's-Hertogenbosch

Adriaen soone wylen Goyaerts Michielss, woonende tot Tilborch, heeft wittelick ende ǁ erffelick vercocht ende vercoopt mits desen, Gerarden vanden Wiel, tot behoeff der taeffelen vanden ǁ heyligengeest, binnen deser stadt sHertogenbossche, Eenen jaerlicken ende erffelicken chyns van neghen ǁ carolus gulden tot twintich stuvers goets gelts elcken gulden gerekent, te betaelen alle ǁ jaer erffelick int hoochtyt van onser lieve vrouwen bootschappen, Ende waeraff den iersten ǁ betaeldach wesen sal, int hoochtyt van onser liever vrouwen bootschap ende nu sestienhondert ende ǁ seventwintich ierstcomende Ende in sHertogenbossche vry van allen beeden ons heeren des Hertoge ǁ exactien, subventien, vyffethiende twintichste, hondertste ende alle andere meerdere ende mindere ǁ penningen commeren schattingen ende lasten gewoonelick ongewoonelick ordinaris extra ǁ ordinaris, ingestelt oft ter avontueren noch naermaels inne te stellene, egheene uutge ǁ scheyden te leveren ende te vergelden, van ende uuyt huys, schuere, hennen gronden, hoff ende ǁ ackerlant dyen aenliggende, groot te samen dryen ende een halff loopensaten, gelegen ǁ onder de parochie ende heerlickheyt van Tilborch, ter plaetssen genoemt Loeffven ǁ tusschen erffve Adams soone Henricx Gieliss, aen deen syde ende metten eenen eynde, ende tusschen ǁ erffven Jans soone Peeter Vernnincx aen dander zyde, streckende metten anderen eynde aende ǁ gemeyn straet genoempt de Lovensche straet, Ende alnochs ende uut een stuck acker ǁ lants, groot omtrent twee ende een halff loopensaten, gelegen onder de voers. parochie ǁ van Tilborch ter plaetssen genoempt tHoude Lot, tusschen de gemeyn straet aen deen syde ǁ ende tusschen erffve Marijkens  weduwe Adriaens Colen, voorgaende wehe Goyaerts Michiels ǁ des vercoopers moeder, aen dander syde, streckende metten eenen eynde aen gemeyn ǁ straet genoempt de Pennincx straet ende metten anderen eynde aen erffve Jan Peeter ǁ Vennincx voorn. ( zoo hy verclaerden)  vander selver taeffele vanden heyligengeest metten ǁ erffrecht te hebbene ende te besittene, ende heeft die voorn. vercooper den voers. chyns den ǁ voorn. vanden Wiel, tot behoeff vander voers. taeffele opgedragen met helmelinge vertij ǁ denisse inne manieren indyen gewoonelick synde, Geloovende de voers. Adriaen vercooper ǁ als schuldenaer principael op verbant van synen persoon ende allen synen goederen parate ende toecomende ǁ dat hy der voers. taeffele vanden voers. chijns schuldige ende gerechte sal doen warantschappe ǁ Ende dat hy allen anderen commer calangie ende aentael inde voers. onderpande wezende ǁ oft comende, der voers. taeffele aff sal doen geheelicken, uutgenomen den grontchyns tot ǁ twee ende eenen halven stuvers aende heere van Tilborch, Eenen pacht van dertien loopen roggen ǁ aende Convent vande susteren van Orttene Ende eenen erffloss chyns van sess gulden vijff stuvers aende voers. ǁ taeffele vanden heyligengeest binnen deser stadt jaerlix van te voorens ende van rechts wegen ǁ uuten voers. onderpande te vergelden staende (zoo hy verclaerde ) Ende dat hij de voorn. onderpande voor de ǁ betaelinge des voers. chyns, der voorn. taeffele jaerlix als voers. staet daer uut te vergelden ǁ altyt goet genochs wel doegende sal maken ende houden, met conditien toegedaen dat de voers. ǁ vercooperen desen voers. chyns van negen gulden tot allen tyden sal mogen lossen ende quyten tsamen ǁ ende tenemael, metter somme van hondert ende vijftich carolus gulden tot twintich stuvers goets ǁ permissie gelts by placcaet gepermitteert elcken gulden te rekenen, Ende  mitten jaerchyns ǁ ende achterstellen die ten tyde vander afflossinge vanden voorn. chyns ten achteren ende ombetaelt sullen ǁ staen, Behoudelick dat men den loss een halff jaer te voorens wittelick sal moeten te kennen ǁ geven ende opseggen, Getuygen waeren hierover schepenen in sHertogenbossche Gerardt van ǁ Horenbeeck ende Nicolaes Donckers, Gegeven den sevensten dach der maent may, int ǁ jaer ons heeren duysent sesshondert ende sessentwintich

G Ruyers Secretaris

Dorsale aantekening:

De rente van negen gulden jaerlicx is aen ǁ mynen handen als Rentmeester vanden Geesthuyse ǁ vanden Heylige Geest gelost door de erffgenamen ǁ van Adriaen Govert Michielss consenterende ǁ dat die ten prothocolle worde gecasseert ǁ deser 23 marty 1641

H de Bitter ǁ 16h41

Tilborch ǁ IX carolus gulden ende is geldende Adriaen ǁ Goyart Michielssen tot Tilborch op ǁ loeffven