's-Hertogenbosch

Daniel soone wijlen Willem van Heijst woonende inde parochie ende heerlickheijt ǁ van Tilborch als wittich man ende momboir van Anneken sijne huijsvrouwe dochtere wijlen Jan Nicolaes ǁ Sijmons, heeft wittelijck, ende erffelijck vercocht Peeter Janssen Wolfswinckel eenen jaerlijcken ǁ ende erffelijcken chijns van sestien, ende eenen halven carolus gulden, tot twintich stuijvers goet ganckbaerts ǁ gelts elcken gulden gereeckent, te betaelen alle jaer erstelijck opten lesten dach der maent van decem ǁ bris ende voorden eersten termijn van betaelinge opten lesten decembris anno sestienhondert ǁ achtenvijftich, ende binnen deser stadt vrij van alle beden, exactien, subventien, tiende, twin ǁ tichste, hondertste, mindere, ende meerdere penningen, commeren, scattingen, ende lasten ingestelt ǁ ende alnoch naermaels ingestelt te worden, egeene lasten uutgescheijden, te leveren, ende te vergelden ǁ van uut twee huijsingen, ende erffenissen vier loopensaeten lants, oft daerontrent begrijpende ǁ gelegen inde voors. parochie van Tilborch ter plaetse genoempt aent Hasselt tusschen erve ǁ Daniels Adriaenssen van Buerden aen d een sijde ende tusschen de gemeijne Hoeckstraet ǁ aen d ander sijde, streckende van erve der Taeffele vanden Heijligen geest aldaer totte gemeijn ǁ straet, ende alnoch van ende uut een stuck weijlants vier, ende een halft loopensaet lants ǁ oft daer ontrent begrijpende gelegen inde voorschreven parochie, ende heerlickheijt van ǁ Tilborch ter plaetse genoempt aen Stockhasselt tusschen erve Peeter Jan Goijaert aldaer ǁ [gelegen tusschen] selve erve der weduwe Jans van Hemert aen d ander sijde, streckende vande ǁ [***] Huijbert Meussen tot aende gemeijn straet, soo hij verclaerden inde selve ǁ [***] erffrecht te hebben, ende te besitten, ende heeft inder voornoempde vercoope ǁ [***] voornoempden coopere opgedraegen met helmelinge vertijdenisse ende manieren ǁ in dijen gewoonelijck sijnde, Gelovende die voors. vercoopere als schuldenaer principael op verbant ǁ van sijnen persoon, ende alle sijne goederen present ende toecomende, dat hij den voorn. coopere vande ǁ [***] schuldige, ende gerechte sal doen warant schatte, ende dat hij allen anderen commer calangie ǁ ende aentael inde voors. onderpanden wesende oft comende den voorn. coopere aff sal doen geheel ǁ uitgenomen eenen erffelijcke chijns van eenen gulden thien stuijvers ende Taeffele vande Heijligengeest ǁ tot Tilborch, eenen erffelijcke chijns van eenen gulden thien stuijvers aenden kercke aldaer, Ende alnoch ǁ eenen erffelijcke chijns van sestien gulden aende weduwe Guilliams Donckers uuten eerste onderpande ǁ jaerlijcks van te voorens, ende van rechts wegen te vergelden staende soo hij seghde, ende dat hij oock de ǁ voorn. onderpanden voorde betalinge des voors. chijns den voornoemden coopere jaerlijcks daer uut als ǁ voor te vergelden altijt goet genoch, ende weldochende sal maecken ende houden, met conditien ǁ inne desen toegedaen, dat die voors. ver cooper den voors. chijns sal mogen lossen, ende quijten tot allen ǁ tijden teffens ende teenemael mette somme van drijehondert carolus gulden tot twintich stuijvers ǁ goet permissie gelts elcken gulden gereeckent, ende metten loopenden jaerchijns, ende achterstellen ǁ alsdan daer van t achteren, ende onbetaelt staende, Behoudelijck dat men den voors. los schuldich, ende ǁ verbonden sal wesen een halff jaer te voorens wittelijck te vercondigen ende op te seggen, Getuijgen ǁ waeren hier over schepenen in S Hertogenbossche Huijbert van Berckel ende Florentinus Schuijl ǁ gegeven den eenendertichsten dach der maent Decembris int jaer ons heeren duijsent sesse hondert ǁ seven ende vijftich.

Linkermarge:

Debet segellen ǁ overmits de ge ǁ commiteerde ǁ totte distributie ǁ van t cleijn segel ǁ alsnu sijn onversien

Dorsale aantekening:

Tilborch ǁ constitutieren ǁ C gulden