's-Hertogenbosch

Peeter Adriaenssz van Ghilze voor schepen der heerlicheijt Tilborch ende Cornelis Henricxz van ǁ Heijst borgemeesters der selver heerlicheijt, hebben gesamenderhandt ende ijegelijcx van hen int besondert, wittelick ende erffelick vercoft ende vercooper midts dese Balthasar ǁ Donckers coopman van wullenlaeckenen sone wijlen Jans Nicolaessen Donckers ee[nen witte]licken ende erffelicken chijns van Eenendertich carolus gulden ende vijff stuijvers, ǁ elcken gulden tot twintich stuijvers goets gelts gerekent, te betaelen alle jaer erffelick int hoochtijt van Sinte Michiel Archangel, Ende voor den iersten termijn van ǁ betaelinge vanden hoochtijde van Sinte Michiel des Archangels ierstcommende v[***]en jaer, Ende binnen der stadt S'Hertogenbossche van alle bede ons heere des hertoge ǁ exactien, subventien, vijffde, thiende, twintichste, hondertse, ende alle andere meerdere ende mindere penningen, commeren, schattingen ende lasten, ordinarisse, extraor ǁ dinarisse, gewoonlicke, ongewoonlicke, innegestelt ende ter avontueren noch naemaels innegestelt te wordden, egeene uutgescheijden vrij te leveren ende te ǁ vergelden, van ende uut een stuck beempts des voors. Peeters vercoopers, acht loopensaeten lants oft daeromtrent, groot zijnde, gelegen inde parochie van Tilborch ter ǁ plaetsse geheeten Achtermall, beneffens den erve toebehoirende den heere van Duffele westwaerts aen deene zijde, ende oock metten eenen eijnde, ende beneffens ǁ den erve des voors. Cornelis Henricxe van Heijst aen d’ander sijde, streckende metten anderen eijnde aen erffenisse Wouters sone Wouters Berten, ende alnoch van ende ǁ uut een stuck weijlants den voorn. Cornelissen vercooper competerende vier lopensaten lants oft daeromtrent begrijpende, gelegen inde parochie voirs., ter ǁ plaetsse geheijten int Kerckven metter eenre zijde tussen erffenisse Joost Ghijsberts oostwaerts, ende metter andere zijde westwaerts tussen eene ǁ gemeijne stege, streckende mitten eenen eijnde aen eenen gemeijnen waterlaet, ende metten anderen eijnde aen eene gemeijne straete aldair, zoo zij verclaerden, ǁ vanden selven cooper mitten erffrecht te hebbene ende te besittene, ende hebben die voors. vercooperen den voorn. chijns den voors. cooper opgedraeghen met ǁ helmelinge verthijdenisse inne manieren inne dijen gewoonlijck sijnde, Geloevende de voors. vercooperen als schuldenaeren principael onverscheijden ende een ǁ voor all op verbant van henne persoonen ende allen henne goederen present ende toecomende dat zij den voorn. cooper vanden voors. chijns schuldighe ende gerechte sullen ǁ doen warantschappe, ende dat zij allen anderen commer, calaengie, ende aentael inde voors. onderpanden wesende oft commende den selve cooper aff sullen ǁ doen geheelicken, uutgenoemen eenen erffelicken chijns van twee ende eenen [ha]lven stuver aenden bisdomme deser stadt, van ende uijt den ierstgenoempden ǁ stuck beempts des voirs. Peeters jairlicx van te voorens ende van rechtswegen te vergelden staende, soo sij verclaerden, ende dat zij den voors. onderpanden ǁ voorde betaelinghe des voors. chijns den voorn. cooper jaerlicx daer uut soo voors. staet, te vergelden, altijt goet genoech ende welduegende sullen maecken ende ǁ houden, Getuijghen waeren hier over schepenen inne sHer[togenbos]che Gerardt van Horenbu[rg] ende Rombout Rombouts, Gegeven den ǁ vierendetwintichsten dach der maent Septembris int jaer ons heeren duijsent sesshondert tweeendetwintich

G Ruijs Substituut Secretaris

Dorsale aantekening:

Den chijns van XXXI gulden voors. int wit van desen ǁ begrepen, is bij Cornelis Henricx ende van Heijst ǁ gewesene borgemeesteren van Tilborch, inden hoochtijde ǁ van Sinte Michiel Archangel lestleden aen [***] ǁ Balthazar Donckers aff gelost ende gequeten, soo dese ǁ Balthazar dat verclairde ende bekende mits desen. ǁ Actum den XXVIIIen November anno XVIc ende XXIIIIte ǁ G Ruijs Substituut Secretaris

Zevendartich gulden vijff Stuijvers ǁ jaerlijckx tot Tilborch ǁ verschijnt op Sente Mecghiels ǁ dach te lossen met vijff ǁ hondert gulden premessij ǁ gelt ǁ XXXI gulden V stuijvers