Vindplaats van het origineel
Regionaal Archief Tilburg, toegangsnummer 1428, Charterverzameling Tilburg (en Goirle, Berkel-Enschot en Udenhout), inv.nr. 259
29 oktober 1636
Samenvatting oorkondetekst
Akte van verkoop door Bartholomeus, zoon van wijlen Jan Henricx, te Tilburg, aan Peeter Janssoen Mutssarts, van een jaarlijkse erfcijns van 8 karolus gulden en 5 stuivers uit een huis, schuur, erf, hof en erven, gelegen ter plaatse genaamd aen de Hasselt, te Tilburg.
Transcriptie
Bartholomeus soone wylen Jans Henrix woonende tot Tilborch ǁ heeft wittelick ende erffelick vercocht Peeteren Janssoen Mutssarts, ǁ Eenen jaerlicken ende erffelicken chijns van acht carolus gulden ende vijff ǁ stuvers, tot twintich stuvers goets ganckbaer gelts elcken gulden gerekent ǁ Te betaelen alle jaer erffelick op Sint Servaes dach des Biscops ǁ Ende voorden iersten termijn van betaelinge op Sint Servaes dach ǁ Anno sestienhondert sevenendertich, Ende binnen deser stadt vry ǁ van alle beden, exactien, subventien, tienste, twintichste, honderste meer ǁ dere ende mindere penningen commeren, schattingen ende lasten gewoonelick ǁ ongewoonelick ingestelt ende naemaels ingestelt te worden egeen ǁ uuytgescheyden te leveren ende te vergelden, van ende uuyt huys, schuer ǁ erffve, hoff ende ander erffens dijen aenliggende vyerthien loopensaten ǁ lants oft daeromtrent groot synde, gelegen inde parochie ende heerlick ǁ heyt van Tilborch, ter plaetssen genoemt aen de Hasselt tussen erffve ǁ Peeters de Snyder aen deen syde ende tussen erffve Gerarts Claessen van ǁ Oss aen dander syde, streckende met beyde deijnden aenden gemeyn ǁ straeten alhier (soo hy verclaerden) vanden selven cooper metten erffrecht ǁ te hebbene ende te besittene, Ende heeft die voorn. vercoopere ǁ den voers. chyns, den voorn. cooper opgedragen, met helmelinge ǁ vertijdens inne manieren inne dyen gewoonelick synde, Geloovende ǁ die voers. vercooper als schuldenaer principael op verbant van ǁ synen persoon ende allen synen goeden present ende toekomende, dat hy ǁ den voers. coop van den voers. chijns schuldige ende gerechte sal doen ǁ warantscappen, Ende dat hy allen anderen commer, calangie ende ǁ aentael int voers. onderpant wesende oft comende den voorn. cooper aff ǁ sal doen geheelyck, uutgenomen eenen erffelicke chijns van seventien ende ǁ eenen halven carolus gulden jaerlix aenden voorn. Peeter Janssen Mutsarts ende ǁ alnoch eenen erffelicke chijns van sessendertich carolus gulden tsiaers, aen den ǁ grooten gasthuys binnen deser stadt, van te vooren ende van rechts wegen ǁ daer uuyt te vergelden staende (soo hy verclaerden) Ende dat hy t voers. ǁ onderpant voor de betaelinge des voers. chyns den voorn. coopere ǁ jaerlix als voers. staet daer uuyt te vergelden altyt goet genoch ǁ ende weldoegende sal maken ende houden, Getuygen waeren ǁ hier over scepenen in Shertogenbossche Elbert le Lyon ǁ ende Jan vander Meulen, Gegeven den negen ende twintichsten ǁ dach der maent octobris, Int jaer ons Heeren duijsent sesshondert ǁ ende sessendertich
L van Kessel.
loco patris
Dorsale aantekening:
Tilborch ǁ constitutie van VIII gulden V stuivers ǁ Peter Ariaenssen heft ǁ desen brieff voldaen den ǁ 19 october 1641