's-Hertogenbosch

Willem Gerartz. genoemt den Coomen wonende tot Thilborch heeft mitz desen wittelijck ende ǁ erffelick vercoft Peeteren sone Jans Cornelis Mutsarts van Thilborch tot behoeff des Godshuijs oft convents van Tongerloo der ordre van ǁ premonstrense eenen jaerlijcken ende erffelijcken chijns van sess carolus gulden ende vijff stuvers elcken gulden tot twintich stuvers te rekenen op de werde ǁ daer voor in anderen goeden gancbaren gelde, te betalen alle jaer erffelijck op bamisdach Ende voorden iersten termijn van betalinge op ǁ bamisdach Anno XVIC veertien naestcomende, Ende binnen der stadt Shertogenbosche vrij van allen hertochs beden vijfte, tiende, twintichste, ǁ honderste ende allen andere meerdere ende mindere penningen, commeren ende lasten gewoonlijck ongewoonlijck ingestelt ende namaels ingestelt te worden ǁ egeen lasten uutgescheijden te leveren ende te vergelden van ende uut een huijs ende zijnen gront, hoff ende weijlant daer aen liggende ǁ twee lopensaten vier ende twintich ende halff roeden lants gelegen inde parochie van Thilborch ter plaetzen genoemt ǁ aenden Hovel tussen erve Adriaens sone Cornelis Anthonissen aen d'een zijde ende tussen erve Hermans de Roij aen d'ander zijde ǁ ende streckende met d een eijnde aen erffenisse meester Jans de Roij des voors. Hermans vader Schouteth tot Thilborch ende met dander ǁ eijnde aende gemeijne straete aldaer soo hij sede, Dezen voors. chijns van sess carolus gulden ende vijff stuvers vande voorn. convent ǁ ofte Godshuijs metten erffrechtte hebben ende besitten ende heeft de voorn. vercoopere den voors. chijns den voorn. Peeteren tot behoef ǁ des voors. convents opgedragen met helmelinge vertijdenis in manieren indijen gewoonlijck zijnde, Gelovende de voorn. vercooper ǁ als schuldenaer principael op verbant van zijnen persoon ende goederen present ende toecomende dat hij den voorn. convente van den voors. ǁ chijns schuldige ende gerechte zall doen warantschap Ende dat hij allen anderen commer, calangie ende aentael inde voors. onderpanden ǁ wesende oft comende den voorn. convent aff zal doen geheelijck uurgenomen aende erffelijcke onlosbaren chijns van eenen gulden seventien stuvers ander ǁ halff oirt aende voors. Godshuijs oft convent jaerlijcks van te voren ende van rechts wegen uuten voorn. onderpanden te vergelden staen zoo hij sede ǁ Ende dat hij oock de voorn. onderpanden voor de betalingen des voors. chijns den voorn. convente jaerlijcks daer uut zoo voors. staet te vergelden ǁ altijt goet genoch weldogende zal maken ende houden met condicie in dezen toegedaen dat de voorn. vercooper dezen voors. chijns van ǁ sess carolus gulden vijff stuvers ten allen tijden zall mogen lossen ende quijten teffens ten eenenmale met de somme van een ǁ hondert carolus gulden, elcken gulden tot twintich stuvers te rekenen op de werde daer voor in zulcken anderen goeden ǁ gelde, ende tot zulcker valeur gelijck als tgelt ten tijde dezer lossinge volgens tplaccaet vanden hove opt stuck der ǁ permissie vander munten zall gon baer zijn, Ende metten jaerchijns ende achterstellen alsdan daeraff ten achteren ende ǁ onbetaelt staende, Behoudelijck of de voorn. vercooper den loss een halff jaer te voren wittelick zall vercondigen ǁ ende opseggen Getuijgen waeren hier over schepenen in Shertogenbosche Gerart van Soemeren ende Zeger meester Zeger ǁ Adriaens Gegeven den achtentwintichsten dach februarij int jaer ons heeren dusent zesshondert ende vertien.

Dorsale aantekening:

Willen Gerits de Comen heeft ǁ desen brieff aen mijnen handen ǁ gelost actum den 6 januarij ǁ 1615  Peter Janss Mutzarts.

Willen Gerits de Comen ǁ tot Tilborch VI gulden V stuijvers