's-Hertogenbosch

Jan ende Adriaen gebroederen zoonen wylen Corstiaens Antonissen van Bardwyck beyde woonende tot Tilborch, hebben tsamentelick ǁ ende elck van hen besundere, wittelick ende erffelick vercocht Peteren Janssen Mutsarts tot behoeff des eerwerdige heere prelaets ende Goidtshuys van ǁ Tongerloe, eenen jaerlicken ende erffelicken chyns van derthien ende eenen halven Carolus gulden tot twintich stuvers goets gancbaers gelts elcken gulden ǁ gerekent, te betalen alle jaer erffelycken op den sestiensten dach der maent van february, ende voor den iersten termyn van betalinge den sestiensten dach der ǁ maent february, anno sestienhondert ende vyffentwintich, ende binnen der stadt van sHertogenbossche vry van alle beden ons heeren des hertoge, exactien, ǁ subventien, thiende, twintichste, honderste, mindere ende meerdere penningen, commeren, scattingen, ende lasten ordinarisse, extraordinarisse, gewoonlycke ǁ ongewoonlycke, ingestelt off alnoch naemaels ingestelt te wordden, egeene lasten vuytgescheyden te leveren ende te vergelden, van ende uuyt ǁ eene coyweyde des voors. Jans Corstiaenssen, thien lopensaet lants oft daerontrent begrypende, gelegen binnen der prochie van Tilborch ter plaetse ǁ genoempt aen tVen, neffen erffenisse van onser Liever Vrouwe tot Tilborch aen beyden syden, streckende met den eenen eynde aende gemeyn straet ǁ ende met den anderen eynde aen erffenisse Henricx Anthonis Cauwenberchs, ende alnoch van ende uuyt een stuck weyvelts, des voorscreven Adriaens ǁ Corstiaens, twee lopensaet lants oft daerontrent groot wesende gelegen binnen der prochie van Tilborch voors. aende velthoven, neffen de ǁ gemeyn straet aen deen syde ende deen eynde, ende neffen erve der kynderen Willems Hoecken aen dander syde, streckende met den anderen eynde tot ǁ op erffenisse Jans Hermans, soo hy verclaerde, van den selven Eerwerdige heeren prelaet ende Goidtshuyse metten erffrecht te hebben ende te besitten ende ǁ hebben die voorn. vercoopers denselven chyns den voors. Peteren Janssen Mutsaerts tot behoeff vander voors. Eerwerdige heere prelaet ende Goidtshuyse ǁ opgedragen, met helmelinge vertydenisse inne manieren indyen gewoonlyck synde, Gelovende die voors. vercooperen als schuldenaren principael ǁ onverscheyden ende een voor all, onder verbant van henne persoonen ende alle henne goedens present ende toecomende dat sy den voors. eerwerdige ǁ heere prelaet ende Goidtshuyse vanden selven chyns schuldige ende gerechte sullen doen warantschappe, Ende dat sy allen anderen commer ǁ calaingie ende aentael inde voors. onderpanden wesende oft comende denselven Eerwerdige heere prelaet ende Godtshuyse aff sullen doen geheelyck, ǁ uuytgenomen vier ende eenen halven stuyvers sheeren chyns, uuyt het voors. ierste onderpant, ierst jaerlicx van rechts wegen te vergelden staende soo ǁ sy verclaerden, Ende dat sy de voors. onderpanden voorde betalinge des voors. chyns den voorn. Eerwerdige heere prelaet ende Godtshuyse jaerlicx ǁ als voors. staet daeruuyt te vergelden altyt goet genoch ende welduegende sullen maecken ende houden, met conditie inne desen toegedaen dat ǁ die voors. vercooperen, denselven chyns sullen mogen lossen ende quyten tot allen tyden teffens ende ten eenenmale met de somme van tweehondert ǁ ende vyffentwintich Carolus gulden, tot twintich stuvers goets permissie gelts elcken gulden gerekent Ende metten jaerchyns ende allen achterstellen ǁ alsdan ten achteren ende ombetaelt staende, behoudelyck dat men den voors. loss schuldich ende verbonden sal wesen een halff jaer te voorens wittelyck te ǁ vercondigen ende opte seggen, Getuygen waren hier over scepenen inne sHertogenbossche Jacob Vercuylen ende Guilliaem dAbsolours, Gegeven ǁ den sestiensten dach der maent february, int jaer ons heeren dusent sesshondert ende vierentwintich

[***] Dankers

Linkermarge:

desen brieff ten prothocolle doen casseeren ǁ den 8en januarii 1657 ende daervan betaelt ǁ negen stuijvers

Dorsale aantekening:

Ick ondersgecreven rentmeester van Tongerloo ǁ bekenne midts desen dat de rente int ǁ witte van desen naeder verhaelt aen mij als ǁ rentmeester van Tongerloo voor ǁ voor capitael ende sesse jaeren [ac]hterstels ǁ bedragende tsamen drijehondert ende ǁ sesse gulden is gelost, ende dat ǁ deselve ten prothocolle dijenvolgende ten ǁ versuecke van Adriaen van Bardwijck ǁ een vande momboiren vande kinderen ǁ Jans Corstiaens van Bardwyck als bij hem ǁ voldaen ten prothocolle is gecasseert ǁ datum 4 januarij 1656 oirconde etcetera

J van Velde ǁ 1657

voorde cassatie bijden ǁ voors. van Bardwijck ǁ betaelt negen stuijver

Jan Corstiaen van Bardwyck XIII ǁ gulden tot Tilborch