Tilburg

Jan zoon wilnere Peeter Vrancken als man ende momboor van Marien zyn huysvrou(w), dochter wilner Jan Michiell Quaps, heeft gelooft als een prin ǁ cipael schulder te gelden, te geven ende wel te betalen, Cornelise zoon Henrick Geerit Smoelders eenen jairlycken ende erffelycken chyns van ǁ eenendertich stuvers, een oort, alle jair te vergelden op onser liever vrouwen dach Lichtmisse ende, voorden eersten termyn ende dach ǁ van betalinge, van lichtmisse nu naestcomende over een jaer, uuyt ende van eenen stuck ackerlants van seven loopensaet oft dair ǁ omtrent begrypende, gelegen binnen der parochie van Tilborch ter plaetse geheyten aen Coningxvaert in Corvelacker, aldair tusschen ǁ erffenisse der kynderen Jan Jan Michiell Quaps deen zyde, ende tusschen die gemeynte van Tilborch dander zyde, streckende vande ǁ gemeynder herbane totter erffenisse der wedue Lenaert Adriaen Mutssairts, metten kynderen zoe hy zeyde, Ende heeft gelooft ǁ Jan voors. als principael schulder op hem selven ende op alle zyne goeden hebbende ende vercrygende, den voors. chyns te waren ǁ gelyc men erffchynsen schuldich is te waren, ende den voors. onderpant altyt goet zeecker genoch ende waeldogende te maken ǁ als voorden chyns voors. daer jairlycx uuyt te vergelden soo voorschreven staet, ende allen commer ende calaengie daer inne ǁ wesende altemael aff te doen den selven, Oorconden hebben hier over geweest schepenen in Tilborch ende in Goorlle Jan de ǁ Witte Janssone ende meester Robert van Nerven Gerardtssone, die den segell hoirs gemeyn schependoms desen brieffen op en ǁ aen hebben doen hangen, int jaer ons heeren duijsent vyffhondert ende eenentseventich, Opten negenthiensten dach ǁ in November folio 1