's-Hertogenbosch

Meester Henrick van Eijndhoven notaris ende procureur vorden gerichte deser ǁ stadt inden naeme ende als gemechticht van jonker Franchoijs Lotius als wittich man ende momboir van jouffrouwe ǁ Anna Maria de Witte dochtere wijlen meester Nicolaes de Witte, in zijnen leven secretaris der heerlickheijt van Tilborch ende Goorle ǁ vanden selven ende Anna de Buridam zijne huijsvrouwe te saemen verweckt Inne procuratie brieven voor Bartholomeeus ǁ vanden Berge als oepenbaer notaris tot Antwerpen residerende ende seeckere getuijgen gepasseert wesende vanden ǁ date den sevenentwintichsten meert lest leden, ende uijt crachte der machte den voors. meester Henrick van Eijndhoven daer ǁ bij ( soo blijckende was ) gegeven ende verleent eenen jaerlicken ende erffelicken chijns van elff carolus gulden ende thien ǁ stuijvers, elcken gulden tot twintich stuijvers in goeden gancbaeren gelde gerekent, Te betaelen alle jaer erffelick ǁ opten lesten dach maij, ende binnen dese stadt Shertogenbossche, vrij van alle beden, exactien, subventien, tiende twintichste ǁ honderste ende alle andere mindere ende meerdere penningen egeene uijtgescheijden te leveren, van ende uijt huijs, hoff ǁ ende boomgaert groot omtrent een loopensaet gelegen tot Tilborch in de Hasselt aldaer tussen erve Geerart Claes ǁ Ariens aen d'een sijde, ende tussen erve Willem Jan Daniels aen d'ander zijde, Item alnoch van ende uijt een stuck teulants ǁ groot omtrent een loopensaet gelegen tot Tilborch voors. inde Gast velden aldaer, tussen erve Geerart Claes Adriaens ǁ van Os voors. aen d'een sijde, ende tussen de gemeijn Herstraet aen d'ander zijde, Ende alnoch van ende uijt omtrent twee ǁ ende een halff loopensaeten, soo weijlant als teulant gelegen tot Tilborch voors. ter plaetse aen de Stockhasselt ǁ tussen erve Wouter Teunis aen d'een sijde, ende tussen erve Jan van Hemert met meer andere aen d'ander zijde, welcken ǁ voors. chijns Daniel soene Willem Jans soene van Heijst hadde erffelick vercoft de voors. Anna de Buridam ǁ wittige naergelaeten weduwe zaliger meester Nicolaes de Witte voorn., Gelijck inne schepenen brieven deser stadt daer aff ǁ gemaeckt volcoemelicker staet begrepen, wesende vanden date den twelffsten juny anno sestienhondert vijffendertich, ǁ Ende welcken voor. chijns daer naer midts seeckere erffscheijdinge ende erffdeijlinge tusschen de geconstitueerde ǁ ende curateur vande kinderen ende erffgenaemen meester Nicolaes de Witte ende Anna de Buridam voors. gemaeckt ende ǁ aengegaen onder andere te deel ende te lote gevallen was, tot behoeff vanden voorn. jonkere Franchoijs Lotius als ǁ wittich man ende momboir, vande voors. Maria Anna de Witte zijne huijsvrouwe dochter desselffs meester Nicolaes ǁ de Witte ende Anna de Buridam, Gelijck inne schepenen deijlbrieven deser stadt daer aff gemaeckt breeder ǁ staet begrepen, vander date den tweentwintichsten aprilis lest leden, heeft hij wittelick ende erffelick opgedragen ǁ ende overgegeven midts desen Jaecques Lauren coopman binnen deser stadt, t'saemen mitte voors. brieven ende ǁ mitten alingen recht hem opdraegere in qualiteijt voors. inde voors. brieven ende den inhout van dijen ennichsins ǁ competerende, t'saemen oijck mit vijff jaeren achterstels opten lesten maij sestienhondert vijffenvijfftich ǁ daer van verschenen ende onbetaelt staende, ende heeft helmelinge daer op verthegen inne manieren inne dijen ǁ gewoonlijck sijnde, Gelovende dije voors. opdraegere, uijt crachte sijnder voors. gegevender machte op verbant ǁ van alle de goederen des voors. constituants present ende toecoemende t'voors. opdraegen, overgeven ende verthijden ǁ altijt vast, stedich ende van weerden te houden sonder ennich tegenseggen ende allen commer, calangie ende aentael inden ǁ voors. chijns wesende off coemende den voorn. Jaecques Lauren aff te doen geheelicken, Getuijgen waeren hier ǁ over Schepenen inne Shertogenbossche Jacob van Casteren ende Gijsbert Cuijsten, Gegeven den negensten dach der ǁ maent maij, Int jaer ons Heeren duijsent sesshondert sessenvijftich.

L.C. van Kesssel.

Linkermarge:

Debet sigillium ǁ over mits de ǁ gecommitteerde ǁ tot de distrubutie ǁ van t'cleijn segel ǁ tijde deser extensie ǁ daer van onversien ǁ was.

Cornelus ǁ Cornelie

Dorsale aantekening:

Daniel Willemsen ǁ van Heyst ǁ Chijns van XI gulden ǁ X stuijvers