Tilburg

Wij Schouteth, Schepenen, Gesworens, [Reecken]meesteren, Kerckmeesteren ende Heylige geestmeesteren binnen der ǁ heerlycheyt, ende der dorpen van Tilborch, ende Goorlle, uuyten naam van ons selffen ǁ ende voorts uuyten name van alle onse innegesetene, der heerlycheyt ende der dorpen ǁ voorschreven, die wy in tgene hier nae volgen sall, met hennen vryen will, weten, ende ǁ consent inne desen zyn vervangende, maken condt eenenyegelycken, dat wy volgende ǁ den consente van onse alre genedichste heere die Conincklycke majestyt van Hispanien, ǁ als Hertoige van Brabant, blyckende tzelve by zynder majestyts opene brieven van octroye ǁ gedateert vanden zevensten dach in julio, in den jare ons heeren, duysent vyffhondert ǁ ende vyffentseventich, ondergeteeckent item de zoete, met wellwesen, ende verg[e] ǁ noege van joncheeren, Caerlle van Malsen, onse jegenwoordige heere van Tilborch ǁ ende Goorlle voors., om te vervallen, die costen, schaden, ende lasten, die wy hebben ǁ geleden, ende noch dagelycx zyn lydende, deur die continuele tochten, uuyteringen ǁ ende onderhoudingen, van alreley ruyteren, ende zouldaten, te voet ende te peerde, die dagelycx deur dese heerlycheyt ( als gelegen, opte groote, ende ge ǁ meyne herbane) syn passerende, ende repasserende, voorts deur dat onderhout ǁvanden stercten inde Langestrate, jegens die van Sinte Geertruydenberge, ende ǁ deur andere menichfuldige, ende onverdrachelycke lasten, daer inne wy geduerende ǁ dese jegenwoordige troublen, belaten, ende gevallen zyn, wittelyck, ende erffelyck ǁ hebben uuyt gegeven, ende met voorgaende kerckegebode, ten affhange voor alle mannen ǁ vercocht hebben in eenen wittigen coope, Willemen zoon wylen Geerit Adriaen Geerit Meeus ǁ zoon, Een stuck erffs oft gronden, van onse gemeynte tot heye ende weye liggende vierentwintich loopensaet, ende tweendertich royen oft daer omtrent begrypende, ǁ gelegen binnen der parochie van Tilborgh, ter plaetse geheyten voor dat Tilborchse ǁ crenck by Dongen aenden cleynen Werfbosch, tusschen erffenisse Govaerts Matheeusen ǁ Wouters, dat hy van deser gemeynte oock inne heeft genomen aen die een zyde, ende ǁ tusschen erffenisse Jans Cornelisse die Ber, bij hem oock inne genomen, aen die anderen ǁ zyde, streckende vander voors. gemeynte, totter loopender Leye toe aldaer ǁ der Nyeuwen dyck, beneffens die selve Leye geordineert zynde tusschen beyde ǁ is loopende, Omme dat zelve stuck erffs, oft gronden voors., by Willeme coop ǁ voorgenoemt inne gegraven, besloot, ende beheymt, te moigen worden, soe hy ende ǁ zyne erffen, oft nacomelingen, baet ende prouffyt daer aff zullen willen hebben, Ende ǁ hebben wy daer op tot behoeve desselffs coops voors. volcomelyck vertegen, met ǁ overgeven ende affgaen, in vuegen ende manieren, als dat behoorlycken ende ǁ recht is, Gelovende wy schouteth, schepenen, gezwoorens, rekemeesters, kerckmeesters, ǁ ende heylige geestmeesters, alle bovengenoemde, voor ons selven, ende voor onse ǁ oiren ende nacomelingen innegesetene deser heerlycheyt voors., onder dat ver ǁ bant van alle die goeden, totter zelver onser gemeente behoorende Willemen ǁ coop voors., dat selve stuck gronden van erven, te waren loss ende vry, gelyc men loss ǁ ende vry erven schuldich is te waren, ende dit vercoopen, uuytgeven, opdraghen, ǁ affgaen, ende verthyen voors., altyt vast ende stentich te houden, ende van onsen ǁ wegen te doen houden, sonder ennich wederseggen, ende alle commer ende ca ǁ laengie daer op comende, altemaell aff te doen, Behoudelyck, dat die voor ǁ genoemde cooper, hier uuyt zal gelden, iegens dat buynder twee stuveren ǁ Brabants, nae advenant tsiaers gewinchyns, in des hertoigen chyns, op Sinte ǁ Thomas dach, tot Oisterwyck te betaelen, Ende dat dit erve ten eeuwighen daghen ǁ zall staen ten schote ende ten lote, ende voorts ten gebode des heeren, als van ǁ schouwen, van heyningen, van watergangen, van wegen, ende van stegen, zoe ǁ die van des heeren, ende der wethouderen wegen alhier, alreede geordineert syn, ǁ ende in toecomenden tyde tot gemeyn welvairt vandien lande geordineert zullen ǁ worden, Ende des toorconden, zoo hebben wy schepenen voors., ten versoucke vande ǁ schouteth, gesworens, reeckemeesters, kerck, ende heylige geestmeesters , oock voors. ǁ den zegel ons gemeyn schependoms, hier onder aen doen hangen, Gegeven int ǁ jaer ons heeren duysent vyff hondert ende zevenentseventich, Opten vyff ǁ thiensten dach in februario, folio 3