Tilburg

Wij Scoutheth Scepenen Gezwoeren Kerckmeesteren Heijligeestmeesteren Rekenmeesteren ende eensdeels vanden goeden mannen ǁ ende nabueren van Tilborch ende Goerle versament zijnde met openbaer kerckengebede ende in presencie van onsen edelen joffrouwen ǁ Margriet van Haestrecht als vrouwe ende meesteresse der heerlicheijden voers. met haer der appendicie doen condt enen ǁ ijegelijcken Alsoe onlancx geleden oever ses oft seven jaeren ende meer zekere dingtalen ende processen geintendeert ende ǁ gesustineert waeren bij ons oft onsen zekeren procuratie daer toe gecommitteert ter eenre ende tussen Willemen Nouwen ingeseten ǁ van Beeck ter andere zijden, Alsoe dat then beijden zijden vele zwaere costen gedaen waeren voer mijnen heere den cancellier ǁ ende andere luden ende heeren in Brabant geordineert, overmits gebruijcke van onser gemeijnten vroent ende aerde van ǁ Tilborch ende Goerle, welcke gemeijnten vroenten ende aerde wij ende onse voirvaederen gecocht ende vercregen hadden bij ǁ coep, ende op eenen zekeren erfchijns tegen onsen alder genadensten heere heere Jannen hertoge van Luchemborch, Limborch ende ǁ van Brabant etc. In den jaere duijsent driehondert ende negenentwentich op Sinte Gielis dach confessoers, Ende met ǁ ons zeker buijten woenders oft buijtensaten in anderen dorpen bij ons woenende die mits haeren gereeden penningen ende quantiteijt ǁ haers getals mede deelachtich zijn geweest ende noch zijn inder selver gemeijnten vroenten ende aerde voers. Ende ǁ om dan die costen vanden gedinge ende processen voers. te vijnden, ende allen twist ende toecoemende processen neder te leggen ǁ ofter daer enige meer uut mochten spruijten ter cause van desen voers. Ende om dan die te scouwen is oeverdragen ǁ bij die gemeijn nabueren van Tilborch ende van Goerle, met sommige vanden buijtengesaten toe gecommitteert then beijden zijden ǁ die desen twist ende discoert nedergeleet hebben, dat men bij hen ende bij die seven gezwoeren van Tilborch ende van Goerle ǁ voers. vercoepen sal ter minster scaeden ende then meesten proffijte, zekere stucken vander gemeijnten oft vroenten voers. om ǁ die penningen vanden voers. processe te betalen, Soe eest dat wij Scoutheth Scepenen mette anderen goeden mannen alsoe ǁ eendrachtelijck vergadert zijnde, hebben geloeft ende geloeven voer ons onse oiren ende naecoemelingen onsen buijtengesaeten ǁ nu oft naemaels wesende, ende die totter voers. gemeijnten gericht zijn als voers. is, mits desen tegenwoerdigen brieve ǁ dat wij van nu voertaen in egheenen toecoemende tijden en zullen aennemen intenderen oft susteneren ennige sunderlinge ding ǁ talen op enige binnen oft buijtensaten gericht oft nijet gericht wesende inder voers. gemeijnten vroenten oft aerde van ǁ Tilborch ende Goerle voers. noch doen aennemen oft intenderen bij ons oft ijemanden anders in egheender manijeren ǁ then zij bij eendrachticheijt, ende ijerst voer all bij een geroepen bij sunderlinge kerckgeboden allen die ghene die hen ǁ rechs vermeten ende gericht mochten wesen inden aerde ende vroenten voers. bij den coop voers. ende anderssins nijet ǁ Ende oft wij dat deden sonder orloff ende consente der buijtensaten voers. dat wij alsdan alle costen het zij ǁ van recht oft anderssins die ter causen van dien coemen oft spruijten mochten alleen sullen betaelen sonder den buijten ǁ saeten voers. het doen aff te heijschen ofte te doen heijschen ter enniger manijeren, Item voertaen hebben wij geloeft ǁ ende geloeven als voer mits desen dat wij in egheenen toecoemende tijden en sullen admitteren oft toelaten dat die ǁ gezwoeren van Tilborch ende Goerle voers. nu oft naemaels wesende, egheen heije en sullen verhueren noch vercoepen ǁ in enniger manijeren then zij ende ijerst voer all zij en doen dat publiceren met openbaer Sondach uutroepinge ende ǁ kerckgeboede der kercken van Tilborch ende Goerle, noemende ende specificerende aldaer openbaerlijck bij den heeren oft vorsten ǁ zoe dat behoeren sal, die ure tijt ende plaetse daer men die heije oft ander dinghen der gemeijnten aengaende alsoe ǁ verhueren ende vercoepen sal daer bewijsende elcken die quantiteijt ende groet ende hoe vele zij der heijen verhueren ǁ willen, Ende dan uutroepen openbaer hoe vele dat elck daer voer wil geven, verhalende dick genoch den penninck ǁ die daer voer geboden sal worden, Ende oft ennige vanden gezwoeren nu zijnde oft naemaels wesende ende daer ǁ oever bevonden wordt die contrarie doen die selen ende elck van hen staen ter correctien vanden heere, ende sal crimineelijck ǁ bij den heer gecorrigeert worden, Item voerts geloeven wij als voere ende hebben geloeft dat wij nu noch in egheenen ǁ toecoemende tijde en sullen gedoegen noch toelaten, die seven gezwoeren van Tilborch ende van Goerle nu oft ǁ naemaels wesende en zullen allen jaer ende als zij daer toe geroepen sullen worden bij den heere, rekeninge ende bewijs ǁ doen van hender administracien ende ontfanck der gemeijnten ende aerde aengaende, ende dat men hen gebieden ǁ sal bij openbaeren Sondaeghs kerckgeboede te coemen op eenen openbaeren dingdach inder vierschaeren voer Scoutheth ende ǁ scepenen, ende alle omstanders van Tilborch ende Goerle om aen te hoeren waer zij met hennen ontfanck ende administracien ǁ bleven zijn, Ende want wij Scoutheth Scepenen gezwoeren kerckmeesteren ende heijligeestmeesteren van Tilborch ǁ ende Goerle voers. willen dat dese punten ende articulen voers. ende elcke van hen besunder onverbrekelijck zullen ǁ worden gehouden then ewigen daeghen, Soe hebben wij scepenen van Tilborch ende van Goerle nu zijnde ǁ ter beden van onsen Scoutheth ende nabueren voers. onsen gemeijnen zegel ons scependoms aen desen brieff doen ǁ hangen, den achtentwentichsten dach van Junio soe men screeff duijsent vijfhondert ende tweentwentich.

Concordat presens copia cum suo originali facta diligenti collatione ǁ per me Johannem Lombaerts Notarium

Item den originalen brieff hier aff leegt tot Beeck inden comme der scepenen aldaer