's-Hertogenbosch

Joncker Henrick van Mheer, als wittich man ende momboer van jouffrouwe Anna van ǁ Berckel sijne huijsvrouwe, heeft wittelick ende erffelick vercocht Johan Janssen Zeberts coopman ǁ alhier eenen jaerlicken ende erffelicken chijns van dertien carolus gulden tien stuvers, elcken gulden ǁ tot twintich stuvers inne goeden gancbaren gelde gereeckent Te betaelen alle jaer erffelick op ǁ alder heijligen dach, Ende voorden iersten termijn van betaelinge op alder heijligen dach, anno ǁ sestien hondert ende negenendertich, ende binnen 's Hertogenbossche van allen beden exactien ǁ subventien, tienste, twintichste, hondertste meerdere ende mindere penningen commeren schattingen ende ǁ lasten gewoonelijck ongewoonelijck ingestelt ende naermaels in te stellen egeen lasten ǁ vuijtgescheijden vrij te leveren, van ende vuijt een stuck ackerlants genoempt het [***]lant ǁ groot omtrent veertien loopensaten, gelegen inde vrijheijt van Sint Oeden Roode inden hertganck ǁ van Neijnssel, naesten erffve joncker Caerl van Eijck aen beijde sijden, streckende van ǁ erffve Jans vanden Broek tot aende Houtsche strate [***]  (soo hij verclaerden) ǁ vanden selven cooper metten erff(p)acht te hebben ende te besitten ende heeft den voorgen. ǁ vercooper den voers. chijns, den voorn. cooper opgedragen met helmelinge verthijdenisse inne ǁ manieren indijen gewoonelijck sijnde, Gelovende de voers. vercooper als schuldenaer ǁ principael op verbant van sijnen persoon ende allen sijnen goederen present ende toecomende dat hij ǁ den voorn. coopere vanden voers. chijns schuldige ende gerechte sal doen warantscappe ende dat ǁ hij allen anderen commer calangie ende aentael int voers. onderpant wesende oft comende ǁ den voorn. cooper aff sal doen geheelijck, vuijtgenomen eenen erffelijcke chijns van twelff gulden ǁ tien stuiver, aent convent vanden Wijntmolenberch deser stadt, eenen erffelicken chijns van seven ǁ carolus gulden aen t'capittel alhier (ende alnoch eenen erffelijcken chijns van ses gulden, aen ǁ Jenneken de Graeff, ierst jaerlicx van rechts wegen daer vuijt te vergelden staende, Ende dat ǁ hij 't voers. onderpant voor de betaelinge des voers. chijns, den voorn. cooper jaerlix als [voers]chreven) staet ǁ [daer vuijt] te vergelden altijt goet genoch ende wel doegende sal maken ende houden, Getuijgen waeren ǁ [hierover] scepenen in s'Hertogenbossche Jooris van Bernagie ende Johan vanden Noort ǁ [gegeven] den tweeden dach der maent Novembre int jaer ons heeren duijsent sesshondert ǁ ende acht en dertich

Dorsale aantekening:

1638-2 november ǁ Jonckheer Henrick van Mheer man van juffrouw Anna van Berckel ǁ verkoopt Johan Janss eene jaarlijksche en erfelijke ǁ chijns op een huis en stuk akkerland genaamd ǁ het Nieuwland gelegen te vrijheid van S’Oedenrode ǁ in de hertganck naast jonckheer Caerl van ǁ Eijck, getuige schepenen van 's Herto ǁ genbosch Joris van Bedungen (?)

Johan van den Noort