's-Hertogenbosch

Bartholomeus soone wijlen Jan Henrichssen woonende tot Tilborch, heeft mits desen ǁ wittelick ende erffelick vercocht jouffrouwe Anne dochtern Boudewijns Buridam, wettighe ǁ huijsvrouwe Meesteren Nicolaes de Witte, secretaris tot Tilborch ende Goorle, tot behoeff des ǁ selffs secretaris haer mans, Eenen jaerlicken ende erffelicken chijns van sess carolus ǁ gulden achthien stuvers, elcken gulden tot twintich stuvers inne goeden gancbaren geld ǁ gereeckent, te betaelen alle jaer erffelick int hoochtijt van onse lieven vrouwen ǁ Lichtmisse, Ende voorden iersten termijn van betaelinge op Lichtmis dach, Anno sestien ǁ hondert ende vijerendertich, Ende binnen sHartogenbossche vrij van allen haeren exertien ǁ subventien, tiensten, twintichsten, hondersten, meerdere ende mindere penningen commeren ǁ schattingen ende lasten gewoonelick ongewoonelick, ingestelt ende naermaels te ǁ worden ingestelt tgeen vuijtgescheijden te leveren, van ende vuijt huijs, erffen ǁ hoff, boomgart, schuer, gemenen gronden, ende den ackerlant ende weijlant ǁ dijen aen eenen plack aenliggende te samen vijfftien loopensaten oft daeromtrent ǁ inde grootte begrijpende, gelegen onder de voers. parochie van Tilborch, inde ǁ Hasselt, tussen erffve Gerardt Claessen van Oss aen deen sijde, ende tusschen ǁ erve Peeter Huijberts besuijde, aen dander sijde, streckende met beijde den eijnden ǁ opte gemeijn straet (soo hij verclaerde, vanden selven Meesteren Nicolaes metten erffrecht ǁ te hebbene ende te besittene, Ende heeft die voorgen. vercooper, den voorgen. chijns ǁ den voers. jouffrouwe Anna tot behoeff des voers. Meesteren Nicolaes haer mans opgedragen ǁ met helmelinge vertijdenisse inne manieren inne dijen gewoonelick sijnde ǁ Geloovende de voorgen. vercooper als schuldenaer principael op verbant van sijnen ǁ persoon ende allen sijnen goederen present ende toecomende, dat hij den voorgen. Meesteren ǁ Nicolaes vanden voorn. chijns schuldige ende gerechte sal doen warantscappe, ende ǁ dat hij allen anderen commer calange ende aentael inde voers. onderpanden wesende ǁ oft comende, den voorgen. Meesteren Nicolaes sal aff doen geheelijck, vuijtgenomen ǁ eenen stuck chijns, aenden here van Tilborch, ierst jaerlix van rechtswegen ǁ daer vuijt te vergelden staende, Ende dat hij oijck de voorgen. onderpanden voorde be ǁ taelinge des voersc. chijns, den voorgen. Meesteren Nicolaes jaerlix als voers. staeth ǁ daer vuijt te vergelden, altijt goet genoch ende weldochende sal maken ende ǁ houden, Met conditien dat de voorgen. vercoop, desen voers. chijns sal mogen ǁ lossen ende quijten tot allen tijden teffens ten eenemael, metter somme ǁ van tweehondert ende drije Carolus gulden, elcken gulden tot twintich ǁ stuvers inne goeden gancbaeren gelde gereeckent, Ende metten jaerchijns ende ǁ achterstellen die ten tijde vande afflossinge vanden voorgen. chijns ten achteren ǁ ende ombetaelt sullen staen, Behoudelick dat men den voorgen. lossch een halff jaer ǁ te vooren sal vercondigen ende opseggen, Getuijgen waeren hierover scepenen ǁ in SHartogenbossche Henrick van Casteren ende Henrick van Vlaraarcen, gegeven ǁ den vijften dach der maent Julij, int jaer ons heren duijsent sesshondert ǁ ende drijeendertich

J: van Dreijsschoir ǁ literis magistri Nicolaj

Dorsale aantekening:

Ick ondergeteeckent Anne dochtere Boudewijn Buridan ǁ lest weduwe wijlen Meester Nicolaes de Witte in sijnen leven secretaris ǁ der heerlijckheijt Tilborch jegenwoordelijck in houwelijck ǁ hebbende Simon van Bamelroij eth(ceter)a  condescenderie Ende staen ǁ toe soo veele desnoot soude moghen wesen int casseren ǁ ende dooden van desen brieve mits aenden voorn. mijnen ǁ jegenwoordige man  Bamelroij  tellende oft getelt ǁ wesende hondert tnegentich gulden eens sulcx sijnde ǁ is mede voor quitan(tie) van dijen dienende Ende voirder ǁ oft andersins nijet oirconden etcetera den XXIJ october 1641

Anne Buridan

hoewel dese quitans ǁ luijt op 1c Xi gulden ende is ǁ daaropp mede betaelt ǁ 1C LXXXVII gulden

22 october 1640

Tilborch ǁ Constitutie van XI gulden ǁ X stuivers

34 gulden - 10 stuijvers

den XXVIII januareij 1693 ǁ voor schepenen bekent dat ǁ zeij daer af voldaen zeij