Tilburg

Adriaen, soone wijlen Goijaerts Michiels. woonende tot Tilborch, heeft mits desen wittelick ende erffelicken vercocht ǁ Geerlingen Ruijs, tot behoeff der Taeffele vanden Heijligen Geest binnen deser stadt sHertogenbossche, eenen jaerlicken ende erffelicken ǁ chijns van drije Carolus gulden, tot twintich stuvers elcken gulden gerekent oft de werde daer voor in andren goeden gelde, te betaelen ǁ alle jaer erffelick int hoochtijt van onser liever vrouwen bootschappe, ende voor den iersten termijn van betaelinge int hoochtijt van onser ǁ liever vrouwen bootschappe anno sestienhondert ende sevenentwintich toecomende, ende in sHertogenbossche vrij van allen beden ons heeren ǁ des hertoge, exactien, subventien, vijffe, tiende, twintichste, honderste ende alle andre meerdre ende mindre penningen commeren, schat ǁ tingen ende lasten, gewoonelick, ongewoonelick, ingestelt ende naermaels inne te stellene egheene lasten uutgescheijden te leveren ǁ ende te vergelden, van ende uuijt huijs, schuere henne gronden, hoff ende ackerlant daer aenliggende, drije ender een halff ǁ loopensaten lants ofte daer omtrent te samen inder grootte begrijpende met gemeen rechten ende toebehoortten, gestaen ende ǁ gelegen onder der parochie ende heerlickheijt van Tilborch, ter plaetssen genaempt Loeven, tusschen erffenisse Adams ǁ soone Henricx Gielissen aen deen sijde ende aen dezen eijnde, ende tusschen erffenisse Jans soone Peeters Vennincx aen dander ǁ zijde streckende metten anderen eijnde aende gemeijn straet ge(nae)mpt de Lovenstraete, ende alnoch van ende uut een stuck ackerlants ǁ groot omtrent twee ende een halff loopensaten gelegen onder de parochie voer(schreven), ter plaetssen genoempt tZonderlot** ǁ neffens de gemeijn straete aen deen sijde, ende neffens den erffve Marijkens weduwe Adriaens Colen voorgaende weduwe ǁ Goijaerts Michiels des vercoopers moeder, aen dander sijde, streckende vande gemeijn strate genoempt die ǁ Pennincx straet tot aen erffve Jans Peeter Vennincx voorgenoempt (soo hij verclaerden) van der voers. Taeffele ǁ vanden Heijligen Geest metten erffrecht te hebbene ende te besittene, ende heeft die voorgenoempde vercooper ǁ den voerschrevene chijns, den voorgen. Geerlingen Ruijs, tot behoeff vander voerschreven Taeffele opgedragen, met hel ǁ melinge verthijdenisse inne maenden indijen gewoonelick sijnde, Geloovende de voers. Adriaen vercooper ǁ als schuldenaer principael op verbant van sijnen persoone allen sijnen goederen present ende toecomende, dat hij de ǁ voerschreven Taeffele vanden voorgen. chijns schuldige ende gerechte sall doen warantschappe, ende dat ǁ hij allen anderen commer calangie ende aentael inde voerschreven onderpanden wesende ofte comende der voers. Taeffele ǁ aff sal doen geheelicken, wegen noch den grontchijns tot twee ende eenen halven stuveren aenden heeren ǁ van Tilborch, item eenen pacht van derthien loopen roggen, aenden Convict vanden Susteren van Orten, noch ǁ eenen erfflosschijns van sess gulden vijff stuvers, ende eenen van neghen gulden, beijde aende voers. Taeffele ǁ des Heijlichs Geest, jaerlix van te voorens ende van rechts wegen uuten voers. onderpanden te vergelden staende (zoo hij ǁ verclaerden) ende dat hij de voers. onderpanden voor de betaelinge des voers. chijns, der voorn. Taeffele jaerlix als ǁ voers. staet daer uuijt te vergelden altijt goetgenoch ende weldoegende sal maken ende houden, met conditien hier inne ǁ toegedaen, dat de voers. vercoop desen voers. chijns van drije gulden ten allen tijden sal mogen lossen ende quijten ǁ tsamen ende ten eenenmael metter somme van vijftich Carolus gulden, tot twintich stuvers goets permissie ǁ gelts bij placcaet gepermitteert elcken gulden gereekent, ende metten jaer chijns ende achter stellen ǁ ten tijde vander afflossinge van de voorn. chijns ten achteren ende ombetaelt staende, behoudelick nochtans ǁ dat men, dusdanigen loss een halff jaer te voorens wittelick sal moeten te kennen geven ende opseggen ǁ Getuijgen waeren hier over schepenen in sHertogenbossche Johan van Broegel ende Henrick van ǁ Zoerendoncq, Gegeven den twintichsten dach der maent Maij, int jaer ons heeren duijsent sesshondert ǁ ende sessentwintich.

Dorsale aantekening:

Dese rente van drije gulden jaerlijcks ǁ aen d'ander zijde begrepen is aen mijnen ǁ handen als Rentmeester vanden H. Geesthuijse ǁ gelost, consenteerende dat die ten ǁ prothocolle werde gecasseert desen ǁ XII Martij 1641 ǁ H L Bueter[?] ǁ 1641

Tilborch ǁ III Carolus gulden ende is geldende Adriaen ǁ Goijart Michielss tot Tilborch op Loeffven