Mariemont (België)

Albert ende Isabel Clara Eugenia infante van Spaignen byder gratie Godts Ertshertogen van, ǁ Oysterryck, hertogen van Burgundien, van Lotryck, van Brabant, van Lymburch, van Luxemburch, ende van Geldre, Graven, van Habsburch, van Vlaenderen, van Artois, van Burgundien, van Tirol, Palsgraven ende van Henegouwe, van Hollandt, ǁ van Zeelandt, van Namen, ende van Zuytphen, Marcgraven des Heylichs Ryckx van Rome, Heere ende Vrouwe van Vrieslandt, van Salins, van Mechelen van de stadt, steden ende Landen van Utrecht, Overyssel ende van Groeningen, Allen den ǁ ghenen die dese jegenwoirdighe sien sullen saluyt, Alsoe onse lieve ende beminde Hubert van Malsen ons heeft verthoont dat wylen saliger gedachten vrouwe Johanna Hertoginne van Luxembourg, Brabant, Lymbourg ende Marckgravinne ǁ des Heylich Rycx bij heure oepene brieven vanden seventhiensten Novembris des jaers duysent, dryhondert ende sevenentachtentich in pantschap heeft gegeven aen heer Pauwels van Haestrecht voer hem syne hooren ende ǁ naecommelingen de dorpen van Tilborch, Goerle ende Drunen ende oyck den thol van Venloen, met allen heuren heerlicheden, hooge ende nedere met allen broecken forfaiten groote ende cleene, met mannen, cheinsen, renten, waranden ende ǁ visscheryen, ende met allen anderen heuren toebehoirten hoe die gelegen syn in naten oft in droogen, ende hoe die genoemt sijn, gelyck de voirs. vrouwe ende heure voervaderen die tot alsdoen gehouden hadden nyet uuijtgescheyden, dan alleen ǁ thoff van Giersberge, toebehoirende der Abisse vande Cameren etcetera, ende dat voer de somme van vier duysent oude vranckrycksche schilden, gelyck t'selve al naerder is gespecifficeert in de voirs. oepene brieven daer van den teneur ǁ hier naer volght, Johanna by der gratien Goidts etcetera Hertoginne van Luxembourg, van Brabant, van Lymbourg ende Mercgrevinne des Heylichs Rycx, Doen cond allen luyden dat wy voir ons onse hoir ende erfgenamen ǁ gegeven hebben, ende geven met desen brieve onsen getrouwen Raide heer Pauwels van Haestrecht voer hem zynen hoor ende naecommelingen voer vier duysent oude vranckrycksche schilden die hy ons verleit ende geleent heeft in den ǁ schoutetambachte van den Bossche, onse dorpen van Tilborch, Goerle ende van Druenen ende oyck den tolle van Venloen met allen hueren heerlicheyden, hoge ende neder mit allen broecken forfaiten groote ende cleene, mit mannen cheinsen, ǁ renten, waranden ende visscherien ende mit allen anderen hueren toebehoirten hoe die gelegen syn in naten oft in droegen ende hoe die genoempt syn, gelyck wy ende onse vorvaren die tot her toe gehouden hebben nyet uuytgescheyden, ǁ dan alleen thoff van Ghiersberge toebehoirende der Abdissen van der Cameren, daer wy onse heerlicheyt ende recht ane behouden, Behoudelick oyck ons onsen clockslach inde voirs. dorpe ende syn toebehoirten ende onse bede, ǁ als onse gemeyn lant ons bede ghilt mit voirwaerden dat heer Pauwels voirgen. ende syne erven die voirs. dorpen met huenen toebehoirten ende daertoe zyn borchte Venloe van ons ende van onsen erffgenamen hertogen oft ǁ hertoginnen van Brabant alle wege houden sullen ende schuldich syn te houden in leen, ende ons daeraf doen alsulcken dienst als een man syn heere schuldich is te doen, rude en selen heer Pauwels van Haestrecht voergen. ǁ noch syn hoir ende erffgenamen onse lude inde voirgaende dorpen mit hueren toebehoirten geseten nyet handelen mogen noch vueren buyten vonnis noch recht van zaken die te vonnis staen, ende selen se verantwoirden ende beschudden van onrecht ende gewont naer ǁ haer macht, Behoudelyck dat heer Pauwels voirs. ende syn erven binnen den voirgen. dorpen alle ondaet der hooger heerlicheyt aengaende, die in dese dorpen oft in hueren toebehoirten gevallen selen rechten mogen op haers selfs consciencien, om die ǁ aendaet te verdryven sonder jegens ons daer aen te mesdoen, Oyck hebben wy verleent ende gegeven heeren Pauwels voirs. ende zynen erfgenamen voir ons onse naecommelingen dat wy in egeenen van onsen dorpen in onsen Schoutetschape van ǁ Oisterwyck gelegen en selen doen leggen noch laten heffen eenigerhande tolle dan daer menne van oudts gegeven heeft die heeren Pauwels voirgen. oft syn erfgenamen schade oft hindernisse aen synen tolle van Venloen die hy tegen ons nu ǁ vercregen heeft dragen mogen in eeniger manieren, Ende soe wanneer wy oft onse erfven willen, mogen wy die voirgen. dorpen mit hueren toebehoirten aflossen alle wege binnen vierthien daege nae sinte Mertens dach midwinter, ǁ mitten voirs. vier duysent ander francrycsche schilden oft mitter weerdden dairaff, Beheltenis heeren Pauwels ende sinen erven huenen renten rechten en fourfaiten, dien hen daerop dien tyt verscheenen sullen syn, die zy heffen, hebben ǁ ende behouden zelen ende die loesnisse gedaen, is voirwaerde dat heer Pauwels ende zyn erfgenamen huer voirs. burch te Venloen weder hebben zelen ende behouden sonder manschap daer af te doen ons oft onsen naecommelingen het en zy mit haren ǁ wille gelyc heer Pauwels dat tot hede gehouden heeft, Allen argeliest uuytgescheyden in orconden des briefs daer wy onsen segel aen hebben doen hangen, Gegeven te Bruessel zeventhien dagen in Novembri int jaer onss Heeren als men ǁ schreef duysent, driehondert seven ende tachtentich, welcke heerlicheden ende thol hem van zyne voerouders syn gesuccedeert, Biddende zeer oytmoedelyck dat ons gelieven wilde hem deselve absolutelyck ende inde eeuwicheyt te ǁ vercoopen, mitz gevende noch boven de voirs. hooftsomme vyffduysent ponden van veertich grooten onse munte van Vlaenderen t’pont, om deselve geemployeert te worden tot afflossinge van andere partyen van meerder weerden ǁ ende innecommen hier voertyden ten vilen pryse verpant ende hem daerop te doen expedieren onse opene brieven in sulcken saecken dienende, Doen te weten, dat wy tgene voirs. is overgemerckt gehadt hier op d’advys van ǁ onse seer lieve ende getrouwe de hooffden, tresorier generael ende gecommitteerde van onse domeijnen ende financien, met oyck t’consent vande staten van Brabant totte absolute ende eeuwige vercoopinge gedragen volgende dacte ǁ daer aff gemaeckt in dato den sevenentwintichsten january ende twelffsten Octobris des loopende jaers duysent sesshondert twelffve geteeckent J. Maes, hebben uuyt onser rechter wetentheyt aucthoriteyt ende absolute ǁ macht voer ons onse hoiren ende naecommelingen hertogen ende hertoginnen van Brabant, absolutelyck ende eeuwelyck vercocht, gecedeert ende getransporteert, vercoopen, cederen ende transporteren mitz desen onsen ǁ tegenwoirdigen briefve Adriaen van Malsen mitz den overlyden vande voirs. Hubert syn vadere syne hooren erfgenamen, besitters ende actie van hem hebbende de voirs. dorpen van Thilborch, Goerle, Druenen, thol van ǁ Venloen met allen heuren heerlicheden, hooge ende neder breucken, forfaiten mannen chynsen, waranden ende andere toebehoirten, boven gespecifficeert, om deselve eeuwelyck ende altyt te besitten, behouden ende ǁ gebruycken als hun eygen goet, in alder vuegen, manieren, ende op de conditien ende reservatien als de voirs. Huybrecht van Malsen, ende naer hem de voirs. Adriaen van Malsen deselve tot nu toe in pantschap hebben gebruyckt ǁ ende beseten, aen ons gereserveert den clockslach, bede, resort, remissien van over jaerde delicten, legitimatien, octroyen, confiscatien ter saecken van oorloge oft rebellie tegen ons oft de religie, ende sonder dat de voirs. ǁ Adriaen van Malsen oft syne naecommelingen eenige voirder gerechtichheyt sullen mogen pretenderen dan tgene de voirs. brieven van beleeninge hier voren geinsereert syn medebrengende, ende dat mits de somme van vyffduysent ponden ǁ munte voirs. die de voirs. Adriaen van Malsen heeft getelt in handen vande Ontfanger generael van onse voirs. financien, die deselve oyck heeft bestaeyt ende uuytgegeven tot afflossinge van onse heerlicheyt van Assche, by onse stadt ǁ van Bruessele gelegen, welcken Ontfanger generael sal schuldich syn vande voirs. penningen te geven behoirlycke brieven van descharge, rekeninge bewys ende reliqua daer van te doen mette andere penningen van synen bewinde, ǁ ende om dese tegenwoirdige eeuwige vercoopinge te doen effect sorteren, hebben beloeft ende beloven mitz desen in princelycke woorden, voer ons onse erven ende naecommelingen hertogen ende hertoginnen van Brabant ǁ alt’gene des voirs. es te onderhouden ende doen onderhouden sonder daer tegen yet te doen oft te laeten geschieden by wyen dattet waere, directelyck oft indirectelyck in eeniger manieren, Ende tot meerder vasticheyt hebben wy ǁ gerenonceert ende renonceren bij desen allen keyserlycken ende conincklycke rechten, mitz gaders allen anderen die princen souden mogen pretenderen, ende altgene dat men soude willen oft konnen allegeren tot naedeel ende ǁ wedervechtinge van desen onsen tegenwoirdigen brieve oft eenige puncten van dyen, ende sunderlinge den rechte dicterende dat generaele renunciatie van geender weerden en is, ten zy dat de speciale voergae, Alles sonder ǁ arch oft liest, Ontbieden daeromme ende bevelen onsen zeer lieven ende getrouwen die cancelier ende luyden van onsen Rade in Brabant, den voirn. van onse financien, president ende luyden van onse Rekencamer in ǁ Brabant, ende allen anderen onsen rechteren, justicieren, officieren ende ondersaten dien dit aengaen sal mogen, dat zy van dese onse jegenwoirdige vercoopingen cessie, ende transport, op de conditien, reservatien, inder ǁ vuegen ende manieren soe voirs(ceven) is, den voirn. Adriaen van Malsen zyne hoiren, erffgenamen, besitters oft actie van hun hebbende, doen, laeten, ende gedoogen rustelyck, vredelyck, volcommelyck ende eeuwelyck ǁ genyeten ende gebruycken, zonder hun te doen oft laeten geschieden eenich hinder, letsel oft moyenisse ter contrarien, nyet jegenstaende dat bij de ordinancie hiervoir mael gemaeckt op de administratie ende directie van ǁ onse domeynen ende financien onder andere expresselyck verboden is te vercoopen, belasten oft alieneren sulcke ende diergelijcke partyen van onse domeynen, het welcke wy den voirn. Adriaen van Malsen, zyne ǁ hoiren, erffgenamen, besitters, oft actie van hun hebbende egheenssins en willen prejudicieren, oft nadeelich te zyne, maer hebben de zelve om de redenen ende consideratien voirs. daeraff gereleveert ende releveren ǁ by desen ende by dezelve ontlast den voorn. van onse financien ende Rekencamer in Brabant, ende allen anderen onsen recheren, justicieren, officieren ende ondersaten dien dit aengaen oft roeren zal mogen van de eeden by ǁ hun respectievelyck gedaen op de onderhoudenisse ende observatie vande voirs. ordinancie, Blijvende deselve nochtans anderssins in huere volle cracht ende vigeur, Nyet jegenstaende oyck eenige andere ordinancien ǁ restrictien geboden oft verboden ter contrarien, Want ons alsoe belieft, des toirconden hebben wy onsen zegel hieraen doen hangen Gegeven te Mariemont den lesten Octobris int jaer ons Heeren duysent zesshondert ǁ ende twelffve

Op de pliek links:

By de Ertzhertogen den Grave van Steegershooft ǁ Balthazar van Robiano tresorier generael Philips Stercke  ǁ Gecommitteerde van de financien ende andere jegenwoirdich. ǁ [***]

Op de pliek rechts:

Dezen tegenwoordighen brieff van vercoopinghe is gesien geweest inder Camere ǁ van Rekeninghen van de Eertzhertoghen in Brabant in Brabant ende volgende ǁ den inhouden van den zelffven aldaer geentermeerd ende geenregistreert int Registre vande ǁ Chartren ende andere affairen, Beginnende in den jaere zesthienhondert in der ǁ zelver Camere berustende geteeckent metten letteren B.B. folys C LXXI verso et ǁ C LXXII den thiensten january anno XVIc derthiende.

[***]

Op de zegelstaart:

IIII pond II ½ schelling

Dorsale aantekening

De hooffden tresorier generael ende gecommiteerde vande domeynen ende financien vande Eertzhertogen consenteren voor soo vele als in hun is dat den inhoudt in den witte van desen gedaen ende volbrocht sal worden inder vuegen ende manieren als heure ǁ hoocheden tselve willen ende bevelen by der voors. witte, Gedaen tot Bruessele ten burele vande voors. financien onder de handteeckenich vande voors. hooffden tresorier generael ende gecommiteerde, den XXIIIIe decembris sesthienhondert twelffve.

N. de Montmorency

[***]

B. de Robiano

P. Stercke

Origineele transport van de aartshertogen ǁ Albert en Isabella Clara Eugenie ǁ infante van Spanjen, van de heerlijck ǁ heden van Tilburg en Goirle op heer ǁ Huijbregt van Malsen in dato 31 octobris

1612.

gesien ende gecollationeert 17 may 1662 ǁ Transport van Tilbourg ǁ Goirle etcetera  par Larcheducq ǁ Albert duc de Brabant

Numero 8