's-Hertogenbosch

Corstiaen Bastiaens Smitten woonende inde[n] [pa]rochie ende heerlickheijt ǁ van Tilborch ter plaetse genoemt aenden Hesel, he[***]elick vercost Joosten ǁ Martens van Wegen, Eene jaerlicken ende erffelicken chijns van elff Carolus ǁ gulden ende vijff stuijvers tot twintich stuijvers goets gancbaers gelts elcken gulden ǁ gereeckent, Te betaelen alle jaer erffelick opten thienden dach der maent ǁ van Septembri, ende voorden iersten termijn van betaelinge opten thienden ǁ Septembris anno XVIc tweentsestich, Ende binnen dese stadt vrij van alle ǁ beeden, exactien, subventien, commeren, schattingen ende lasten ingestelt ende ǁ noch naermaels ingestelt te wordden egeene lasten uutgescheijden te leveren ende ǁ te vergelden, van ende uut eenen ackerlants twee ende een halff loopensaten lants oft ǁ daeromtrent begrijpende, gemeijnlick genoemt Jan Cornelis acker, gelegen inde voors. ǁ parochie ende heerlickheijt van Tilborch ter plaetse genoemt aende Hoevel, tussen erve ǁ der wedue Meester Hermans de Roij aen d'een sijde, ende tussen de Gemeijnstraet ǁ aen d'ander sijde ende mit d'een sijde, westwarts streckende mitten anderen eijnde ǁ oistwarts op den gemeijnen waterlaet, Ende alnoch van ende uut eenen hoijbeempt ǁ gemeijnlick genoemt Sprinck, ses loopensaten lants oft daeromtrent begrijpende ǁ gelegen inde voors. parochie ende heerlickheijt van Tilborch ter plaetse genoemt ǁ int Gilse Broeck, neffen erve Jenneken wedue Jans Adriaens Gerarts ǁ noortwarts aen d'een sijde, ende neffen erve Jans Martens zuijtwarts aen d'ander ǁ zijde, streckende mit beijde d'eijnden op den gemeijnen Stroom aldaer, soo hij verclaerden ǁ vanden selven coopere mitten erffrecht te hebben ende te besitten, ende heeft die voorn. ǁ vercooper den voors. chijns den voorn. cooper opgedragen mit helmelinge vertijdenis ǁ inne manieren indien gewoonlick zijnde, Geloevende die voors. vercooper ǁ als sculdenaer principael op verbant van sijnen persoon ende alle zijne goederen present ǁ ende toecomende dat hij den voorn. cooper vanden voors. chijns sculdige ende gerechte ǁ sal doen warantschappende dat hij allen anderen commer, calangie ende aentael inde ǁ voors. onderpanden wesende oft comende den voorn. cooper aff sal doen geheelicken, ǁ Ende dat hij oijck de voors. onderpanden voor de betaelinge des voors. chijns den ǁ voors. cooper eerlich daer uut, als voor, te vergelden altijt goet genoch ende welduegende ǁ sal maecken ende houden, met conditien, Inne desen toegedaen dat die voors. ǁ vercooper den voorn. chijns sal moegen lossen ende quijten tot allen tijden teffens ende ǁ ten eene mael met de somme van tweehondert vijff en twintich Carolus ǁ gulden tot twintich stuijvers goets permissie gelts elcken gulden gereeckent, ǁ in geen mindere specien als ducatons, Ede mitten loopenden jaerchijns ende ǁ achterstellen ten tijde der afflossinge daer van t'achter ende ombetaelt staende, ǁ Behoudelick dat men de voors. los sculdich ende verbonden sal wesen een halff jaer ǁ te voorens wittelick te vercondigen ende op te seggen, Getuijgen waeren hier over ǁ scepenen in sHertogenbossche Peeter Lus ende Johan Daviets van Oerle, ǁ Gegeven den thienden dach der maent Septembris int jaer ons Heeren ǁ duijsent sesshondert een en tsestich.

Littera Emptoris

Linkermarge:

debet sigillum mits de ǁ gecommiteerde ǁ totte distributie ǁ vant' cheijns ǁ segel tijde ǁ der extentie ǁ ende van waren ǁ onversien.

Dorsale aantekening:

Tilborch ǁ Constitutie van ǁ XI gulden V stuijvers