Oisterwijk

Adriaen sone wylen Jans sone Peter Adriaen Sterts daer moeder aff was Elisabeth huisvrouwe wylen Jans de Menen ǁ heeft wettelyck ende erffelyck vercocht joncheren Johan de Bever Cornelissen eenen jaerlycken ende erffelycken ǁ chyns van veerthien karolus gulden van  twintich stuveren t'stuck oft de weirde daer voor in anderen goeden gelden ǁ nae permissie vande hove ganghbaer wesende te vergelden ende te betalen allen jaer erffelyck op Sinte ǁ Dionys dach biscop, waer aff den yersten betaeldach wesen sal op Sinte Dionys dach biscop yerstcomende wesende ǁ van gisteren vuer een jaer Vry van alle beden thienden, twintichsten ende hondertsten penningen commeren schattingen ǁ ende lasten gewoonlyck ende ongewoonlyck ingestelt ende naemaels ingestelt te wordden egene lasten ǁ uuytgescheyden, Van ende uuyt twee stucken lants by ende aen malcanderen gelegen soe ackerlant als ǁ weylant seven lopenssaet oft daeromtrent tsamen begrypende gelegen inde prochie van Oisterwyck ter ǁ plaetsen genoempt Udenhoudt opte Houdtsche straete tussen erffenis Jan Peterssen de Lepper ende erffens ǁ des heren van Petershem aen deen zynde noordtwaert, ende tussen erffens Emken weehe Jan Wilborts ende erffenis ǁ des Biscops vanden Bosch aen dander syde suytwaert, streckende oistwaert aen erffenis der kynderen ǁ Jans sone Jan Peter Adriaenssen voors., ende metten anderen eynde aende Houdtsche straete, noch van ǁ ende uuyt de helft westwaert in een stuck beempts acht lopenssaet oft daer omtrent int geheel begrypende ǁ gelegen inde prochie voors. aende Gruen strate dese helft tussen erffenis des heren van Yseren, aen deen ǁ syde ende metten eenen eynde, ende tussen erffenis der kynderen Jans voors. hier tegen gedeylt wesende ǁ aen dander zyde, streckende metten anderen eynde aen erffenis Bartholomeeus Michiel Loyen een ǁ cleyn straeten tussen beyde liggende ende halff tot deser erffens behoirende so men verclairden omden ǁ voors. chyns byden voors. copere in eenen erfrecht te hebben ende te besitten Gelovende die voors. ǁ vercopere als schulder principael op hem ende op alle zyne goeden hebbende ende vercrygende ǁ den voors. chyns van veerthien karolus gulden den voors. copere te waren alsmen erffchyns schuldich is te waren ǁ ende de voors. onderpanden voorde jaerlycxe betalinge vande voors. chyns altyt goet seker genoech ende ǁ weldogende te houden ende te maken ende allen anderen commere calainge ende aentael inde voors. ǁ onderpanden wesende den selven aff te doen gehelycken uuytgenomen twelff lopen roggen ts(jae)rs den ǁ Heyligengeest tot Tilborch, Getuygen waren hier over schepenen in Oisterwyck Goossen ǁ Gielissen vande Borcht ende Jan Wouterssen van Buerden die huere segelen in getuygenisse hier aen ǁ hebben [gehangen] opten thiende dach october int jaer ons heeren duysent sesshondert ende derthien

Dorsale aantekening:

Joncheer Johan de ǁ Bever ǁ XIIII carolus gulden tsiers ǁ op

Adriaen sone Jan ǁ Peter Adriaen Sterts ǁ op te Houtsche strate ǁ [***]