ weduwer van Mechtelt syne huysvrouwe dochtere wylen Robbrechts de Voss, als tsynder tochte, ende tot behoeff ǁ van Robbert ende Jeronimus gebroederen ommundige soonen des voors. Jaspars verwect by de voorn. Mechtelt ǁ syn huysvrouwe ten erffrecht, Eenen jaerlycken ende erffelycken chyns van achthien Carolus gulden ende vyftien ǁ stuvers, elcken Carolus gulden tot twintich stuvers te rekenen, oft de werde daer voor in anderen goeden ganc ǁ baren gelde, Te betalen alle jaer erffelick int hoochtyt van Onser Liever Vrouwen geborte, Ende voorden ǁ iersten termyn van betalinge int hoochtyt van Onser Liever Vrouwen geborte anno XVIC ende sestien, Ende binnen ǁ der stadt Shertogenbossche vry van allen hertochs beden, vyfte, thiende, twintichste, honderste ende allen anderen ǁ meerderen ende minderen penningen, commeren ende lasten, gewoonlyck, ongewoonlyck, ingestelt ende naemaels ǁ innegestelt te worddene, egeen lasten vuytgescheyden te leveren ende te vergelden, van ende uut huys, erve, hoff acker ǁ lant ende groeslant, malcanderen aenliggende, thien lopensaten lants oft daerontrent te samen begrypende met ǁ allen hennen rechten ende toebehoorten, gelegen inder parochie van Tilborch ter plaetse genoempt aen de Velthoven ǁ tussen erffenisse Cornelissens sone wylen Jans Damen aen deen syde, ende tussen erffenisse Symons Gerarts ǁ Symonss. aen dander syde, Streckende met deen eynde aen erffe Jans de Roy schouteth tot Tilborch ende met ǁ dander eynde aen erffenisse Dingemans Willemss., ende alnoch van ende uut een stuck weylants drie lopen ǁ saten min een vierdelvat lants oft daerontrent begrypende, gelegen inder parochie ende plaetse voors. tusschen ǁ erve des voorn. Dingemans Willemss. aen deen syde, ende tussen den gemeynen kercpat aen dander syde, ende deen ǁ eynde, ende met dander eynde aen erffenisse Peters sone Adriaen Peters Lappen (soo hy verclaerde) vanden selven ǁ Jasparen ter tochten ende den voors. Robberden ende Jeronimus ommundigen ten erffrecht te hebben, ende te besitten, ǁ Ende heeft die voors. Adriaen vercooper den voors. chyns den selven Balthasaer ende Roelanden tot behoeff des ǁ voors. Jaspaers als tot synder tochte ende den voors. ommundigen ten erffrecht opgedragen, met helmelinge ver ǁ tydenisse inne manieren indyen gewoonlyck synde, Gelovende de voorgenoempde vercooper als schuldenaer ǁ principael onder verbant van synen persoen ende allen synen goedens present ende toecomende dat hy den voor ǁ screven Jasparen, Robberden ende Jeronimus van den voorscreven chyns schuldige ende gerechte sall doen warant ǁ schappen, Ende dat hy allen anderen commer calaingie ende aentael inde voors. onderpanden wesende ǁ oft comende den voorgenoempde Jasparen, Robberden, ende Jeronimus aff sall doen geheelycken, uutgenomen ǁ eenen chyns van derthien stuvers drie oert aen meester Jan van den Hovel secretaris tot Oesterwyck, off den ǁ genen daertoe gerecht synde jaerlicx van te voorens ende van rechts wegen, uuten iersten onderpande te vergelden staende, ǁ Ende dat hy de voors. onderpanden voor de betalinge des voorn. chyns den voors. Jaspar, Robberden ende Jeronimus jaerlicx ǁ als voors. staet daer vuyt te vergelden, altyt goet genoch ende welduegende sall maecken ende houden, met conditien toegedaen ǁ dat de voors. vercoop den voorn. chyns van achthien Carolus gulden ende vijftien stuivers ten allen tyden sal mogen lossen ende quyten teffens ten eenen ǁ male met de somme van driehondert Carolus gulden, elcken gulden tot twintich stuvers te rekenen, oft de werde daervoor ǁ in anderen goeden gelde ten tyde der lossinge in Shertogenbossche gancbaer synde, Ende mitten jaerchyns ende allen achter ǁ stellen ten tyde der lossinge verscenen ende ombetaelt staende, behoudelyck dat de voorn. vercoop den loss een halff jaer te vooren ǁ wettelyck sall vercondigen ende opseggen, Getuygen waren hier over scepenen in Shertogenbossche Rogier van Broeckhoven ǁ ende Arnt Monicx, Gegeven den vierden dach der maent van september int jaer ons Heeren dusent sesshondert ende vyftien.

P. v. Hees 

Litera Jasparis cum suis duplisteur subscriptunt ambo hic

Dorsale aantekening:

Adrijaen Antonis Ghersen ǁ de Beir wont tot Thielborch ǁ aen die Welhoven

Des penninghen die syn ǁ ghecomen van Mechtels ǁ cleederen 18 gulden 15 stuivers