Oisterwijk

Pauwels, Henrick ende Cornelis gebruederen sonen wijlen meester Henricx Zwijsen bij den selven meesteren Henricken ǁ ende bij Geertruden sijnre huijsvrouwe dochtere wijlen Pauwels Heijen tsamen verwect Cornelis sone Cornelis ǁ Claess. van Ghierl als man ende momboir Catherijne sijnre huijsvrouwe ende Jan Corneliss. als man ende momboir ǁ Aleijden sijnre huijsvrouwe gesusteren dochteren wijlen meester Henricx ende Geertruden voirgenoemd hebben underlingen ende met ǁ malcanderen gedaen ende gemaeckt een erffdeijlinge ende erffscheijdinge van den goeden naebescreven henluden tsamen ǁ in een andere erffdeijlinge bij hen tegen Janne Henrick Swagemakerss. jegewoirdige man ende momboir der voirs. Geertruden ǁ hender moeder voir schepenen van Tilborch gedaen te deele gevallen ende erffelijck aengecomen zijnde als zij zeden ǁ Overmidts welcker erffdeijlinge ende erffscheijdinge soe is den voirs. Henricken te deele gevallen ende erffelijck ǁ aengecomen een stuck lants genoempt tBosch seven lopensaeten lants oft daeromtrent begrijpende gelegen inde prochie ǁ van Tilborch aen den Berckdijck tusschen erffenisse der erffgenaemen Huijbert Nauwen aen deen sijde ende tusschen erffenisse Heijlken Martens ǁ aen dander sijde Noch een stucxken eckerlants vijff vierdel vaetsaet lants off daeromtrent begrijpende gelegen ǁ inde prochie voirs. aent Laer tusschen erffenisse Henrick Lauwen aen deen sijde ende tusschen erffenisse Jenneken Vrancken aen dander ǁ sijde noch vijffentwintich stuvers tsiaers op erffenisse Jans van Nerven ende noch vijffentwintich karolus gulden eens te bueren ǁ van Cornelissen van Gierl hier tegen deijlende Op welcke goeden tsamen op alle schepene letteren daer af gewach ǁ doende tot behoeff des voirs. Henrix hebben die andere mede deijlderen wettelijck ende erffelijck verteghen ǁ helmelinge in manieren in dijen gewoenlijck sijnde Gelovende de voirs. deijlderen op hen ende op alle henne ǁ goeden hebbende ende vercrijgende dese erffdeijlinge ende dit verthijen malcanderen ende elck deen den anderen ǁ vast ende stedich te houden ten eeuwigen dagen sonder ennich wederseggen Getuijgen waren hier vuer schepenen in ǁ Oisterwijck Anchem Wouterss. van Esch ende Andries Jan Wijtmanss. die huere segelen in getuijgenisse hier aen ǁ hebben gehangen opten vijffsten dach van den Aprill int jaer ons Heeren duijsent vijffhondert sess ende tseventich.