Brussel

Philips bijder gratien Goids Coninck van Castillien, van Leon, Arragon, Navarre, Napels, van beijden Secillien, van Maillorcke, van Sardaijne, vanden Eijlanden, Indien, ende vaster eerden ǁ der zee Occeane, eertshertoghe van Oistenrijcke, hertoghe van Bourgoignen, van Lothrijcke, van Brabant, van Limborch, van Luxemborch, van Geldre, ende van Milaenen, graeve van Habsbourch, van Vlaenderen, van Arthoijs, van Bourgoignen, palsgrave ende ǁ van Henegouwe, van Hollandt, van Zeelandt, van Namen, ende van Zutphen, prince van Zwave, marctgraeve des Heijlichs Rijcx, heere van Vrieslandt, van Salijns, van Mechelen, van der stadt, steden ende landen van Uuijtrecht, Overijssele ende Groeningen, ende ǁ dominateur in Azije ende Affricke, Allen den ghenen die dese onse brieve zullen sien saluijt. Doen te wetene dat wij ontfanghen hebben die supplicatie van den ingesetenen van Huijkelom geleghen onder de prochie ende dingbancke der vrijheijt van ǁ Oisterwijck, inhoudende hoe dat zij supplianten deur dese jegewoerdighe oirloghe, ende uuijteringhe van den ruijter ende knechten, hebben schaede gehadt ende geleden boven de twintich duijsent karolusgulden, daeraff noch twee duijsent karolus gulden resteren te betaelen ǁvdie welcke zij supplianten op interest hebben moeten lichten, ende die pensie daeraff noch jaerlijcx betaelen, tot hunnen zeer grooten laste, daertoe zij egheen middele en weten ter werelt, om uuijten voerscreven lasten te commen, dan bij vercoopinge van zeeker deel ǁ van de gemeijnte den supplianten toebehoirende, daer van zij luijden alleene gherive twee hondert bunderen ofte drije, zouden vercoopen om metten penningen daeraff procederende, te vervallen ende betaelen de voerscreven lasten, ende de voerscreven twee hondert bunder vercocht sijnde ǁ zullen der noch […]eren wel dertich duijsent bunderen, daertoe alleenlijck zijn gericht zesse ofte zeven pacht hoven, ende omtrent vijftich viersteden, maer want zij supplianten de voerscreven vercoopinghe nijet ende zouden moeghen doen, zonder daertoe ierst ende voeral te hebbende ǁ onse oepene brieven van consente ende octroije, zoe hebben zij ons zeer oijtmoedelijck gebeden om deselve, Soe eest dat wij de saecken voerscreven overgemerct, Ende want onsen bij informatie vanden wethouderen onser stadt van Tsertogenbossche, opt gene den ǁ voerseijt [***] gebleken is van tgene des voerscreven is, Ende daerop ierst gehadt daduijs van onsen rentmeestere van Brabant int quartier van Tsertogenbossche, ende daernae oijck van onsen lieve ende getrouwe, die president ende luijden van onser rekencamer in ǁ Brabant genegen wesende ter beden ende begerte vanden voergenoemde supplianten, Denselven hebben geoctroijeert, geconsenteert, ende geaccordeert, octroijeren, consenteren, ende accorderen, uuijt onser zunderlinger gratien bij desen onsen brieve, dat zij zullen mogen ǁ vercoopen aen weerlijcke ende inlandighe persoonen, huijslieden, ende andere, ende anders nijet, die quantiteijt van twee hondert bunderen van hunder voerscreven gemeijnte, ende dat met parceelen, ten meesten prouffijte ende minster schaeden ende quetsinghe vande ǁ ingesetenen aldaer, ende dat met oepenbaere voergaende proclamatien ende kerckgeboden te doene, om metter penningen die daeraff procederen zullen, geemploijeert te wordden tot betalinghe van heure voerscreven schulden ende tachterheden ende nerge[.]e[.]s el, Behoudende ǁ dat die voergenoemde supplianten schuldich ende gehouden zullen wesen, tallen tijden als zij luijden van onsen weghen oft van weghen van onse voerscreven cameren sullen wesen versocht, vanden penningen die procederen zullen, vande voerscreven vercoopinghe vanden tweehondert ǁ bunderen gemeijnte, te doene goede ende wettighe rekenninghe, bewijs, ende reliqua, zoe van commissarissen tsij bij onsen oft bij dijen van onser voerscreven rekencamer daertoe te committerene, als voer onsen voerscreven rentmeestere vanden Bossche jegenwoerdich oft [***] ǁ toecomende, om te weten waer ende in wat nootsaecken, die penningen gecommen vanden vercoope vande vande voerscreven tweehondert bunderen gemeijnte, zullen geemploijeert sijn geweest, op last ende conditie, dat die voergenoemde supplianten, oft die persoonen die welcke ǁ gecocht sullen hebben eenighe partijen vande voerscreven tweehondert bunderen gemeijnte, zullen schuldich ende gehouden wesen, in recognitie van desen onsen consentie, alle jaer op Sint Thomas dach (chijnsdach van Oisterwijck) te geven ende te betaelen ǁ in handen onss voergenoemde rentmeesters van Brabant, int quartier vanden Bossche, jegenwoerdich oft [***] toecomende, die daeraff gehouden wordt ontfanck te maeckene, rekenninghe, bewijs, ende reliqua te doene, metten anderen penninghen ǁ van zijnen ontfanghe, van elcken bundere, tot de voerscreven quantiteijt van tweehondert bunderen, eenen erffchijns van vier stuijvers, ende van het halff bundere, vierendeel, min oft meer, naer advenant, ende dat boven den ouden chijns, die de voergenoemde ǁ supplianten jaerlijcx ende erffelijck sijn gevende ende betaelende, ter causen vanden gebruijcke van heur liede voerscreven geheelder gemeijnte, daeraff dierste jaer van betalinghe vallen ende verschijnen sal, den iersten Sint Thomas dach, die comen sal, nae den ǁ vercoop vande voerscreven heur lieden gemeijnte, te doene uuijt crachte van desen onsen octroije ende consente, dat oijck deselve supplianten gehouden sullen wesen, zoe wanneer zij lieden eenighe partijen vande voerscreven tweehondert bunderen gemeijnte, uuijt crachte [***] ǁ voere, vercocht zullen hebben, die affpaelinghe vande selve partijen te doene, in presentie onss voerscreven rentmeester vanden Bossche, jegenwoerdich oft anderen toecomenden, om deselve met goeder declaratien ende particuliere specificatie vanden paelgenooten ǁ grooten, naemen, ende toenaemen, vanden ghenen die deselve gecocht sullen hebben, behoirlijck te wordden gestelt in onsen chijnsboeck, om daer aene oft aende voerscreven supplianten jaerlijcx verhaelt te wordden, den voergenoemde chijns, nae de distinctie voerscreven, [***] ǁ op last dat deselve supplianten heur lieden gemeijnte nijet en zullen moeghen vercoopen, aen eenighe geestelijcke persoonen, oft doode handt, daer deur deselve gemeijnte zoude moeghen geadmortiseert wordden, Ende voirts dat zij supplianten gehouden zullen wesen ǁ zoe tot versekerheijt van ons, als van hen supplianten, dese onse oepene brieven van octroij ende consent, te brenghen in onse voergenoemde rekencamer, om aldaer geregistreert ende geinterneert te wordden, zoe dat behoirt, mitgaders oick te geven henne contre brieven oft ǁ verbant brieven in behoirlijcker formen, tot versekerheijt vande betalinghe vanden voerscreven nijeuwen erffchijns, totten vercoope toe bij hen te doene vande voerscreven tweehondert bunderen gemeijnte, aleer zij deffect van desen zullen moeghen genijeten, Ontbieden ǁ daerom ende bevelen onse lieve ende getrouwe den cancellier, ende andere luijden van onsen raede geordineert in Brabant, den schouteth van Oisterwijck ende allen anderen onsen ende onser vassallen, rechteren, insticien, offitieren, ende ondersaeten dijen dat aengaen sal ǁ moeghen, dat zij den voergenoemde supplianten, van desen onsen jegenwoerdigen octroije ende consente inder vueghen ende manieren voerseijt, peijselijck ende vredelijck, doen ende laeten, genijeten ende ghebruijcken, cesserende alle wederseggen ende beletten ter contrarien, want ons ǁ alsoe ghelieft, Ende des torconden hebben wij onsen zegele hier aen doen hanghen, Gegeven in onse stadt van Bruessele den derthiensten dach der maendt van julio, int jaer ons heeren duijsent, vijffhondert, negenentseventich. Van onsen rijcken ǁ van Spaengien Sicillien. CXXVI^e Ende van Napels CXXVII^e  ǁ

Op de pliek:

Bij den Coninck ǁ en zijnen Raede ǁ  Wouwere ǁ Desen tegenwoirdigen brief ende gesien geweest inder cameren vande rekenmeesteren ons heeren des conincx [***] Brabant ende ǁ naevolgende den inhouden vande selven inder voerscreven cameren geintermeert ende geregistreert geweest in sekere register aldaer ǁ gehouden beginnende inde maent van februario XV^C LXXIIII boven geteeckent metter [***] LXXXVII verso op [***] ǁ conditie ende protestatie dat zijnde niet sullen volgen ende toecommen de moeren indien eenige bevonden wordden inde uuijt [***] ǁ gemeijnte inde voerscreven brieven gemelt, ende soe verre eenige partijen vande selven uuijt te gevenen gemeijnte tot winnende landen gebracht wordden ǁ dat daeraf sijnde niet toecommen sal, die thiende die opte selve lande vallen sullen, nijettegenstaende dat dese voirscreven twee [***] ende ǁ clausulen inden voirscreven oepenen besegelden brieve nijet en sijn geinfereert, maer aldaer geobmitteert opter XIII^e dach van aprile anno XV^C ǁ tachtentich, Mij daer bij zijnde ǁ