Tilburg

Wy Mathys Henrick Beerten soen, Jacop Peter Aelwyns Jan die Bont Gerits soen, Jan Beris Eelens soen Jan die Vet scepenen, Peter van Borden Ghysbrecht soen ǁ Jacob Huyben soen, Laureys Eelen Mutssaerts soen, Claes Huyb Melis soen ende Peter Jan Laureys geswoeren, Jan van den Wouwer Jans soen Ghijsbrecht van den Meer, Ja [***] ǁ kerckmesteren Wouter Willems soen van den Scueren ende Cornelis Danels soen Heyligeestmesteren Ende voirts allen die gemeyn naebueren ende ingesetenen des dorps van Tilborch doen  ǁ condt een iegelyken, die deese onse brieven sellen sien ofte hoeren leesen dat wij met goeden rijpen voirraede ende delyberatie daer toe met openbaeren sondags kerck ǁ ghebode vergadert wesende, om des wille wy in deesen tegenwordighen oirloge van Gelre daer wij God betert tegenwordelick in syn Een grote somme van ǁ penningen in handen der gedeputeerden van den stadt ende meyerijen van Shertogenbosche opbrengen ende betaelen moeten, welcke voirs. penningen wy onder malcanderen beedsgewysen ǁ nijet en connen ghevijnen noch betaelen Ende om die selve penningen te crygen ende te fijneren hebben wij wittelick ende erffelyck vercoft Mechtelen weduwe wijlen Jan ǁ Alarts, dochter wijlen Jans van den Zijdewyn portersse der stad voirs. eenen jaerlijke ende erffelijke lossrente van twelff Rynsgulden tweyntich stuvers voir elken ǁ voirs. gereekent in munte gelijck heeden des inder stadt van den Bosche ter borfen gaet ende nuu leeste gevaluueert is Te vergelden allen jaeren erffelyken op Onser Lieve ǁ Wrouwen Dach Annunciations in den mert waer aff den iersten betaeldach weesen sal op Onser Wrouwen Dach Annunciations coemmende sal Ende inder stadt van den Bosche ǁ voirs. vrij ende loss opten wissel te leeveren oft in haeren handen euren? oft hoeren erven oren ende naecomelingen handen oft woenstede te leeveren op onse cost last ende aventure ǁ van allen lasten beeden scaden ende settinge van die dorps weegen voirs. hoedanich die weesen mochten, welcke lossrente voirs. wij bekennen datse Mechtelt ǁ voirs.  waer ende wittelijcken gecoft heeft teghen ons met haeren geteeden penningen Ende welck penningen wij bekennen dat wij van Mechtelen voirs. ontfangen hebben ǁ in munte ende prijse hier nae bescrevenen Ende die voerne bekeert hebben in gemeyn profijt van onsen dorp voirs. Ende welck lossrente voirs. wij allen gesamener hant ǁ in den naem van ons selven ende van des gemeyn dorps van Tilborch voirs. weegen ende elck van ons voir all gheloft hebben als principael sculderen in goeder trouwen ǁ te gelden ende te betaelen Mechtelen voirs. haeren naecomelingen nae haer oft hoeren zeekeren bode brenghen van deesen brieve oft die copie autentique in manieren voirs. ǁ Ende hier voir hebben wy verbonden ende verbijnden ons onse oren erven ende naecomelingen ende elcken voir all, allen onsen gueden ende voirts allen onse gueden van onser ǁ oren ende naecomelinge hoe ende waer die geleegen syn die wij nuu hebben ende naemaels hebben ende vercrygen moghen Ende wort sake dat wy weeren in enighen ǁ gebreke der betaelingen van den lossrente voirs. in enigen toecoemende tijden Ende die voirs. Mechtelt haer oren erven ende naecomelingen nae haer oft hoer zeeckere ǁ bode brengere van deesen brieven oft van den copien als voirs. is, dat aen die scepenen van Tilborch then tijde weesende oft enige dit selver oft aen haer woenstadt ǁ [besorcht?] hadden, willen wy ende consentern dat zij als dan een maent geleeden nae den termyn gevallen, Ende nae die maentge in manieren voirs. gedaen sal weesen ǁ Dat moegen verteren op ons ende ons dorp van Tilborch voirs. elcks dags dat wij in gebreeck van betaelingen weren vier stuvers dags, welck vier stuvers van ǁ there wij haer gelooft hebben ende geloeven te betaelen sonder die rente nyet te vermijnderen Ende hebben voorts verteegen ende vertyen voer ons onse oren ende naercommelingen ǁ van allen vrijheyden previlegien porteryen Sinte Petrus manscappe jaermerckten weeckmerthen respeijtbrieven quynkernellen ende voits der exceptien dat men ǁ seet dat gemeyn vertijenisse nyet en doet, ende voirts allen desensien ende bescaddinge hoe damals die weesen mochten geestelyken oft verlijken die ons in ǁ deesen souden moghen helpen ende dit voirs. Mechtelen letten oft deren in eniger manyeren tegen deese litteren oft tegen enigen van den voirwaerden ende [***] ǁ die in deesen litteren ghescreven staen Ende aen Mechtelen voirs. haren oren erven ende naecomelingen nae haer allen deesen punten ende voirwaerden in deesen litteren bescreven ǁ te voldoen Soe bidden wy allen heeren ende rechteren ampluijden ende gerechtsboden geestelijken ende werlijken dat in dien wij in gebreck van deesens in toecoemende tijden ǁ bevonden mochten worden, ende wij ende onse naecomelinge nae ons inde meyery voirscr. nijet en betaelden, nae dien den termyn van betalinge een maent [***] ǁ gevallen sal syn, ende in den manyeren gemaent sellen hebben, dat sij ons daer nae binnen eender maent tijts sullen commeren ende arresteren onse lijven ende guede [***] ǁ onse naecomelingen lijven ende gueden gereet ende ongereet, ende elcken van ons als principael hoeftsculder, tot wat plaetsen ende steeden, het sy te water oft te lant ǁ sij bevonde sellen worden tot ter tijt toe wij haer die principael rente tsommen met allen cost van recht daer op gedaen vermacht sellen hebben Be ǁ houdelyken dat wij ende ons naecomelingen deese voirscr. lossrente altyt sellen mogen lossen ende affquijten tsamen metter sommen van tweehondert Rynsgulden ǁ tweyntich stuvers stuyck gerekent oft die gerechte werde daer voir in anderen paeyment Ende dat in penningen ende in munte als hier nae volgen Te wetene ǁ met gouwen leeuwen van gewichte voir vierenviertich stuvers, met gouden Ungersche duycaten van gewichte voir negenendertich stuvers, met ducaten van ǁ Italien van gewichte voir sevenendertich ende eenenhalven stuvers, met gouwen Andriess gulden van gewichte voir negenentweyntich stuvers, met gouwen ǁ overlans Rynsgulden niet gevalueert voir tweyntich ende acht stuvers, met gouwen Franckryckse cronen metter sommen voir ses ende dertich ende halven stuver, met ǁ gouden oude Franse cronen van gewichte voir vijff en dertich ende eenen halven stuver, met gouden David Utrechse gulden voir vier en twentich stuvers tsamen [***] ǁ metter jaerrenten ende afterstelle daeraff ofter dan enigen onbetaelt stonde ende altijt op Onser Wrouwen voirs. behoudelijck oock dat wy die lossrente ǁ een jaer sullen sculdich syn op te seggen te voiren eer wij die rente voirs. sellen mogen lossen aen Mechtelen voirs. oft hoer naercomelinge nae haer [***] ǁ oft aen haer woensteede Ende oft naemaels gebuerde dat God verhuede moet dat deese tegenwordigen  letteren in enigen toecomenden tyden gestoolen ges [***] ǁ oft verbrant werden soe geloven wij die voirs. Mechtelen ofte haeren naecomelingen nae haer nae dien wij dat van haeren weegen versocht sullen we [***] ǁ bynnen eenen maent daer nae, wederom een ander gelijke littere te bezeelen ende te verleenen nae den copen oft transscrijfte van deesen op haeren cost ende  ǁ allet sonder droch ende argelist, voirts hebben wy gebeeden Jannen van den Wouwer onsen schout dat hij wilde deese litteren met ons bezeelen ende [***] ǁ consent van weegen joncker Robbrecht van Malsen heer tot Tilborch voorscr. hier in wilde draghen Ende oock Jan voirs. inden naem van weegen joncker ǁ Robbrechts voirs. myns lieven neefs heb deese voirwaerden in deesen letteren begreepen ende gescreven geconformeert geapprobeert ende ratifficeert conformere ǁ approbere ende ratificeren ende mijnen properen zeegel metten zeegel onser scepenen voirs. hier aen heb doen hanghen des toirconden hebben wij scepenen ǁ geswoeren kerckmeesteren heijligeestmesterren ende gemeyn gebueren des dorps van Tilborch voirs. den zeegel ons ghemeyns scependoms van Tilborch bij onsen ǁ alre gerechte weetenheyt, aen deesen tegenwordigen letteren doen hanghen, int jaere ons Heeren duijsent vijff hondert ende elve opten sondagh als men ǁ inde kercken singt judica nae scrijven den cameren vanden Bosche., te ‘s-Hertogenbosch, van een erfelijke rente van 12 rijnsgulden.