's-Hertogenbosch

Seigneur Carel vanden Campe drossaert van t'graefschapppe van Meghen, inden naeme ende van wegen des edele heere ǁ Anthonis, Baenderheere tot Grobendoncx, Wezemale, heere van Heijst, ende Riddere van d'ordere van Sint Jacob, vanden Rade van oirloge van sijne Majestijt, ǁ Coronuel over een regiment Walen, en Gouvernuer der stadt ende Meijerije van Shertogenbossche etc, ende in dijer qualiteijt de selve Carel gemachticht ǁ tot tgeens naervolgende is door crachte van seeckere procuratie brieven onder den naeme, ende opgedruckten cachet deselffs Baenre heere opten achtiensten ǁ dach der lestevoirleden maent van Januario, sesthienhondert acht ende twintich, geexpedieert, ende door crachte der machte den selven vanden Campe daer op vande ǁ voors. heere constituant (soo blijckende was) gegeven ende verleent, heeft wettelick, ende erffelick vercocht, ende vercoopt mits desen Gerlinghen Ruijs tot ǁ behoeff vanden convents van Sinte Clara binnen dese stadt van Shertogenbossche, seven jaerlicken ende erffelicken chijns van hondert gulden, carolus ǁ gulden gemeijnlijck genoempt twintich stuijvers, ofte de weerde daervoor, in anderen goeden gelde, voor elcken der voors. gulden, te rekenen, te betaelen ǁ alle jaer erffelick int hoochtijt van onser liever vrouwen lichtmisse, Ende voor den iersten termijn van betaelinge, int hoochtijt van onser liever ǁ vrouwen lichtmisse, sesthienhondert negenentwintich ierstcomende, ende binnen deser voors. stadt vanden Bossche, vrij van alle beden ons heeren ǁ des Hertoge, exactien, subventien, vijffde, thiende, twintichste, hondertste, ende alle andere meerdere ende mindere penningen, commeren, schattingen, ende ǁ lasten, gewoonlicke, ongewoonlicke, ordinarise, extraordinarise, ingestelt, ende ter avonturen noch naermaels inne te stellene, egeene lasten vuijtgescheijden, ǁ te leveren, ende te vergelden, van ende vuijt des voors. heere constituants heerlijckheijt, ende huijsingen van Tilborch, ende Goorle, erven, hoven, drije ǁ hoeven lants, ende alle ander allodiale chijnsgoederen, die de voors. Baenreheere inde voors. sijne heerlijckheijt van Tilborch ende Goorle is hebbende, ende ǁ sijne voors. Edele midts d'afflijvicheijt van joncker Adriaen van Malsen, heere in sijnen leven tot Tilborch, Goorle etc:, aengecomen, met alle henne ǁ gerechticheden, ende toebehoirten, ende alnoch vuijt de geheele watermolen tot Goorle, mitsgaders drije vierde gedeelten den voorscreven heere ǁ constituant competerende in eene coorenwijntmolen, ende rosmolen, genoempt de Corvelse molens, gestaen tot Tilborch voors., te samen mette gerech ǁ ticheijt vanden wijnt, ende tgemale van dijen, soo men verclaerde, vanden selven conventie metten erffelicken recht te hebben, ende te besitten, Ende heeft ǁ de voorn. gemachtichde desen chijns den voors. Gerlinghen Ruijs tot behoeff desselffs convents opgedraegen, met helmelinge verthijdenisse, inne manieren ǁ insulcx gewoonlick sijnde, Gelovende de voorn. Carel vanden Campe door crachte sijnder gegevene machte op verbant vanden persoon, ende allen de goederen ǁ des voorscreven heere constituants nu hebbende, ende noch naermaels vercrijgende, dat hij den voornoempden convente van desen chijns schuldige ende ǁ gerechte sal doen warantschappe, Ende dat hij allen anderen commer, calaengie, ende aentael, inde voorschreven onderpande wesende, oft comende, den ǁ selven convente sall affdoen geheelicken, vuijt genomen eenen erfflosschijns van twee hondert vijff ende tachtentich gulden, acht stuijvers aen den voirn. ǁ Charles vanden Campe, Item eenen pacht van sess mudden, ende twelff loopen roggen, aende taeffele vanden Heiligen Geest tot Tilborch, noch een ǁ pacht van achthien loopen roggen aenden pastoir, ende altaristen inden prochie kercke aldaer, eenen pacht van acht ende een halff loopen roggen hen ǁ Wouter Wouters. Berten, vuijtte drie vierde gedeelten vande molens, Item eenen ouden grooten, ende twee stuijvers chijns vuijtte geheele molens, Noch ǁ eenen losschijns van hondert vijff ende dertich gulden aenden voorscreven convente van Sinte Clara, binnen deser stadt, Item twee chijnsen, den eenen van ǁ vierhondert twee ende dertich gulden, ende den anderen van hondert acht gulden, beijde aenden kijnderen Govarts Govartss. vanden Grave, respective ǁ jaerlicx van te voorens, ende van rechts wegen vuijt alle de voorgenoempde onderpanden te vergelden staende soo men verclaerde, Ende dat hij ǁ oock de voorschreven gestelde onderpanden voor de betaelinge deses chijns, den voornoempden convente jaerlijcx daervuijt, als voorschreven staet, te vergelden, ǁ altijt goet, sufficient, ende welduegende genoech sall maecken ende houden, Met conditie toegedaen, dat de voorschreven heere constituant, ende sijne ǁ successeuren, ende naecommelingen desen voorschreven chijns van hondert gulden, tot allen tijden sal, off sullen mogen lossen, ende quijten, tsaemen, ende ten ǁ eenemaele metter somme van twee duijsent carolus gulden, tot twintich stuijvers t'stuck in goeden permissie gelden, ten tijde vander afflossinge bij ǁ generael placcaet des hooffs van Brabant gepermitteert, gerekent, ende metten loopenden jaerchijns, ende achterstellen die alsdan daer van tachter, ǁ ende onbetaelt staen sullen, behoudelick nochtans, dat men dusdanigen losch, een halff jaer te voorens wettelick sal moeten te kennen geven, ende opseggen, ǁ Getuijgen waeren hierover schepenen inne Shertogenbossche, Guilliam van Doijenbraecke, ende Peeter van den Berch, Gegeven den vijffsten ǁ dach der maendt van februario, int jaer ons heeren duijsent sesshondert ende achtentwintich. ǁ G Ruys Littera conventus

Dorsale aantekening:

Consestuci van 100 gulden jarelijcx ǁ op de heer van Tilborch etc. ǁ in dato den 5 februari 1628

Den 23 julij 1715 desen ǁ brief gelooft met aen gelegh

seigneur Carel van den Campe

Drossaard van Megen