Den Haag

Ghijsbert sone wijlen Marten Daniels ende woonende tot Tilborch, als wittich ǁ man ende momboir zoe hij seeghde, van Zijken zijne huijsvrouwe dochtere Jan Huijben Peeterss., heeft ǁ wittelijck ende erffelijck vercocht Johan vander Meulen, tot behoeff van Heijlwich Eijmbertss. vande Borcht ǁ eenen jaerlicken ende erffelijcken chijns, van achtien carolus gulden ende thien stuvers, tot twintich stuvers goets ǁ gancbaer gelts elcken gulden gereeckent, te betaelen alle jaer erffelijck inden hoochtijde van ons Lieve ǁ Vrouwe Lichtmisse, ende voorden iersten termijn van betaelinge inden hoochtijde van ons Lieve Vrouwe ǁ Lichtmisse sestienhondert eenenveertich, ende binnen der stadt Shertoigenbossche, vrij van alle beeden, exactien ǁ subventien, tiende, twintichste, honderste, meerdere ende mindere penningen, commeren, schattingen ende lasten, egeene ǁ uijtgescheijden te leveren ende te vergelden, van ende uijt huijs erve hoff schuere, henne gronden, ende andere ǁ timmeragien daer toe behoorende thien loopensaeten oft daer ontrent groot zijnde, gelegen inde voors. parochie ǁ ende heerlijcheijt van Tilborch, tussen erve Jans Peeters, d'een zijde, ende tussen erve Jans Janss. Adriaenss. ǁ d'ander zijde, streckende voor vande gemeijnen straet achterwaerts tot aen erve Joost Hens Deniss., Ende ǁ alnoch van ende uijt eenen acker teulants vier loopensaeten oft daer omtrent groot zijnde gemeijnlijck genoempt ǁ Goorken, gelegen binnen der parochie voors. tussen erve Jans Lappen deen zijde, ende tussen erve Cornelis ǁ van Gilsen, dander zijde, streckende van erffenisse der Abdije van Tongelre tot op erffenisse Jans ǁ Lappens voors., zoe hij seegde, vander zelver Heijlwich metten erffrecht te hebbene ende te besittene ende ǁ heeft die voorn. vercoopere den voors. chijns den voorn. Johan vander Meulen tot behoeff vande voors. Heijlwich ǁ vande Borcht opgedraegen, met helmelinge verthijdenisse inne manieren inne dijen gewoonlijck zijnde, Ge ǁ loevende die voors. vercoopere als schuldenaer principael op verbant van zijnen persoon ende alle zijne ǁ goedens present ende toecomende, dat hij der voirn. Heijlwich vande Borcht vande voors. chijns schuldige ǁ ende gerechte zall doen warantschappe, ende dat hij allen anderen commer calangie ende aentael inde ǁ voors. onderpanden wezende oft coemende der zelver Heijlwich vande Borcht aff zal doen geheelijck ǁ uijtgenomen vierentwintich gulden jaerlicx aen t'groot gasthuijs, uijt d'ierste onderpant ierst jaerlicx ǁ met rechte daer uijt te vergelden, ende dat hij oock de voors. onderpanden voorde betaelinge des voors. ǁ chijns der voorn. Heijlwich vande Borcht jaerlicx daer uijt als voors. staet te vergelden, altijt goet ǁ genoch, ende weldeugende zall maecken ende houden, met conditien inne desen toegedaen, dat de voors. ver ǁ coopere den zelven chijns sall moegen lossen ende quijten, tot allen tijden teffens ende ten eenenmaele metter ǁ somme van drijehondert der gelijcke carolus gulden, ende metten jaer chijns ende achterstellen ten tijde der afflossinge ǁ ten achteren ende onbetaelt staende, Behoudelijck dat men den voors. loss schuldich ende verbonden zal wesen ǁ een halff iaer te voirens te vercondigen ende op te seggen, Getuijgen waeren hier over schepenen inne ǁ S'hertoigenbossche, Dierck van Hoorn, ende Henrick Tielemans, Gegeven den dertichsten dach der maendt ǁ Januarij int jaer ons heeren duijsent sesshondert ende veertich.

J. vander Meulen ǁ Littera Heijlwigis

Dorsale aantekening:

Tilborch ǁ Alhoe wel den inhoudt ǁ van desen brieff luijdt ǁ van drije hondert gulden ǁ capitael, is nochtans bij de ǁ voors. Heijlwich [***] ǁ geschooten twee hondert ǁ gulden capitaels, sulcx ǁ dat den selven confirmant ǁ maer jaer ende in plaetse ǁ vande [***] achtien gulden [***] ǁ twelff gulden [***] ǁ Heijlken Eijmberts

Heijlken Eijmberts vande ǁ Borcht heeft bekent, dat ǁ Jan Cornelis Ghijsberts als ǁ momboir over d'onmondige ǁ kinderen Ghijsbert Marten ǁ [Daniels] woonachtich