's-Hertogenbosch

Cornelis sone wijlen Jan Gilen Damen woonende tot Tilborch heeft mits desen wettelijck ende erffuelijck vercocht Andries van Weerdt ǁ eenen jaerlijcken ende erffuelijcken chijns van twelff carolus guldens tot twintich stuijvers goets ganckbaers gelts elcken gulden gereeckent, te betaelen alle jaer ǁ erffuelijck opten twintichsten dach der maendt van Junio, ende voor den eersten termijn van betaelinge opten twintichsten Junij anno sestienhondert negen en vijfftich ǁ ende binnen dese stadt vrij van alle beden, exactien, subventien, commeren, schattinghen ende lasten egheene uuijtgescheijden te leveren, van ende uut huijs, erve, hoff, ǁ bogaert ende voorder aengelach ontrent negen loopensaten t'saemen groot sijnde geleghen onder de heerlijckheijt van Tilborch aende Postelstraeten neffen erve Peeter ǁ Janssen suijtwarts aen d'een sijde, ende neffen erve Cornelis Jan Laureijnssen noortwarts aen d'ander sijde, streckende vande Gemeijne Straet tot op erve Giel Peer ǁ Sande oistwaerts, soo hij verclaerde, van den selven coopere metten erffrecht te hebben ende te besitten, ende heeft die voors. vercoopere den voorn. chijns den selven ǁ coopere opgedraegen met helmelinghe verthijdenisse inne manieren in dijen gewoonelijck sijnde, Gelovende die voors. vercoopere als schuldenaer ǁ principael op verbant van sijnnen persoon ende alle sijnne goederen present ende toecomende, dat hij den voorn. coopere vanden voors. chijns schuldige ǁ ende gerechte sal doen warandschappe ende dat hij allen anderen commer calangie ende aentael inde voors. onderpanden wesende ofte comende denselven ǁ coopere aff sal doen geheelijcken, uuijtgenomen eenen chijns van negen gulden aen den grooten Bagijnhoff binnen dese stadt eerst jaerlijcx ende van rechts weghen ǁ daer uuijt te vergelden staende, soo hij seeghde, ende dat hij oijck de voors. onderpanden voor de betaelinge des voors. chijns den voorn. coopere jaerlijcx daer uuijt ǁ als voor te vergelden, altijt goet genouch ende wel deugende sal maecken ende houden, met conditien inne desen toegedaen dat de voors. vercoopere den voors. chijns van ǁ twelff gulden s'jaers tot allen tijden sal mogen lossen ende quiten t'effens ende teenemael mette somme van tweehondert carolus guldens tot twintich stuijvers goets permissie ǁ gelts elcken gulden gereeckent, ende metten loopenden jaer chijns ende achterstellen ten tijde der afflossinge daer van t'achter ende onbetaelt staende, Behoudelijck dat men ǁ schuldich ende verbonden sal sijn den voors. los een halff jaer te voordens wettelijcken te vercondigen ende op te seggen, Getuijgen waeren hier over schepenen inne ǁ s'Hertogenbossen Johan van Zutphen ende Johan Schoock, Gegeven den twintichsten dach der maent Junij int jaer ons heeren duijsent sesshondert achtenvijfftich.

Littera Andree ǁ Et Solvit 8:

Linkermarge:

[Debet] sigillum overmits ǁ de geco(mm)itteerdens ǁ totte distributie vant cleijn ǁ segel tijde der extensie ǁ daer van waeren onversien.

Dorsale aantekening:

Ick Andries Peters bekenne te vollen ǁ vooldaen te wesen ende gaende desen ǁ brief los en liebers te wesen gheconsenteert ǁ te wesen van mijn heer secretaries tot Tilborgh ǁ versoeken op protocol gheloeft te wesen Actum ǁ dit gheschreven den sevenste februrarie int jaer ǁ sestien hondert acht en sestich ǁ Andries van Weerdt