Vindplaats van het origineel
Regionaal Archief Tilburg, toegangsnummer 1428, Charterverzameling Tilburg (en Goirle, Berkel-Enschot en Udenhout), inv.nr. 204
21 april 1573
Samenvatting oorkondetekst
Akte van machtiging, gepasseerd voor schepenen van ’s-Hertogenbosch, door Franchoijs van Hanenberch, zoon van wijlen Walraven van Hanenberch, raadsheer te ’s-Hertogenbosch, van Goossen Peterss. van Engelen, om voor schepenen van Tilburg aan Anthonis Nauwen Peterss., priester en cantor te Hilvarenbeek, en Pauwels Peters Mutzaertss. van den Schoot moerland met gronden, gelegen ter plaatse genaamd de Branden, te Tilburg, over te dragen.
Transcriptie
Wij Jan vander Stegen ende Henrick van Broechoven scepenen inne Shertogenbossche doen condt eenen ijegelijcken dat op huijden date ǁ van desen voor ons inne propren persoone verscenen ende gecompareert is meester Franchoijs van Hanenberch soone ǁ wilner Walravens van Hanenberch onse mede raadtsheer, Ende heeft deselve mits dese geconstitueert ende mechtich ǁ gemaect Goossen Peterss. van Engelen absent als present in sijnen wittigen facteur ende procureur, Gevende ende verleenende ǁ denselven oipelicken midts desen vrij irrevocabile macht auctoriteijt ende sunderlinge bevele inne sijns constituans ǁ name ende van sijnen twegen te compareren voor schepenen van Tilborch ende aldaer te vesten transporteren ende ǁ opte dragen tot behoeff heerens Anthonissens Nauwen Peterss. priester ende cantor tot Beeck, ende Pauwelssens ǁ Peters Mutzaertss. vanden Schoot vijff loopensaet moerlants met haeren grondt off daeromtrent in eenen camp ǁ van twelff loopensaet mitsgaders alnoch den geheelen gront vande andere seven loopensaet inden selven camp ǁ ofte in alsulcker grooten als den voirs. camp gelegen is inde prochie van Tilborch voirs. ter plaetsen genoempt ǁ de Branden tussen erffenisse Michiel Rassart ende Daem Corneliss. aen deen sijde, ende tussen erffenisse des ǁ voirs. meester Franchoijssens ter andere sijde, Inde veste warantscappe ende alle andere nootelijcke vertijdtnissen ǁ ende geloeften onder verbant van alle sijns constituants goeden present ende toecomende te geloven ende te doene ǁ de penningen hier van comende tontfangen vanden ontfanck quijtancie te geven ende quijtstellinge te doen ǁ ende voirts generalicken ende specialicken allet daer inne ende mede te doen ende voirderen dat hij ǁ constituant selver present ende voir oogen wesende soude kunnen oft moegen doen ende voirderen, alwaert ǁ oock alsoo dat die saecke voirs. naerder breeder oft speciaelder beveel behoeffden dan voirs. staet, Gelovende ǁ die voors. meester Franchoijs inne goeder trouwen onder verbant van sijnen persoon ende alle sijne ǁ goedens hebbende ende vercrijgende eeuwelicken vast stedich ende werdende te houden sonder ennich tegen ǁ seggen allen tgene ende soo wes bijden voors. geconstitueerden in tgeens voirs. staet gehandelt gedaen ende ǁ voirts gebeert sal worden, ende denselven van alle costen ende scaeden hier omme te doen ende te lijdene ǁ tegens eenen ijegelijcken geheelijcken te quijteren releveren ende schaedeloes te ontheffen ende houden, behoudelijcken ǁ nochtans dat die voors. geconstitueerde dees gehouden ende verbonden sijn sal altijt ten versoecke des voirs. ǁ meester Franchoijssens te doene van sijnen ontfanck administratie ende beweijnde goede wittige legael rekeninge ǁ bewijs ende reliqua in kennisse der waerheijt soo hebben wij scepenen voirs. onse zegelen hierbeneden aen desen ǁ brieff doen hangen, Gegeven den eenendetwentichsten dach der maent aprilis, int jaer ons heeren duijsent ǁ vijffhondert drie ende tzeventich nae paesschen