's-Hertogenbosch

Peeter zone Jans Janssen Kauwenberchs woonende tot Tilborch heeft wittelijck ende erffelijck vercocht ende vercoopt midts desen Peteren, ǁ Janssen Mutzarts van Tilborch tot behoeff van Willemen Cornelissen Horevoirts oick woonende tot Tilborch Eenen jaerlicken ende erffelicken chijns van derthien carolus gulden ǁ tot twintich stuvers elcken gulden goets gancbaers gelts gerekent, te betaelen alle jaer erffelijck inden hoochtijde van onse liever vrouwen lichmisse, Ende voirden ǁ ijersten termijn van betaelinge inden hoochtijde van onse liever vrouwen lichmisse anno XVIc, ende achthien. Ende binnen sHertogenbossche vrij van allen beden ǁ ons heeren des hertochs, soo thiende, twintichste, honderste, als allen andere meerdere oft mindere peningen commeren scattingen ende lasten ordinarisse extra ǁ ordinarise innegestelt ofte bij avontueren naermaels innegestelt te worddene egeene lasten uutgesceijden te leveren ende te vergelden, van ǁ ende uut huijsinge, erve, hoff, boomgaert, ackerlandt ende groeslandt dijen aen eenen plache aenliggende groot tezaemen ontrent twelff ǁ lopenzaten gelegen inder parochie van Tilborch ter plaetsche genoemt aenden Hovel neffen erve Willems Aertssen Piers d'een zijde, ende neffen erve ǁ meester Jans de Roij scouteth tot Tilborch d'ander sijde, streckende met d'een eijnde aende gemeijne straete ende met d'ander eijnde aen erve Willems Aertsz. Piers voorn. ǁ zoo hij verclaerde, vanden zelven Willemen Corneliss metten erffelicken rechte te hebben ende te besitten, ende heeft den voirss. chijns die voirn. vercooper den ǁ voirschreven Peteren ten behoeve vanden voirn. Willemen Horevoirts opgedragen met helmelinge vertijdenisse in maenieren in dijen gewoonlijck zijnde ǁ Gelovende de voorn. vercooper als sculdenaer principael, op verbant van zijnen persoon ende allen zijne goederen present ende toecoomende, dat hij den ǁ voirn. Willemen vanden voirss. chijns schuldige ende gerechte sal doen warantscappe, Ende dat hij allen anderen commer, calainge, ende aentael inde voirss. ǁ onderpande wesende oft coomende den voirn. Willemen aff sal doen geheelijck. Uutgenomen eenen chijns van vijff gulden aen d'Abdije van Sinte Gertruijt tot ǁ Loven, ende eenen stuver grontchijns aenden heere van Tilborch jaerlijck  van te vorens ende van rechts wegen uut den voirss. onderpande te ǁ vergelden staende, met alnoch eenen pacht van twee vaeten roggen, aen zeker altaer inder kercke tot Tilborch, zoo hij zeede, Ende dat hij de voirss. ǁ onderpande voirde betaelinge des voirss. chijns den voirn. Willemen Horevoirts jaerlicx daer uut soo voirss. staet te vergelden altijt goet genoch ende wel ǁ duegende sal maecken ende houden. Met condicie inne desen toegedaen, dat de voirn. vercooper desen voirss. chijns van derthien gulden ten allen tijden sal ǁ mogen lossen ende quijten ten eenenmaele met de somme van tweehondert dergelijcke Carolus gulden. Ende metten jaerchijns ende achterstellen ǁ ten tijde der afflossinge vanden voirss. chijns vervallen ten achteren ende onbetaelt staende, Behoudelijck dat de voirn. vercooper desen loss een halff ǁ jaer te vooren wittelick sal vercondigen ende opseggen. Getuijgen waeren hier over scepenen in sHertogenbosche Henrick Franssen van Gestel ǁ ende Jan Bardoul Gegeven den lesten dach der maent Januarij int jaer ons heeren duijsent sess hondert ende seventhien

A.van Heesen substituut secretaris ǁ Litera Willelmi

Dorsale aantekening:

numero IX ǁ Peter Janss. Cauberchs ǁ tot Tilborch XVI gulden ǁ 1617