Tilburg

Cijns van 2 guldens aan Sint Peter Altaar

Jan soon wilner Hessel Jans, ende Peeter soon wilner Adriaen Lenaerts, als metten haere geordineerde ǁ momboor ende toesiender van Adriaen, Cornelis, Willem, Margriet, ende Jenneken, brueders ende susteren, ǁ ommundige kynderen wilner Peeter Wouters van Hees, daer zy als momboor ende toesiender voorschreven ǁ hen sterck voor maecten ende gelooffden, hebben gelooft uuyten naem vanden ommundigen voorschreven ǁ Anthonise zoon wilner Jan Adriaens, ende Peeteren soon wilner Peeter Andriess, als deckens ende di ǁ recteurs vander gulde, van Sinte Peeters aultair binnen der kercke van Tilborch tot behoeff der zelver ǁ gulde voors., eenen jaerlycken ende erffelycken chyns van twee carolus gulden, twintich stuvers Brabants ǁ oft die weerde der selver in anderen goeden gancbaren gelde voor elcken carolus gulden voorschreven te ǁ reeckenen, alle jaer te betalen op onser liever vrouwen dage Lichtmisse, ende daer aff die selven momboor ǁ ende toesiender voorschreven bekenden dat den tweeden chyns was vervallen ende verschenen tot Lichtmisse ǁ lestvoorleden, dats uuyt ende van huys hoff, schuer metten gronde ende toebehoorte, ende erffenisse daer ǁ aen liggende ende daertoe behoorende, den voorschreven ommundigen kynderen toebehoorende, veerthien ǁ loopensaet oft daer omtrent begrypende, gelegen binnen der parochie van Tilborch, ter plaetse geheyten ǁ aen die hoydzyde inde Moerstraet, aldaer tusschen erffenisse Claes Jan Willems Verschueren die jonge, aen ǁ deen syde. ende tusschen erffenisse Claes Meeussoon Verbunt aen die ander zyde. streckende vande gemeyner ǁ strate, totter erffenisse Laurys Wytman Joostensoon, zoe zy zeyden, Ende hebben gelooft die momboor ǁ ende toesiender voorschreven, onder dat verbant der selver ommundiger kynderen goeden voorschreven ǁ hebbende ende vercrygende, den voorschreven chyns te waeren, gelyc men erffchynsen schuldich is te waeren ǁ ende den voorschreven onderpant altyt goet seecker genoch ende waeldogende te maecken als voor den erff ǁ chyns voors. daer jaerlycx uuyt te vergelden soo voorschreven staet, ende alle commer ende calaengie daer ǁ inne wesende altemael aff te doen, Dus soe sall den voorsschreven chyns ter quytinghe ǁ staen met achtendertichstalven gelycke carolus gulden, wesende dat vierendeel in die  somme van een ǁ hondert ende vyfftich carolus gulden, daer mede dat die voorschreven gulden jaerlycx plach te heffen ǁ ende te beuren, eenen erffpacht van sessentwintich loopen roggen, ende daer inne die selve ommundige ǁ kynderen voorschreven, dat vierendeel plagen te gelden, achtervolgende den brieven, die die voorschreven ǁ gulde daer aff plach te hebben ende hen vermelt ende affhendich gemaect zyn, doen die rebellen ons Edele ǁ heeren des Connigx die kercke alhier tot Tilborch, op den heyligen Pinxterdach spolieerden, welverstaen ǁ oft die ommundige kynderen voorschreven, oft henne nacomelingen in ennigen toecomenden tyde gevonden ǁ dat den voornoempden pacht van sessentwintich loopen roggen, met minder penningen te lossen waeren dan ǁ mette somme van een hondert ende vyfftich carolus gulden voors., dat die selve ommundige kynderen ǁ ende henne nacomelingen daermede gestaen sullen voor soe veele hunnen vierendeel is aengaende dies soo ǁ [dat] zy gehouden syn t selven halffjaer te vooren op te seggen ende wittelyck te vercondigen als zy ǁ oft henne nacomelingen den voornoempden chyns afflossen ende quyten sullen willen sonder argelist ǁ Oorconden hebben hier over geweest scepenen in Tilborch ende in Goorlle Cornelis Claes sone van ǁ Gierlle ende Geeraerdt Henrick Borchmans sone die den segel hoirs gemeyn schependomps desen brieve ǁ op en aen hebben doen hangen, int jaer ons heeren duysent vyffhondert ende achtentseventich opten ǁ tweentwintichsten dach in de meertte, folio 29