Brussel (B)

Kaerle byder gracien Goids gecoren Roomsch keyser altyt vermeerder des rycx coninc van Germanien ǁ van Spaignen van Arragon van Navarre van beyde den Cecillien van Jherusalem van Hongerien van Dalmatien van Croatien ende eertshertoge van Oistenryck hertoge van Bourgoingnen van Lotharingen ǁ van Brabant van Stier van Karinten van Carniole van Lemborch van Luxemborch ende van Gheldre Grave van Vlaenderen van Habsborch van Tyrol van Artois van Bourgoingnen palsgrave ǁ ende van Henegouwe lantgrave in Elsaten prince van Zwaven mercgrave van Burgau ende des Heylichs rycx van Hollant van Zeellant van Ferrette van Kieborch van Namen ende van Zuytphen ǁ grave heere van Vrieslant van op ter windischenmarck van Portenau van Salins ende van Mechelen. Allen den ghenen die dese onse brieve selen sien oft hoeren lesen saluyt Alsoe onse ǁ wailgeminde jouffrouwe Margriete van Haestricht nu ter tyt wettige gesellinne Anthonis van Bruheze ons heeft doen thoonen hoe dat zij overmits sekeren redenen huer dair ǁ toe porrende heeft gegeven ende begheert op te dragen over te gevende ende te transporterende tot behoef ende proffyte van Adriaene van Malsen hueren wettigen soene dien zy heeft ǁ behouden van wylen Robbrechte van Malsen hueren iersten man was Alsulcken erftocht recht ende actie als zy heeft ende huer toebehoirt ende competeert in ende aen die dorpen ǁ goeden ende heerlicheyden van Thilborch ende van Ghoorle mitten heerlicheyden hooge middel ende leghe mitten mansscapen waranden visscherien vogelrien renten chynsen ǁ forfaiten ende allen anderen hueren toebehoirten gedragende jairlycx den chyns verschinende op Sint Stevens dach vinenveertich ponden acht scellingen vier penningen nou? vier hoenderen ǁ een mudde ende zeven loepen rox gelyck de voirs. jouffrouwe Margriete van Haestricht ende huere voirvordderen heeren ende vrouwen van Thilborch ende van Ghoorle ǁ de selve goeden van ons ende onsen vorvordderen hertogen ende hertoginnen van Brabant in leene gehouden hebben mair want der selver jouffrouwen Margrieten van Haestricht ǁ te deser tyt nyet gelegen en is mits dat zy huer tegenwoirdelyck buiten onsen voirs. lande van Brabant houdende ende woenechtich is Om voere onsen lieven getruwen stathoudere ǁ ende mannen van leene ons hoofs van Brabant ende elders dair dat behoeren ende van noode wesen soude in persoene te compareren ende aldair de voirs. opdracht overgevinge ende ǁ transport van hueren voirs. erftocht recht ende actie huer in ende aen de voirs. dorpen goeden ende heerlicheiden van Thilborch ende van Ghoorle mit allen hueren toebehoirten ǁ toebehoerende ende competerende tot behoef van den voirs. Adriaens van Malsen hueren wettigen soene te doene Ende dat zy oick nae riguer van onsen leenrechten van Brabant ǁ die nyet en soude moegen doen by procureur het en waere dat huer dair op by ons wordde versien van gracien dairom zy ons oitmoedelyck heeft doen bidden. Doen te ǁ wetene Dat wy ter beeden der voirs. jouffrouwen Margrieten van Hastricht geneycht wesende hebben der selver overmits den redenen voirscreven geaccordeert geconsentert ǁ ende gewillecoert Accorderen consenteren ende willecoeren van sunderlinger gracien by desen onsen brieve voere ons onse erven ende naecomelingen hertogen ende hertoginnen van ǁ Brabant voircreven Dat zy by onsen geminden Janne van Bierbeke hueren procureur by huer dair toe sonder ennich wederoepen voere Joryse van Brakel als notarys heeren ǁ Godenairde Hack Arnde van Wyck Wouteren Gielys ende Rutgheerde Matheeus getuygen op ten achtentwintichsten dach der maent van aprile lestleden geconstitueert ende ǁ gemechticht nae uutwysen van sekeren instrumente dair af zynde Sal moegen compareren voere onsen voirs. stadhoudere ende mannen van leene van Brabant ende voere ǁ alle andere heeren hoven bancken ende gerichten dair dat van noode wesen sal Ende aldair van hueren wegen ende in hueren naeme te derven mit wettiger verthidenissen ǁ tot behoef des voirs. Adriaens van Malsen huers soens De voirs. huere erftocht recht ende actie die zy heeft ende huer toebehoirt ende competeert in ende aen de voirs. ǁ dorpen goeden ende heerlicheyden van Tilborch ende van Ghoirle mit allen hueren toebehoirten boven vercleert ende gespecificeert dair op by den selven Janne van Bierbeke ǁ hueren procureur in hueren naeme tot behoef des voirs. Adriaens huers soens mit eenen halme te worpen ende te verthydende ende den selven hueren soene alsulcken brieven ǁ ende vasticheyden dair af te verlyden als hem dair toe van noode wesen sal Ende allet ghene des by den voirs. Janne van Bierbeke hueren procureur in tgene des ǁ voirs. is mit des dair aen cleeft gedaen sal wordden hebben wy geauctorizeert geapprobeert geratificeert ende geconfirmeert auctorizeren approberen ratificeren ende ǁ confirmeren by desen onsen brieve Willende dat tselve geacht ende gehouden zy van sulcker macht weerden ende effecte als oft de voirs. jouffrouwe Margriete van ǁ Haestricht dat in hueren persoene gedaen hadde. Ontbieden dair om ende bevelen onsen voirs. stathoudere ende mannen van leene van Brabant ende voirt allen anderen ǁ onsen ende der smaelre heeren officieren richteren dieneren ende onderseten dien dat ennichssins aengaen sal moegen dat zy ende elck van hen soe hem toebehoirt der voirs. ǁ jouffrouwen Margrieten van Haestricht Adriaens van Malsen hueren soene ende anderen dien dat aengaen mach van desen onser gracien orlove consente auctorizatien approbatien ǁ ratificatien ende confirmatien doen ende laten peyselyck ende vredelyck useren genyeten ende gebruycken sonder hen dair inne te doene noch te laten geschienen enigen hinder stoot ǁ oft letssel ter contrarien nyet tegenstaende enigen rechten statuyten ordinantien costumen oft gewoenten Dair tegen wesende De welcke wy mits den redenen voirs. ǁ te desen male hebben gederogeert ende derogeren by desen onsen voirs. brieve ende nyet en willen dat hen die commen tot enigen achterdeele de selve rechten ende ǁ costumen nochtans anderssins blivende in hueren crachten ende wesende Want ons alsoe gelieft Ende des torconden hebben wy onsen segel hier aen doe hangen. Gegeven ǁ in onser stadt van Bruessel zesse dage in meye int jair ons Heeren duysent vijfhondert ende vierentwintich Ende van onsen Roomsschen rycke tvyfste ende van ǁ Spaignen dnegenste.

Op de zegelstaart:

Transport van ǁ joffrou Margareta ǁ van Haestrecht ǁ op joncheer Adriaen ǁ van Malse haeren ǁ soen Van de heerlicheyt ǁ van Tilborch ende ǁ Goerle  van den ǁ 6 meij 1524.

Dorsale aantekening:

Numero 4. ǁ Numero 3. ǁ 227 ǁ Numero 13. ǁ I.L.S.

In by den keyser ǁ Middelborch