's-Hertogenbosch

Daniel soone Willem Janssoen van Heijst, heeft mits desen wittelick ende erffelick ǁ vercocht  jonffroijwe Anna vandeBuridam widuwe wijlen meester Nicolaes de Witte gewesenen secretaris ǁ tot  Tilborch ende Goorle, soo tot haeren behoeff als tot haerder tochte, ende tot behoeff van haeren ǁ kijnderen, verweckt bijden voorn. meester Nicolaes, haeren man als tot haeren erffrecht, eenen  jaerlicken  ende ǁ erffelicken chijns van elff  ende eenen halven carolus gulden tot twintich stuvers 't stuck, te betaele ǁ alle jaer erffelick opten lesten dach maij, ende voorden eersten termijn van betaelinge opten lesten ǁ maij, anno sestien hondert sessendertich ende binnen  S Hertogenbossche van allen beden, exactien, subventien, ǁ tienste, twintichste, honderste ende alle andere meerdere ende mindere penningen commeren schattingen ǁ ende lasten gewoonelick, ongewoonelick geen uuytgescheijden vrij te leveren, van ende uut huijs, hoff, ǁ ende boomgart groot omtrent een loopensaet, gelegen tot Tilborch, aende  Hasselt aldaer, tussen erffve ǁ Gerardt  Claes Ariens van Oss aen deen sijde, ende tusschen erffne Willem Jan Daniels, aen dander sijde ǁ streckende van den  gemeijnen waterlaet tot opte gemeijn straet, Item alnoch uut een stuck toillants ǁ groot omtrent een loopensaet, gelegen tot Tilborch voers., inde gastvelden aldaer, tusschen erffve Gerart ǁ Claes Ariens van Oss voers. aen deen zijde ende tusschen de gemeijn  hoeck straeth aen dander sijde, streckende ǁ van erffve Willem Jan Daniels tot opten voers. waterlaet, ende alnoch van ende uut omtrent ǁ twee ende een halff loopensaten soo weijlant als teullant, gelegen tot Tilborch voers. ter plaetse ǁ aende Stockhasselt, tusschen  erffve Wouter Theunis aen deen sijde ende tusschen erffve Jan ǁ van Hemert met  meer andere aen dander sijde streckende  van erffve Willem Jan Daniels [***] ǁ tot opte gemeijn straet (soo hij verclaerde) vander selver jonffrouwe Anna als tot  haerder tochte ende bij haeren ǁ voers. kijnderen als tot hennen erffrecht te hebben ende te besitten, ende heeft die voorn. ǁ vercoopere, den voers. chijns, der voor. jonffrouwe Anna  ten behoeffne ende ter natuere als voor ǁ opgedragen met helmelinge vertijdenisse inne manieren innedijen gewoonelijck sijnde, Geloovende ǁ de  voers. vercoopere als schuldenaer principael op verbant van sijnen ogsten ende allen sijnen goeden present ǁ ende toecomende, dat hij der voorn. coopersse ende haeren kijnderen vanden voers. chijns schuldige ende gerechte ǁ sal doen warantscappe, ende hij allen anderen commer calangie ende aentael inden voers. onderpanden ǁ wesend oft comend der voorn. coopersse ende haeren kijnderen aff sal doen  geheelijck, uutgenomen  dertich ǁ stuvers aender kerck tot Tilborch ende alnoch twee gulden twelff ende eenen halven stuiver aen heijligen geest oock ǁ tot Tilborch erst jaerlix  van rechtswegen uuten voers. onderpanden te vergelden staende, ende dat hij ǁ de voorn. onderpanden voor de  betaelinge des voers. chijns, den voern. coopersse ende haeren kijnderen jaerlix ǁ als  voers. staet daeruuijt te vergelden altijt goetgenoch ende weldoegende sal maken ende houden, met ǁ conditien dat men desen chijns altijt sal mogen lossen endequijten teffen ten eenenmael metten ǁ somme van tweehondert carolus gulden tot twintich stuivers tstuck in goeden gancbaren gelde, ende ǁ metten jaerchijns ende achterstellen alsdan daer van tachter staen, behoudelick dat men den los een ǁ halff jaer te vooren sal vercundigen ende opseggen. Getuijgen waeren hier over scepenen inne ǁ s hertogenbossche Jooris van Bernagie ende Antonij van Outhheusde. Gegeven den  twelffsten ǁ [***] int het jaer ons heeren duijsent sesshondert ende vijffendertich

Hr Dreijssen

Dorsale aantekening:

Tilborch ǁ constitutie van XI gulden X stuivers