's-Hertogenbosch

Wij Arndt van Broegel ende David Everswijn schepenen der stadt sHartogenbossche doen condt eenen yegelycken dat op huyden date des brieffs ǁ voor ons comparerende de Richter deser stadt sHertogenbosch, Inne den name ende van wegen ons genadichste heeren des Conincx als Hartoch van Brabant ter instantie ende in tegenwoerdicheijt van Matheeussen sone wijlen Adriaens sone Embrechts de Greve, vanden selven Adriaenen ǁ ende wijlen Engelken sijn huijsvrouwe, dochter wijlen Gregoris van Eerssel tzamen verwect ter eenre sijde, ende Marcussens sone wijlen Jans van der Heijden, van den selven ende Mariken sijn huijsvrouwe dochter wijlen Adriaens de Greve ende Engelkens voorn. te samen geprocreert, ende Goossens ǁ sone Joirden Peeterss., als wittich man ende momboir soo hij verclaerden van Mariken sijn huijsvrouwe, dochter wijlen Jans van der Heijden ende wijlen Marikens voorn., ter andere sijden gedeijlt heeft de naebescreven renthen ende pachten hen condividenten aengecomen oft aenverstorven door de doot wijlen Adriaens ǁ de Greve, ende Engelkens voorn., soo sij verclaerden, midts welcker erffdeijlinge ende sceijdinge deen helffte van alsulckenen jaerlicken ende erffelicken loschijns van eenhondert Carolus gulden siaers, verscijnende jaerl(ijcx) in twee termijnen, te weeten de eene helft den iersten Januarij, ende voor dander ǁ helft den iersten dach Julij op de Staeten van Brabant, als de voorn. Adriaen sone Engbrechts s'Greven tegens de voorn. Staeten in coop heeft vercregen, nae breeder inhouden vanden brieven onder den zegele der selver Staeten daerop geexpedieert, in dato den iersten dach der maent van Julio anno duijsent vijffhondert ǁ negen ende tzestich met vier ende een halff jaren achterstels van de voors. helfte deser rente tegenwoordelick verscenen ende onbetaelt staende, soo sij verclaerden, Item eenen jaerlicken ende erffelicken chijns van dertien Carolus gulden, verscijnende alle jaer erffelick int hoochtijt van onser liever vrouwen Lichtmisse ǁ uut onderpanden tot Berckel, in de prochie van Oisterwijck gelegen, welcke rente oft chijns de voorn. Adriaen sone Embrechts de Greve Wouterss., tegens Arnden sone wijlen Adriaens de Meijer Aertssoen inne coope heeft vercregen, in schepenen brieven deser stadt van sHartogenbossche, in dato den ǁ dorden dach Aprilis anno vijfftienhondert sessentzeventich, Item twee jaeren afterstels der selver rente, waeraff d'leste jaer deser twee jaeren vervallen sal, te lichtmisse naestcomende anno vijfftienhondert ende achtentnegentich, Item eenen jaerlicken ende erffelicken chijns van drije Carolus ǁ gulden siaers, verscijnende opten iersten dach meije, uuijt onderpanden gelegen in Udenhout, in de prochie van Oisterwijck, welcken chijns, mitsgaders eenen pacht van twelff loopen roggen (welcken pacht sij verclaerden over lange aen eijgen handen des voors. Adriaens de Greve te sijn gequeten) Dirick sone Martens ǁ sone wijlen Jans Matheeuss. erffelick vercoft heeft in eenen schepenen brieff deser stadt sHartogenbosch, den voorn. Adriaenen sone wijlen Embrecht Greven, nae breeder inhouden der selver brieven, in dato den drijentwintichsten dach der maent van Merte donderdachs nae Palmsondach anno duijsent vijff ǁ hondert ende negenentzestich, met drije jaeren achterstellen van desen chijns van drije Carolus gulden verscenen den iersten dach Maij annis vijfftienhondert vijffentnegentich, ses ende tnegentich ende sevenentnegentich, Item eenen jaerlicken ende erffelicken losbaren pacht van een malder roggen ǁ mate ende leveringe van Oisterwijck, verscijnende alle jaer op Sinte Martensdach, uuijt onderpanden in Udenhout, onder de prochie van Oisterwijck gelegen, aen den Duijn, nae breeder inhouden van schepenen brieven van Oisterwijck beginnende aldus: Marten sone wijlen Jan Theens, ende Jan ǁ sijn sone hebben geloeft etc., sijnde desen brieff in dato den vijften dach der maent van Novembri int jaer ons Heeren duijsent vijffhondert negen ende tzestich, Met drije jaeren achterstels van desen pacht verscenen op Sinte Martensdach annis vijfftienhondert vijffentnegentich, sessentnegentich, ende seven ende ǁ tnegentich, Item tot deser portie gevuecht de somme van drije ende ende dartich gulden tien stuvers eens, wesende een halff jaer verscenen den iersten Januarij deses nijeuwe jaers vijfftienhondert achtentnegentich, van alsulcke sevenentzestich gulden, als heer Jan Daems priester alle jaer in twee termijnen ǁ sekere jaeren lanck geduerende, gehouden is te betaelen, vermogens seeckere contract, tussen den voorn. Adrianen de Greve, ende den voorn. heeren Jannen tsaemen gemacht, ter saken van eene erfflosrente van achtentzestich gulden siaers opte Staeten van Brabant, bij den voorn. Adrianen de Greve heeren ǁ Jannen voorn. getransporteert, welck voors. contract offt accoirtbrieff is voor schepenen deser stadt gepasseert den veertienden Julij anno vijfftienhondert tnegentich, inhoudende dat de selve heer Jan geloeft heeft den voorn. Adriaenen de Greve de somme van dertienhondert veertich gulden te betaelen ǁ van halven jaere tot halven jaere, te weeten telcken halven jaere drijendartich gulden tien stuvers, maeckende alle jaer sevenentzestich gulden, waeraff dierste halff jaer vervallen is geweest den iersten dach Januarij anno vijfftienhondert eenentnegentich, ende soo voorts van halven jaer tot halven jaer, tot dat ǁ de voors. somme van dertienhondert veertich gulden betaelt sij, ende heeft de selve heer Jan hier aff bij leven der voors. Engelkens betaelt voor tleste halff jaer verscenen prima Julij vijfftienhondert sevenentnegentich, Ende soo nu tot deser voors. portie gevuecht is de voors. somme van drije ende dartich gulden ǁ tien stuvers, als van het halff jaer versaenen prima Januarij deses nijeuwe jaers van vijfftienhondert acht ende tnegentich, soo staen noch vanden voors. heeren Jannen daerenboven te ontfangen, ter saken voor verhaelt, de somme van achthondert sevenendertich gulden ende tien stuvers, waeraff deen ǁ helfte tot deser portie gevuecht is, off te lote gestelt, sijn mits desen te deele ende te lote gevallen den voorn. Matheeussen sone wijlen Adriaens de Greve ende Engelkens voors., Ende midts welcker erffdeijlinge ende sceijdinge, dander helft metten afterstels als boven vande voors. rente van ǁ hondert gulden siaers opte staten, Item eenen jaerlicken ende erffelicken chijns van twelff Carolus gulden verscijnende op Lichtmisse uuijt onderpanden tot Middelberse nae uuijtwijsen den schepenenbrieff daeraff gepasseert voor schepenen in Hilvarenbeeck, staende opt prothocol aldaer, noch nijet uutgemackt oft gelicht uuijt handen van den secretaris, van ǁ welcke rente Wouter Princhen van sijn ooms wegen tot Middelbersse woinende de leste betaelingen gedaen heeft aen de voors. Engelken wedue Adriaens Greven, soo men verclaerde, Tsamen met twee jaeren van dese rente verscenen int hoochtijt van Lichtmisse anno xvc sevenentnegentich, ende te verscijnen ǁ Lichtmisse naestcomende anno achtentnegentich, maeckende tsamen soo voors. is twee jaeren, Item eenen jaerlicken ende erffelicken chijns van eenen Carolus gulden verscijnende jaerlicks van ende uuijt onderpanden tot Oistelberse vergonden wordende, bij den ouden Jan Verhoeven, hieraff ǁ is den brieff berustende onder Peter Nelen als hem gelevert bij den voorn. wijlen Adriaen de Greve, om recht voorderinge daermede te doen, soo men verclaerde, Tsamen met vier jaer afterstellen, nu tegenwoerdelick daeraff vervallen ende onbetaelt staende, Item eenen jaerlicken ende erffelicken ǁ pacht van erffmalder roggen siaers uuijt versceijden onderpanden gelegen in de prochie van Oisterwijck, ter stede genoemt Hueckelom, welcken pacht eertijts toebehoort heeft der Gulde van Sinte Sebastiaen, ende welcken pacht de voors. Adriaen Embrechtss. de Greve in schepenen brieven van Oisterwijck ǁ in dato anno vijfftienhondert vijffentzestich, opten lesten Augusti bij opdracht vercregen heeft, Tsamen met drije jaeren achterstellen van desen pachte verscenen respective te Lichtmisse vijfftienhondert sessentnegentich, sevenentnegentich, ende Lichtmis naestcomende anno achtentnegentich te verscijnen, ǁ makende tsamen (soo voors. is) drije jaeren, Item eenen jaerlicken ende erffelicken chijns van vier ende dartich stuvers jaerl(icks) ende eenen jaerlicken ende erffelicken lospacht van een malder roggen, mate ende leveringe van Oisterwijck, beijde geconstitueert in eenen brieff, verscijnende op ǁ Lichtmis, uut onderpanden tot Oisterwijck in den Biesmortel, den constitutie brieff voors. beginnende aldus: Cornelis sone wijlen Adriaens de Meijer heeft wittelick ende erffelick vercoft Adrianen sone wijlen Embrechts de Greve etc., in dato den dartiensten dach der maent van Merte ǁ anno vijfftienhondert negen ende tsestich, met drije jaeren achterstellen van dese rente ende pacht respective Lichtmis vijfftienhondert sessentnegentich ende sevenentnegentich, ende te Lichtmisse anno vijfftienhondert acht ende tnegentich te vervallen, maeckende tsamen (soo voors. ǁ is drije jaeren, Item dander helfte vander somme van achthondert ende sevenendartich gulden tien stuvers inde voorgaende portie breeder verhaelt, alnoch resterende te ontfangen vanden voors. heer Jannen Daems, sijn mits desen te deel ende te lote gevallen den voorn. Marcus van der ǁ Heijden voor deen helft, ende den voorn. Goossens Joirdens als wittich man ende momboir der voors. Mariken sijn huijsvrouwe, voor dander helft, Dies staet te weeten alsoo dese gemeijne condividenten te weeten de voorn. Matheeus voor deen helft, ende de voors. Marcus ende Goossen ǁ voor dander helft gehouden sijn te betaelen de somme van drijehondert gulden eens aen den Convente der susteren opten Wijntmolenberch ter saken des accoirts int innemen van Engelken dochter Cornelis de Greve, sone des voors. Adriaens de Greve, tussen dijen vanden Convente ǁ ende den voorn. Adriaen als doen gemackt, ter natueren ende opten voet daer inne verhaelt, op affcortinge van welcker somme van drijehondert gulden dijen vanden voors. Convente is voldaen eenhondert gulden, ende welcke eenhondert gulden opgenomen is vande wedue Jans van Geldrop ǁ ende alnoch te betaelen staende, ende daerenboven noch te betaelen de somme van vijfftich gulden bij den voorn. Adrianen de Greve, ende Engelken sijn huijsvrouwe gelegateert aen de fabrijcke van Sinte Catharijnen prochie binnen deser stadt, Ende alsoo de voorn. Matheeus ǁ hieraff tot sijnen laste genomen heeft ende neempt mits desen den voors. Convente de voors. resterende somme van tweehondert gulden te voldoen volgende den accoirde met hem gemackt, Ende alsoo de voors. Goossen over hem tsijnen laste alleen genomen heeft ende neempt mits desen ǁ de voors. somme van eenhondert gulden aen de voors. wedue Jans van Geldrop, ende voors. somme van vijfftich gulden aen de voors. fabrijcke respectivelick te betaelen, maeckende te samen de somme van eenhondert vijfftich gulden, soo sullen de voorn. Matheeus ende Goossen gehouden sijn ǁ als principael sculdeneren elck respective de voors. henne overgenomene penningen alsoo te voldoen ende te betaelen dat deen vanden anderen ter saken van dijen egeenen scade en overcome in toecomenden tijden, Ende soo de voors. Matheeus vijfftich gulden meer over hem hier voor is nemende ǁ dan de voors. Goossen, soo sal de selve Goossen gehouden sijn als principael schuldener ten respecte van dijen, vanden iersten penningen die hem toecomen sullen te ontfangen van heer Jan Daems ter saken als boven, gehouden sijn den voors. Matheeussen te betaelen de somme van vijffentwintich ǁ gulden eens, om op gelijcken voet te staen aengaende de overgenomen penningen voors., Ende naedemael de voorn. Goossen tsijnen laste hier boven genomen heeft ter begeerte des voors. Marcus Janss. de voors. somme bedragende te samen eenhondert vijffentzeventich gulden, hoe ǁ wel de voorn. Marcus deen helft daeraff moste draegen, beloopende deselve helfte de somme van sevenentachtentich gulden tien stuvers, soo sal deselve Marcus gehouden sijn terstont immediate nae t'passeren deser deijlinge gehouden sijn den voors. Goossenen de voors. sevenentachtentich ǁ gulden tien stuvers goet te doen, bij bewijs ende opdrachte uuijt sijns Marcussens portie van ennige der bester renten, tot sijns Goossens volcomen genuegen tot goets mans seggen te priseren aengaende de werde vande capitael van sulcke rente oft renten, mits consideratie nemende int ǁ selve priseren opten laste vande gereeden penningen voor verhaelt, die hij Goossen van des voors. Marcus wegen, over hem genomen heeft, Item alsoo de voors. Engelken wedue Matheeus de Greve in haeren testament verhaelt, dat sij eertijts mondeling haer tocht affgegaen heeft ǁ tot behoeff des voors. Matheeussens haers soons, in eenen jaerlicken losbaren pacht van een malder roggen, verscijnende op Lichtmisse, uuijt onderpanden tot Gestel bij Oisterwijck, welcken pacht Adriaen de Greve voorn., tegens Jannen sone wijlen Jans Bressers ǁ in coope heeft vercregen in schepenen brieven deser stadt, in dato den eenentwintichsten dach Januarij anno vijfftienhondert sessenvijfftich, ende dit ten respecte van dat sij Engelken tanderen tijden haer tocht affgegaen had tot behoeff Marcus ende Goossens voorn. in een ǁ affgebrande hofstadt, die sij vercoft ende opgedragen hebbende Wouteren Peeterss., sij Marcus ende Goossen onder hen beijden alleen de penningen daeraff ontfangen hebben, bedragende negenentwintich gulden eens, Soo eest dat deselve Marcus ende Goossen inder qualiteijt als boven ǁ op desen pacht van een malder roggen, tot behoeff des voors. Matheeussens hebben vertegen ende vertijden mits desen erffelijck met helmelinge vertijdenisse in manieren in sulcx gewoonlijck sijnde, Item ten lesten is geconditionneert dat inne dijen ennige der voors. renten quamen wanduegende  ǁ te worden ende te nijet te gaen in heel oft deel door insufficientie der onderpanden, oft op winninge ende slijtinge der selver, dat inne dijen gevalle sij condividenten alsulcken scade (den capitael aengaende alleenlijck ) malcanderen tot goets mans seggen sullen helpen draegen, goet doen  ǁ oft resunderen reciproquelicken, te weten elcke portie der voors. portien voor deen helfte gelijck de voorn. condividenten dat, ende alles tgeens voors. is opentlick hebben bekent, ende elck van hen op speciael verbant van sijn voors. aengedeijlt contingent der renten ende pachten voorn. ǁ ende voorts als sculdenaren principael op verbant van hennen persoonen ende allen hennen goederen present ende toecomende, malcanderen hebben geloeft, een welick vast stedich, van weerden te houden ende te volbrengen ten eeuwigen dagen, Inne kennisse der waerheijt soo hebben wij ǁ schepenen voorn. onse segelen hier beneden aen desen brieff doen hangen, gegeven den vijffsten dach der maent van Januario int jaer ons Heeren duijsent vijffhondert acht ende tnegentich

J v Hees littera Mathei Promisit [***] ambo