Tilburg

Cornelis soone wijlen Michiels Jansen woonende tot Tilborch ǁ heeft mits desen wittelijck ende erffelijck vercoft Anneken van Wamel tot behoeff van Peeter ǁ Jans van Wolffswinckel haeren wittigen man, eenen jaerlijcken ende erffelijcken chijns van drije Carolus gulden ǁ tot twintich stuijvers elcken gulden goet gangbaer gelts gerekent, te betalen allen jaer ǁ erffelijck op den thienden dach der maent van junio, ende voorden eersten termijn van betaelinghe ǁ op den thienden junij anno XVIC eenenvijfftich, ende binnen dese stadt vrij van allen beden, ǁ exactien, subventien, thiende, twintichde, honderde, mindere ende meerdere penningen commeren ǁ schattingen ende lasten gewoonelijck, ongewoonelijck ingestelt ofte ter avontueren noch ingestelt ǁ te worden egeene lasten uijtgescheijden te leveren ende te vergelden van ende uijt huijs, ende hoff met ǁ sijn aenliggende soo weij als teulant groot ontrent vijff t’alff loopensaet lant gelegen ǁ onder Tilborch voor. ter plaetsche genoemt de Stockhasselt tussen erve der Baselaers binnen ǁ de stadt aen d’een sijde, ende tussen gemeijne straet aen d’ander sijde, streckende van erve Peters ǁ Jan Goijers tot aende gemeijne straet aldaer, vanden selven Peeter metten erffrecht te ǁ hebben ende te besitten, ende heeft die voorn. vercooper den voors. chijns de voorn. Anneken tot behoeff van ǁ haeren man opgedragen mit helmelinge verthijdenisse inne manieren indien gewoonelijck sijnde ǁ geloovende de voors. vercoopere als schuldenaer principael op verbant van sijnen persoon ende alle ǁ sijne goederen present ende toecomende dat hij den voor. Peeter Janssen vande voors. chijns schuldige ende gerechte ǁ sal doen warantschappe ende dat hij allen anderen commer, calengie ende aentael int voors. onderpant wesen ǁ oft comende den voors. Peeter Janssen aff sal doen geheelijcken, uijtgenomen eenen erffelijcken chijns van ǁ twaelff gulden ende een halff aen Giel Huijberts tot Tilborch, te los met tweehondert gulden, eerst jaerlijcks ǁ ende van rechtswegh daeruijt te vergelden staende soo hij seijde, ende dat hij t'voors. onderpant voor de ǁ betaelinghe des voors. chijns den voors. Peeter jaerlijcks daeruijt soo voors. staet te vergelden altijt goet genoch ende ǁ weldugende sal maken ende houden, mit conditien in desen toegedaen dat de voors. vercooper den voors. chijns tot ǁ allen tijden sal mogen lossen ende quijten t’effens ende tenemael met de somme van sestich Carolus gulden tot twintich ǁ stuijvers elcken gulden goet Hollants permissie gelt gereeckent, ende metten loopende jaerchijns ende achterstellen ǁ ten tijde der afflossinge daervan t’ achte ende ombetaelt staende, behoudelijck datmen schuldich ende verbonden ǁ sal sijn den voors. los een halff jaer te voorens wittelijck te vercondigen ende op te seggen, Getuijgen waeren hierover ǁ schepenen in s’Hertogenbossche Johan Gans, ende Jacob van Casteren,  Gegeven den thienden ǁ junij int jaer ons heeren duijsent sessehondert ende vijfftich.

H. Ruijsch ǁ littera [***]hicis ǁ [***] R

Dorsale aantekening:

heer sekretaris gelieven ǁ desen brief te [***]eren  ǁ beken[ne] ten vollen daer ǁ van voldaan te sijn ut ǁ handen van den sekretaris ǁ van Tilborch actum 1668 ǁ Peter Jansen van Wolffswinckel

Tilborgh ǁ constitutie van ǁ III gulden