's-Hertogenbosch

Adriaen sone Thonis Willemss, als man ende momboir van Jenneken dochtere Claes ǁ Hendricxz., heeft wittelijck ende erffelijck vercocht Peeteren Tholinck tot behoeff van Anna van Casteren, dochtere wijlen ǁ Hermans van Casteren, Eenen jairlicken ende erffelijcken chijns van elff carolus gulden tot twintich stuvers goet gancbaer gelts ǁ elcken gulden gereeckent te betaelen alle jaer erffelijck opden eersten October, Ende voorden iersten termijn van betaelinge ǁ opden iersten October Anno Zestienhondert tweeende veertich, ende inne s'Hartoigenbossche vrij van alle beden ex ǁ actien subventien, vijffde, thiende, twintichste, honderste. mindere ende meerdere penningen commeren schattingen ende lasten ge ǁ woonlijck ongewoonlijck ordinaris, extraordinaris innegestelt, ende ter avontueren noch naemaels innegestelt te wordene ǁ egeene lasten uijtgescheijden te leveren ende te vergelden, van ende uijt huijs erve hoff metten ackerlande daer aen gelegen ǁ groot ontrent te saemen twee loopensaeten lants gelegen onder de parochie van Tilborch ter plaetsse genoempt den ǁ Berridijck, neffens de gemeijne straet, deen zijde, ende neffens erve Henrick Claes Henricxss dander zijde, streckende ǁ van erve des voors. Henrick Claes Henricx ende tot de gemeijnte aldaer, Ende alnoch van ende uijt twee loopensaeten acker, ǁ lants, gelegen ter plaetsse voors., neffens erve Cornelis Peter Meuwens, deen zijde ende beijde d'eijnde, ende neffens erve ǁ Adriaen Jan Huijbertsz. Leijten dander zijde, Ende alnoch van ende uijt een stuck Ackerlants twee loo[pensaeten] oft daer on ǁ trent inde groote begrijpende, gelegen ter plaetsse voors. neffens erve Cornelis Janss deen zijde, ende neffens ǁ erve Joris Jochems Verschueren, dander zijde, streckende m[et] den eenen eijnde aen erve Cornelis Peter Meeuwens ǁ ende metten anderen eijnde aen erve Hendrick Claes Hendricxsen zoo hij seeghde, vande zelver A[dr]ia[en] coopersse metten ǁ erffrecht te hebbene ende te besittene, ende heeft die voorn. vercoopere den voors. chijns den voorn. Peeteren Tholinck ǁ tot behoeff vanden voors. Anna van Casteren [opgedraegen], ende heeft daer op verthegen helmelinge [inne] manieren inne ǁ dijen gewoonlijck zijnde, geloevende die voors. vercoopere als schuldenaer principael op verbant van zijnen persoon, ende alle ǁ zijne goedens present ende toecoemende, dat hij den voorn. Anna van Casteren vande voors. chijns schuldige ende gerechte zal ǁ doen warantschappe, ende dat hij allen anderen c[om]mer, calaingie ende aentael inde voors. onderpanden wesende oft coemende ǁ der zelver Anna can Casteren aff zal doen geheelijck Ende dat hij oock de voors. onderpanden voor de betaelinge des ǁ voors. chijns der voorn. Anna van Casteren jairlicx daer uijt  als voor te vergelden altijt goet genoch ende weldeugende ǁ zall maecken ende houden, met conditie inne desen toegedaen dat de voorn. vercoopere den voors. chijns ten allen tijden ǁ zall moigen lossen ende quijten tenemaele met [de] somme van twee hondert diergelijcke carolus gulden tsaemen metten ǁ loopenden jaerchijns ende achterstellen alsdan daer van tachter ende onbetaelt staende , behoudelijck dat men desen losch ǁ een halff jaer te voirens wittelijck zal moeten te kennen geven ende opseggen, Getuijgen waeren hier over schepenen ǁ inne s'Hertoigenbossche Otto Copes, ende David vanden Bosch, Gegeven den negensten dach der maent Octobris ǁ int jaer ons heeren duijsent zesthondert eenenveertich

J. vander Meulen

Dorsale aantekening:

Tilborch XI gulden ǁ rente van elf gulden sjaers ǁ tot Tijlborch op Adriaen ǁ Tonis Heerken (?)