's-Hertogenbosch

Alsoe Bartholt Back, Schouteth der heer[l]icheijt van Tilborch, ende Goirle, Cornelis Claass. van Gierl, Peter Peeter Jan Martess., ǁ Adriaen Peeter Andriess., Gerit Jan Beris van Oirl, ende Michiel Goijartss. de Vet, Scepenen Henrick Janss. Vermeer, Michiel ǁ Dieliss. Wagemaeckers, ende Peeter Adriaen Corneliss., van Spaendonck, borgemeesteren, binnen der prochie ende heerlicheijt van Tilborch ǁ voirs., voir hen, ende mede uuijten naeme vande gedeputeerden vande hertgangen, ende andere der meeste geerffde ende gegoede der prochie ǁ voirs., representerende de geheele gemeijnte met consent, wille ende overdragen van alle die goede luijden ende gemeijne ingesetenen ǁ van Tilborch voirs., Geloeft hadden Raes van Grevenbroeck Schouteth tot Venloon, Eenen jairlicken ende erffelicken chijns van ǁ vier ende twentich carolus gulden, twentich stuvers, ofte die werde der selven, in anderen goeden ganckbaren gelde, ten tijde ǁ van betalinge, cours ende ganck hebbende van handt tot handt voir elcken carolus gulden te reeckenen, alle jaer te gelden ǁ ende te betalen, inden hoechtijde vanden heijligen Korsdach, vrij vranck ende ombecommert van alle lasten, exactien, schaiden ǁ ongelden, vijften, thienden, hondersten, penningen, beden ordinaris ofte extraordinaris die daer op in enigh tijde, tot naedeel vande ǁ voors. Grevenbroeck geset geeijscht of gevonden soude mogen wordden in eniger manieren gelijck inne brieven metten zegel ǁ der voors. heerlicheijt van Tilborch besegelt breeder staet begrepen, wesende vande date, den twentichsten dach van december int jaer ǁ ons heeren, duijsent vijffhondert, twee ende tachtentich. Ende alsoe daernae, den voors. chijns van vier ende twentich gulden, ǁ met seeckere erffdeijlinge, te deel ende te loote gevallen is Dircken soene des voors. Raes van Grevenbroeck, soo hij verclaerde ǁ soo is gestaen voor scepenen onderges. die voors. Dirck soene wilner Raes van Grevenbroeck, ende heeft den voors. jaerlicken ǁ ende erffelicken chijns van vier ende twentich carolus gulden wittelick ende erffelijck opgedragen ende overgegeven Marcelissen van ǁ Casteren, soene wilner Gerarts van Casteren. Tsamen metten voors. brieven, ende metten geheelen recht, hem inde voors. brieven ǁ ende den inhoudt van dijen enichsins competerende, ende heeft helmelinge daerop vertegen inne maniere inne dijen gewoenlijck sijnde ǁ gelovende die voors. Dirck als schuldenair principael, onder verbant van sijnen persoen, ende alle sijnen goederen hebbende ende vercrijgende ǁ tvoors. opdragen, overgeven ende vertijden, altijt vast, stedich ende van werden te houden sonder enich wederseggen, ende allen ǁ commer, calaingie ende aentael, inde voors. chijns wesense ofte nemende, den voorgen. Marcelissen van Casteren aft te doen ǁ geheel.  Getuijgen waren hier over scepenen inne sHertogenbossche, Willem van Reijs, ende Frans Henricxss. van ǁ Gestel, Gegeven den iersten dach der maent van Augusto, int jaer ons heeren duijsent vijffhondert sevenende tachtentich

J van de Velde ǁ griffier 

Dorsale aantekening:

Item bekenne midts desen vernoecht ǁ te sijn als van desen brief van Tilborch ende ǁ dat van Jan Corneliss. Gheritss. van Heijst ǁ ende van Hanrick Herman Corneliss. ǁ datum den iersten dach november ǁ anno 1600 bij mij Marselis van Casteren

Opdracht van de ǁ Renten? van Tilborgh ǁ van 24 gulden tsiaers