's-Hertogenbosch

Jan sone Gerart Brocken wonende tot Tilborch, als wittich man ende momboir van Jenneken sijne ǁ huijsvrouwe dochtere Aert Janssen de Bont, heeft wittelick ende erffelijck vercoft ende vercoopt mits desen ǁ Peeteren Janssen Mutsarts tot behoeff van Catharina ommundige dochtere Willem Horevoorts, Eenen jaerlijcken ǁ ende erffelijcken chijns van dertich carolus gulden tot twintich stuivers goets gancbaers gelts elcken gulden ǁ gereeckent, Te betaelen alle jaere erffelijck op onser liever vrouwen Lichtmis dach, ende voorden iersten termijn ǁ van betaelinge op onser liever vrouwen Lichtmis dach anno sesstienhondert vierendertich, Ende binnen der ǁ stadt sHertogenbossche vrij van alle beden, exactien, subventien, tiende, twintichste, honderste, meerdere ǁ ende mindere, penningen, commeren, scattingen ende lasten, gewoonlijck, ongewoonlijck, ingestelt ende ǁ noch naermaels ingestelt te wordene, egeene lasten uutgescheijden te leveren ende te vergelden, van ende ǁ uut huijs, schuer, hoff ende erffenisse dien aenliggende groot tesamen ontrent sess loopensaten lants gestaen ǁ ende gelegen onder de heerlicheijt van Tilborch ter plaetssen genoempt op Berckdijck tussen erve Wouter ǁ Aertssen Crillarts aen deen sijde, ende tussen erve der weduwe Corstiaen Adriaenssen de Post aen  dander sijde ǁ streckende voor vande gemeijn straet tot erve des voors. vercoopers, soo hij seede, vander selver Catarina ǁ ommundige metten erffrecht te hebben ende te besitten, ende heeft de voorn. vercooper den voors. chijns ǁ den voorn. Peeteren Janssen Mutsarts tot behoeff der voors. Catharina ommundige opgedragen met helmelinge ǁ vertijdenisse inne manieren indien gewoonlijck sijnde, Gelovende de voors. vercooper als schuldenaer ǁ principael op verbant van sijnen persoon ende alle sijne goedens present ende toecomende dat hij der voorn. ǁ Catharina ommundige vanden voors. chijns schuldige ende gerechte sall doen warantschappe, ende dat hij ǁ allen andere commer calangie ende aentael inde voorn. onderpanden wesende of comende der voornoempde ǁ Catharina ommundige aff sall doen geheelijcken, uutgenomen seecker gedeelt van eenendertich stuvers ǁ tsiaers aende Cathuijsers tot Colen, ierst jaerlijcx van te voorens ende van rechts wegen daer uut te ǁ vergelden staende, soo hij seede, Ende dat hij oock de voorn. onderpanden voorde betaelinge des voors. chijns ǁ der voorn. Catharina ommundige jaerlijcx daer uut soo voors. staet te vergelden altijt goet genoch ende wel ǁ dueghende sall maecken ende houden, met conditien inne desen toegedaen dat de voorn. vercooper desen voors. ǁ chijns sall mogen lossen ende quijten tot allen tijden teffens ende ten eenenmael met de somme van vijff ǁ hondert carolus gulden tot twintich stuvers goets gancbaers gelts elcken gulden gereeckent, ende metten ǁ loopenden jaerchijns ende achterstellen alsdan daer van tachter ende onbetaelt staende, behoudelijck dat men ǁ denselven loss een halff jaer te voorens wittelijck sall vercondigen ende opseggen, Getuijgen waeren hier over ǁ scepenen inne sHertogenbossche Johan Vloots ende Marten van Hoirenbeeck, Gegeven den dertichsten dach der ǁ maent martij int jaer ons heeren duijsent sesshondert ende drijendertich.

Littera Catharine

Dorsale achterkant:

Peeter Janssoen Mutssarts heeft  betaelt ende ǁ bekent dat Gerart Brocken de jonge voor het ǁ capitael vanden chijns van dertich gulden tsiaers naerder ǁ int wit deser begrepen tsamen metten achterstel ǁ aen sijnen handen heeft geschoten ende betaelt de somme ǁ van sess hondert gulden actum, den XXIX februarij ǁ 1639 ǁ Peter Mutzarts

Jan Gerit Brocken 30 gulden ǁ verschijnt lichtmis

Cateleij Horevorts