's-Hertogenbosch

Henrick sone Willems Claess. heeft mitzdesen geloift op speciael ende reael verbant ǁ van een stuck weylants, groot ontrent twee lopensaten, vierentwintich ende een halve ǁ roeden lants, gelegen inde prochie van Tilborch, ter plaetssen genoemt aenden Hovel, tussen ǁ erve Adriaens sone Cornelis Antoniss. aen deen syde, ende tussen erve Hermans de Roy ǁ aen dander syde, streckende van erve meester Jans de Roy, tot aen de gemeyn straet, ende ǁ daerenboven als sculdenaer principael op verbant van synen persoone ende allen synen ǁ goederen present ende toecomende, heeren Michielen van Oerle prior, ende heer Matheeus Wynants ǁ pensier des Goitshuys oft convents van Tongerloo, tot behoeff desselve Goitshuys, de somme ǁ van vierhondert gulden acht stuyvers twee oirt, elcken gulden tot twintich stuyvers te ǁ rekenen, oft de werde daer voor in anderen sulcken goeden gelde, ende tot sulcker valeur ǁ gelyck als tgelt ten tyde der betalinge, volgende tplaccaet van den hove, opt stuck der ǁ permissie van der munten alsdan tot Bruesselle, tmael gepubliceert sal ganckbaer ǁ wesen, op bamisdach anno XVIC  ende twelff te voldoen ende te betalen, ende in Tilborch ǁ vry van allen commeren ende lasten te leveren, Ende dit ter oorsaken des coops des ǁ stuck lants voorn., Getuygen waeren hier over Scepenen inne Shartogenbossche ǁ Wilhem Oliviers ende Johan van Tulden, Gegeven den vierden dach der maent ǁ Octobris int jaer ons heeren duysent sesshondert ende elff

J. Hees secretaris ǁ Census est inclusus