Tilburg

Wij Berthoult Back schouteth der heerlicheijt van Tilborch ende Ghoirle Cornelis Claess van Ghierll,  Peeter Peeter Jan Martens., Adriaen Peeter Andries., Geraerdt Jan Berijs van ǁ Oerl, ende Michiel Goijaerts. de Vet schepenen, Henrick Jans. Vermeer, Michiel Dielis Swagemakers, ende Peeter Adriaen Cornelis. van Spaendonck borgemeesteren, binnen der ǁ heerlicheijt ende prochie van Tilborch voirs. voir ons selven ende mede uuten name, voirden gedeputeerden vanden herdtganghen ende andere der meeste geerffde ende gegoede der prochie ǁ voirs., representerende de geheele gemeijnte, Maken condt allen den ghenen die dese letteren sullen sien of hoiren lesen, doen te wetene dat wij om te verhueden, te voircomen ende ǁ te betalen, alle die onverdraghelijcke costen ende andere lasten, die wij daghelijcx soe langher soe meer, ter saken vande tachterheijt vande ordinaris beden of de geassingneerde ǁ vanden Rentmeester Jacop Bax sijn supporterende ende lijdende, hebben met consent wille ende overdraghen van alle die goede luijden ende gemeijne ingesetenen van Tilborch ǁ voirs., die wij daeromme tot seeckeren grooten getalen hebben doen vergaderen, ende over sulcx met henne vrijen weete ende wille sijn vervanghende uut crachte vande procuratie ǁ respective opden vijff ende twintichsten dach in october lestleden gepasseert sijnde, hebben gelooft ende gelooven midts desen Raes sone wijlen [***] van Grevenbroeck ǁ schouteth tot Venloon, seven jaelijcken ende erffelijcken chijns van vier ende twintich karolus gulden twintich stuveren oft die weirde der selver in anderen goeden ǁ ganckbaren gelde gelijck ten thijdt der betalinghe gemeijnlijck cours ende ganck sall hebben ende van hant tot hant goede betalinghe wesen sall voir elcken karolus gulden ǁ voirs. te rekenen, op ons ende op alle onsen ingesetenen goeden ende dat om een somme van penninghen die ons vande voirs(chrven) Grevenbroeck wel ende getrouwelijk gelevert ǁ ende ten dancke betaelt is, den lesten penninck metten ijersten, ende die welcke bij ons in notoirbaren oirbaer ende openbaeren laste des dorps ende prochie voirs. bekeert ǁ ende verleijdt sijn geweest, welcke voirs. rente van vier ende twintich karolus gulden wij alle ende die ingesetenen deser prochien van Tilborch voirs., ende elck van ons besundere een ǁ voir all als principael schulders gelooft hebben ende gekomen gesamenderhant bij onser trouwen ende seeckerheijden den voirs. Grevenbroeck of den thoonder van desen brieve, alle ǁ jaer te gelden ende te betalen inden hoochtijde vanden heijlighen kersdach opden xxven dach in december, waer aff den iersten termijn ende dach van betalinghe sal sijn ǁ ende vervallen van nu te kersmisse ijerstcomende over een jaer, inden jare vijffthienhondert drije ende tachtentich, vrij, vranck, ende onbecommert van alle lasten ǁ exactien schaden ongelden vijffsten thienden hondertsten penninghen beden ordonnaris ofte extraordinaris die daer op in ennighen thijde ennichsins tot nadeel vande voirs. ǁ Grevenbroeck geseet, geeijscht of gevonden souden moghen worden in ennigher manieren, met voirwaerden ende conditie hier inne toegedaen, dat wij ende onse ǁ nacomelinghen die voirs. rente van vier ende twintich karolus gulden sullen moghen afflossen quijten ende vrijen altijt inden hoochtijde van kersmisse voirs., metter somme van ǁ drijehondert gelijcke karolus gulden tot alder tijde, alst ons oft onsen nacomelinghen believen sal tsamen metter jaerchijns ende alle den achterstelle, alsdan ten achteren ende ǁ onbetaelt staende, Dies salment inden hoochtijde van alderheijlighen te voiren op seggen ende wettelijck vercondighen, alsmen tot korsmisse daer nae den voirs. los ǁ sal willen ende begheiren te doen, Wel verstaende nochtans oft die voirs. Raes van Grevenbroeck oft den houder van desen, recht oft actie totte voirs. rente hebbende ǁ teijnden die twee ijerstcomende jaren de hooft penningen der voirs. rente begheiren geleet oft anderssins gerestitueert te hebbende, dat in dijen gevalle wij ende onse ǁ nacomelinghen schuldich ende gehouden sullen sijn, die voirs. drije hondert karolus gulden te restitueeren oft wederomme te gheven, ende te betalen met gelde alsdan gepermitteert ǁ ende van hant tot hant gancbaer sijnde, behoudelijck insgelijx tot alderheijlighen te voirens op te seggen als de restitutie ende betalinghe voirs. tot kersmisse ǁ daer nae gedaen sal moeten wesen, Ende alle die voirs. voirwaerde, conditien, ende restrictien, geloven wij alle gesamenderhant onverscheijden ende elck een voir all als ǁ principael schuldenaren bij onser trouwen, eeren ende seekerheijden te volvueren te voldoen ende te betalen ende daer tegens nijet te comen noch te doen met egheenen ǁ rechten geestelijcke oft weirlijcke bij ons selven oft bij ijemanden anders van onsen tweghen, gelovende insgelijcx innegevalle van rechtvoirderinghe ons daer tegen ǁ nijet te opponeren ten sij dat wij ijerst ende voir all genamptizeert ende voldaen sullen hebben volghende dese onse geloofte, ende daer voir verbijndende wij ons selffs persoonen ǁ ende die van onsen nacomelingen alle onse ende huere goeden beijde have ende erve, ruerende ende onruerende, die wij nu hebben oft namaels vercrijghen sullen tot wat ǁ plaetsen die gelegen sijn, oft bevonden sullen moghen wordden, voir alle heeren ende richteren te becommeren ende alsoe te bedwinghen dat die betalinghe der voirs. rente ǁ ende andere voirwaerden wel ende getrouwelijck onderhouden moghen wordden, Submitterende stellende ende verbijndende midts desen onse persoone ende allen onse goeden ǁ ruerende ende onruerende onder ende tot heerlijcke ende reele executien van allen heeren hoven ende richters omme den houderen van desen brieve inne henne rechtvoirderinge ǁ behulpelijck te sijne, ende goet, cort, onvertoghen recht te laten geschieden, renunchuerende ende verthijende tot dijen op alle privilegien, vrijheden van merckten gratien ǁ gunsten letteren van behulp van geestelijcken oft weirlijcken rechten, ende sunderlinghen den rechte seggende dat generale renunchiatie van egheenen weirden en is, daer en ǁ sij ijerst speciale renunchiatie voir gegaen, renunchierende ende verthijende noch voirts op alle andere exceptien van rechte ofte van nijeuwe vonden, hoedanich die wesen mochten ǁ ofte bedacht souden moghen wordden, Die ons oft onsen nacomelinghen oft elck van ons te hulpe en den houder van desen brieve tot achterdeel souden moghen comen ǁ in ennigher manieren, Ende oft gebuerde dat bij ennight ongevalle desen brieff, versuijmpt, verschuert, verbrant, verlooren oft in ennigher manieren verronckeloost ǁ wairdt ende den voirs. Grevenbroeck onder sijnen eede verclairden, in goeder trouwen dat den selven brieff versuijmpt oft verlooren ware, Soe geloven wij dese ǁ letteren te vernijeuwen ende in sijnen handen ende bewaernisse wederomme te leveren, Ende want wij schouteth schepenen borgemeesteren gedeputeerde vande heirtgangen ǁ ende gegueden der prochien van Tilborch voirs(chreven, uuterlijck willen ende begheiren, alle dese voirs. voirwaerden onverbreekelijcken vast ende gestentich te houden ende bij ǁ onsen nacomelinghen gehouden te werdden in alremanieren soe voirs. staet, Soe hebben wij schepenen voirs. over ons selven ende voirts over onsen schouteth ǁ borgemeesteren, gedeputeerde van den hertganghen ende gegueden der prochie voirs., die ons daer om gebeden ende versocht hebben, om dat sij luijden egheen eijgene ǁ segelen en gebruijcken, ende voirt over alle onse nacomelinghe, den seggel ons gemeijn schependoms desen letteren open aen doen hanghen, Gegevenen binnen ǁ Tilborch opten twintichsten dach van december, int jaer ons heeren duijsent vijffhondert twee ende tachtentich

J de Roij  [***] ǁ 1582

Dorsale aantekening:

Dit is den brief van 24 gulden ǁ tsiaers op Tilborch gecoft ǁ den iersten augustus [***]