Tilburg

Anthonis soon Jans Gherit Hermanssoon, heeft gelooft als principael schulder ǁ te gelden, te geven, ende wel te betalen, Matheusen soon wilneren Wouter ǁ Gheritssoon :  Eenen jaerlycken ende erffelycken chyns van seven carolus ǁ gulden, twintich stuyvers oft de weerde derselver in anderen goeden gelde, ǁ als ten tyde des betalinge gemeynlyck loop, ende ganck hebben sal, ende van ǁ hant tot handt goede betalinge wesen sal : Alle jaer te vergelden op onser ǁ vrouwen dach Lichtmisse, ende voorden iersten termyn tot onser vrouwen ǁ dach Lichtmisse nu eerstcomende: uuyt ende van huys, hoff, schuer, ǁ metten gronde, ende toebehoirte, ende der erffenis daeraen liggende ende ǁ daertoe behoorende, tsamen thien loopensaet oft daeromtrent begrypende, ǁ gelegen inder prochien van Tilborch, ter plaetschen geheyten aen t Creyven, ǁ aldaer tusschen erffenis Peeter Gerit Jan Maes Ghenen aen deen zyde, ende deen ǁ eynde, ende tusschen erffenis Embrecht Jan Meussoon aen dander zyde, ǁ streckende metten anderen eynde totter gemeymder strate toe aldaer : Alsoe ǁ hy seyde: Ende heeft gelooft die voorschreven Anthonis op hem selven, ende ǁ op alle syne goeden, hebbende ende vercrygende, den voorschreven chyns te ǁ waren alsmen los ende vry chynsen schuldich is te waren: En dat voorschreven ǁ huys, hoff, schuer metten gronde, ende toebehoirte, ende erffenis daeraen ǁ liggende voorschreven, altyt goet, seecker genoch, ende waeldogende te maecken ǁ als voorde vergeldinge des voorschreven chyns daer uuyt te betalen soo voors. ǁ staet: Ende allen commer ende calaengien daer inne wesende altemael ǁ aff te doen: Behalven een halff mudde roggen erffpachts, ende ǁ dordalffven stuyver grontchyns eerst daer voor uuyt aen diversche personen ǁ verhouwen te wordene: Sonder argelist: Oirconden hebben hierover geweest ǁ Jan Aert Reymbouts ende Cornelis Claessoon van Ghierl, Schepenen ǁ binnen Tilborch ende Ghoorle, die den zegel hens gemeyn schependoms ǁ desen brieffve op en aen hebben doen hangen, inden jare ons heeren ǁ duysent vyffhondert achtenvyftich: Opden sevensten dach der maent ǁ van November:

H de Roy

Dorsale aantekening:

Desen rente brieff is ǁ by testamente ǁ gemaeckt aen den ǁ Heyligengeest in ǁ Tilborch ǁ H de Roy

bevonnist van may 1600 ǁ bevonnist VII october 1611 ǁ bevonnist VI may 1616