's-Hertogenbosch

Nicolaes sone Peeter Huijbert Jaspars woonende Tilborch heeft mits desen wittelick ende ǁ erffelick vercoft Johan vander Velde out schouteth van Geldrop als een der momboiren vande twee ommundige kinderen ǁ Peeter Walravens van Roosmalen tot behoeff vande selve ommundige, eenen jaerlicken ende erffelicken chijns van ǁ thien Carolus gulden tot twintich stuijvers goets ganckbaers gelts elcken gulden gereekent, Te betaelen alle jaer erffelick ǁ op den drijentwintichsten dach der maent meij ende voorden iersten termijn van betaelinge op den drijentwintichsten ǁ maij anno XVIC negenenvijftich, Ende binnen dese stadt vrij van alle beeden, exactien, subventien, commeren ǁ schattingen ende lasten, ingestelt ende noch naermaels ingestelt te wordden egeene lasten uutgescheijden te leveren ǁ van ende uut huijs, erve, hoff, schuer, brouwhuijs mitte andere erffenisse daeraen gelegen omtrent een ǁ loopensaet groot sijnde, gelegen inde heerlickheijt van Tilborch ter plaetse genoemt in Nieuwlant aende ǁ Dorenboom, tussen erve Henrick Pauwels aen deen sijde, ende tussen erve Adriaens van Eerssel d’ander sijde ǁ streckende van erve Willem Goossens tot op de gemeijn straet, Ende alnoch van ende uut eenen ackerteulants ǁ gelegen onder Tilborch voors. ter plaetse genoemt Broekhoven omtrent vijff loopensaat groot sijnde, tussen ǁ erve Cornelis Peeter Melis d’eensijde, ende tussen erve van jouffre Maria de Roij wedue van wijlen Johan Gerardi ǁ in sijnen leven drossart van Hees ende Leende d’ander sijde, ende mit deen eijnde, streckende mitten anderen eijnde opde gemeijn ǁ Broekhovensche straet, soo hij seijde, vande selve ommundigen mitten erffrecht te hebben ende te besitten, Ende heeft die ǁ vercooper den voor. chijns tot behoeff vande voor. ommundige opgedragen met helmelinge vertijdenis in maniren indien gewoonlick ǁ zijnde, Geloevende voor. vercooper als sculdenaer principael op verbant van sijnen persoon ende alle zijne goederen present ende toecomende ǁ dat hij den voor. ommundigen vande voors. chijns sculdige ende gerechte sal doen warantschap, ende dat hij allen anderen commer, calangie ende aentael ǁ inde voors. onderpanden wesende oft comende den voors. ommundigen aff te doen geheelicken uutgenomen eenen chijns van thien gulden aent grooten ǁ gasthuijs binnen dese stadt eerst jaerlicx ende van rechts wegen daeruut te vergelden staende soo hij seeghde, Ende dat hij oijck de voors. ǁ onderpanden voor de betaelinge des voors. chijns den ommunidgen jaerlicx daeruut als voor te vergelden altijt goet genoch ende welduegende ǁ sal maeken ende houden, met conditien inne dese toe gedaen dat die voors. vercooper den voors. chijns van thien gulden sjaers tot allen tijden ǁ sal moegen lossen ende quijten t’effens ende ten eenemael mitte somme van twee hondert Carolus gulden tot twintich stuijvers ǁ goets permissie gelts den gulden gereeckent Ende mitten loopende jaerchijns ende achterstellen ten tijde der afflossinge daervan tachter ǁ ende ombetaelt staende, Behoudelick dat men schuldich ende verbonden sal zijn den voors. los een halff jaer tevoorens wittelick te ǁ vercondigen ende op te seggen. Getuijgen waeren hierover scepenen sHertogenbossche Johan van Zutphen ende ǁ Huijbert van Berckel, Gegeven den drijentwintichsten dach der maent maij, int jaer ons heeren duijsent sesshondert ǁ achtenvijftich

LS van Kessel

Linkermarge:

debet sigillum ǁ mits de ge ǁ committeerde ǁ totte distributie ǁ vant' cleijn ǁ segel tijde ǁ der extentie ǁ daervan waren ǁ onversien

Dorsale aantekening:

Tilborch ǁ constitutie van ǁ X gulden