's-Hertogenbosch

Bartholomeeus soone wijlen Jans Henricxs woonende tot Tilborch heeft wittelick ende erffelick ǁ vercoft ende vercoopt mits desen Anneken dochter wijlen Hermans van Casteren ende wittige naegelaeten ǁ wedue zaliger Jans soone Henricx Willemsse van Belicom wullen lakenvercooper Eenen jaerlicken ende erffelicken ǁ chijns van thien carolus gulden tot twintich stuvers goets gelts elcken gulden te betalen alle jaer erffelick ǁ opten achtsten dach der maent van Junio, Ende voor den iersten termijn van betalinge opten achtsten dach der ǁ maent Junij anno XVIc  drijentwintich ierstcomende, Ende in Shertogenbossche vrij van allen hertochs ǁ beden, exactien subventien thiende, twintichste honderste, meerdere ende mindere penningen commeren ende lasten gewoon ǁ lick ongewoonlick, ordinaris extraordinaris innegestelt ende bij avontuere noch naemaels innegestelt te ǁ wordden egeene uuijtgesceijden te leveren ende te vergelden, van ende uut huijs erve hoff ende ackerlant daer toe ǁ behoorende malcanderen aen eenen plack aenliggende negen lopensaten lants oft daerontrent groot sijnde geleghen ǁ inde parochie van Tilborch ter plaetsse genoempt aen de Hasselt tussen erve Geerarts sone Cornelis Daniels ǁ aen deen zijde ende aen beijde den eijnden ende tussen erve Willems sone Jaspars Peeter Huijben ter andere zijde Item ǁ van ende uut een stuck ackerlants sess lopensaten oft daerontrent begrijpende gelegen inde parochie ende plaetsse ǁ voors. tussen erve Geerarts Vreijssen aen deen zijde ende tussen erve Jans Hoecx de Jonge soone wijlen Jans ǁ Hoecx des ouder aen dander zijde streckende met deen eijnde aen erve Adriaens Geerit Meeussen ende mett ǁ dander eijnde aende gemeijn straet genoempt de Stockhasseltsche straet, Ende alnoch van ende uut deen ǁ helft hem vercooper ongesceijden ende ongedeijlt toebehoorende soo hij seede in eenen beempt hoijlants twintich ǁ lopensaten lants oft daerontrent int geheel begrijpende gelegen in de voors. prochie van Tilborch ter plaetsse ǁ genoemt inde Nijvelden tussen erffenisse Goijaerts Teeuwens aen deen zijde ende tussen erffenisse Cornelis ǁ Janssen de Beer aen dander zijde streckende met d'een eijnde aen t gemeijn moer ende met dander eijnde aenden ǁ gemeijnen Langen dijck aldaer soo hij verclaerde, vander selver Anneken coopersse met den erffrecht te hebben ǁ ende te besitten ende heeft de voorn. vercooper de voors. chijns der voorn. Anneken coopersse opgedraghen ende ǁ heeft helmelinge daer op vertegen inne manieren inne dijen gewoonlijck sijnde. Gelovende de voors. vercoopere ǁ als schuldenaer principael onder verbant van sijnen persoon ende allen sijnen goederen present ende toecommende dat hij ǁ den voors. coopersse vanden voors. chijns schuldige ende gerechte sal doen warantscappe, ende dat hij allen anderen ǁ commer calaengie ende aentael inde voors. onderpanden wesende oft commende der voorn. coopersse aff sal doen geheelicken ǁ uutgenomen eenen pacht van eenen mulder roggen aen den convent van t Cauwater tot Roosmalen van ende uut den ǁ voors. huijse erve hoff ende zijnen aengelage, ende alnoch eenen erffloschijns van een en dertich ende eenen halven ǁ gulden van ende uut alle de voors. gestelde onderpanden jaerlicx van te vorens ende van rechts wegen te vergelden ǁ staende soo hij seede, ende dat hij oock voors. onderpanden voor de betalinge des voors. chijns der voors. coopersse ǁ jaerlicx daer uut soo voors. staet te vergelden altijt goet genoch ende welduegende sal maken ende houden, ǁ Getuijgen waren hier over Scepenen inne SHertogenbossche Rombout Rombouts ende Jan vanden Leemput, Gegeven ǁ den een ende twintichsten dach der maent Junij int jaer ons heeren duijsent sesshondert tweentwintich

Dorsale aantekening:

Thien gulden siaers op ǁ Jan Hendricx tot ǁ Tilborch