Tilburg

Kennelyck zy eenen yegelycken dat voir ons schepenen ondergeschreven inne propriere persoonen syn gecomen ende gecompareert ǁ Peeter ende Jan gebroederen soonen Jacob Jan Symonssoon byden selven Jacobben ende uuyt Anna synre huysvrouwe ǁ dochtere wylen Peeter Cornelis Mutssarts wettelyck verweckt synde, Ende hebben van seeckere hiernaerbeschreven ǁ erffenissen heurlieden naer doode der voirschreven Anna aengecomen, ende die voirschreven Jacob tot nochtoe beseten ǁ heeft, ende waerinne hy op huyden syn recht van tochte heeft affgegaen seeckere erffdeylinge aengegaen ende geslooten ǁ in manieren hiernaerbeschreven volgende: Overmidts der welcker soo is den voirschreven Jannen te deele bevalle ǁ ende sal hebben houden ende erffelyck voir syne portie besitten Een stuxken erffven daeroppe een huysken ǁ staende is gelegen binnen der prochie van Tilborch ter plaetschen geheyten aen Terenvenne, ende welcke huysken ǁ naer doode van Jacobben syn vaders dairaff geruymdt sal wordden, ende als dan toebehoiren sal Peeteren synen ǁ broeder, ende en sal de voirschreven Jan nyet eer dan naer doode syn vaders dit stuxken erffven oock mogen ǁ aenveerden, noch een huys hoff schuer metten gronde ende erffenisse dairaen liggende ende dairtoe ǁ behoirende onder saeylandt ende weye thien lopensaet oft dairomtrent begrypende, nochtans alsoo groodt ende cleyn ǁ als tselve gelegen is binnen der prochie ende plaetse voirschreven, aldaer tusschen erffenisse Jan Geridt ǁ Peeter Maes s. Geven[??] deen zyde, ende tusschen erffenisse der weduwe metten kynderen Laureijs Hendrick Jan ǁ Symonssoon dander zyde, streckende vander erffenisse Peeter syn broeders hiertegens affgedeylt  totter ǁ gemeynder strate, Ende alnoch een stuck zaeylandts een lopensaet vierdalff ooyen oft dairomtrent metter ǁ mate begrypende gelegen binnen der prochie ende plaetse voirschreven, aldaer tusschen erffenisse Cornelis Pieter ǁ Jan Reynen deen zyde, ende aen beyde deynden, comende mette andere zyde aen erffenisse Jan Cornelis Janssoon ǁ de Beer, alsoo zy seyden, Op welcke huysen, hoff schuer, ende andere erffenissen voirschreven die ǁ voirgenoemde Peeter volcomentlyck heeft vertegen ten behoeffve van Jannen synen broeder met overgeven ende ǁ affgaen in manieren dairtoe behoirlyck ende gewoonlyck synde, Ende heeft gelooft op hem selven ende op alle ǁ syne goeden hebbende ende vercrygende dit vertyen overgeven affgaen ende dese erffdeylinge altyt vast ende ǁ stentich te houden ende in synen name te doen houden sonder ennich wederseggen, Ende alle commer ofte ǁ calaingie dairoppe comende altemael aff te doen denselven, uuytgenomen dat die voirschreven Jan hieruuyt sal ǁ gelden drye carolus gulden jairlyx aenden erffgenamen Herman Jan Hermans te betalen, ende te losschen volgens ǁ den brieffven dairaff synde noch drye gulden jairlyx aen Daniel Joost Mutssarts te betalen ende te ǁ losschen volgende den bescheede dairaff synde, noch deen hellicht van 71 oirt jairlyx aenden provisoren der ǁ taffele vanden heyligengeest binnen Tilborch te betalen, noch 71 oirt gewincyns jairlyx op Sinte ǁ Stevens dach aenden heer van Tilborch te betalen, Ende voirts alle  gebuerlycke rechten t'onderhouden naer ouder ǁ gewoonte, ende dat zy condividenten daertoe malcanderen sullen wegen daer tselve noodich wesen sal, alsoo dat ǁ elck gevuechelyck op t' syne sal cunnen comen, Ende dairtoe dat zy malcanderen alle achterstellingen pachten ende ǁ renthen generalycken opde goeden, by henliedens midts deser deylinge gedeylt, ombetaelt staende sullen claren ende ǁ malcanderen helpen betalen die tot lichtmisse lestleden incluz ten achtere syn staende, welcke drye carolus gulden ǁ de hellicht van 71 oirt ende 71 oirt gewincyns, wegen ende stegen mette ombetaelde pachten voirschreven die ǁ voirgenoemde Jan alsoo sal gelden affloschen betalen ende laten volgen ten dage ende termynen dairtoe staende ende ǁ geordonneert synde dat des voirschreven Peeters syn broeders goeden syne oiren ofte nacomelingen dairaff ongehouden ǁ sullen blyven nu ende ten euwigen dagen, wel verstaende op den voirschreven Jannen op dit syne gedeelte ennigen aentalen ǁ commer hynder oft last quame met recht meer dan alhier voirschreven staet dat zy dyen malcanderen sullen helpen affdragen ǁ dwelck zy deen den anderen ende elck onder t verbant alsvoir alsoo gelooft hebben sonder oppositie van recht te volbrengen, Sonder ǁ argelist, Oirconden hebben hierover geweest Schepenen binnen Tilborch ende Ghoirle Isebrant Geritssoon Brock ende ǁ Hendrick Hermanssoon van Heyst die den zegel heurs gemeyn schependoms desen brieffve op en aen doen hangen inden jare ǁ ons heeren duysent seshondert ende elffve opden vierden dach der maendt vanden meerten

H  de Roy