's-Hertogenbosch

Jan Cornelis Soffarts woonende inden dorpe van Goirle onder de ǁ dinghbancke van Tilborch heeft midts desen wittelijck ende erffelijck vercocht Seigneur Johan vander Vliert ǁ als een der Blockmeesteren vanden armenblock van tHinthamereijnde tot behoeff vanden selven block eenen ǁ jaerlijcke ende erffelijcke chijns van vijff carolus gulden tot twintich stuijver goet ganckbaers gelts elcken gulden ǁ gerekent Te betaelen alle jaer erffelijck opden vierden februarij ende voorden eersten termijn van betalinge ǁ op den vierden dach der maent van februarij anno XVIc eenentsestich Ende binnen dese Stadt vrij van ǁ allen beden exactien subventien vijffde thiende twintichste hondertste meerdere ende mindere ǁ penningen commeren schattinghen ende lasten gewoonelijcke ongewoonelijcke ingestelt oft noch naer ǁ maels ingestelt te worden egeene lasten uuijtgescheijden te leveren ende te vergelden ǁ van ende uuijt eenen acker teulants genoempt Cuijperkens acker groot omtrent twee ǁ loopensaeten gelegen inde voorss.s Parochie van Goirle omtrent de kerck aldaer ǁ neffens erve Hendrick Jan Damen aen deen zijde ende Jacob Jans Wagemaeckers met meer ǁ andere aen dander zijde streckende metten eenen eijnde van erve des voorss.s Hendrick ǁ Jan Damen tot op eenen gemeijnen ackerwech metten anderen eijnde Ende alnoch van ende ǁ uuijt huijs ende hoff gelegen ter plaetse voorss.s tegens over de kerck aldaer neffens ǁ erve Hendrick Janssen van Dijck aen deen zijde ende neffens de Kerckstraet aen dander zijde ǁ streckende vande gemeijne straet achterwaerts tot op erve Delis Claessen vanden ǁ selven Block metten erffrecht te hebben ende te besitten Ende heeft die voorss.s vercooper ǁ den voorss.s chijns den voorn. vander Vliert tot behoeff als boven opgedraeghen met helmelinge ǁ verthijdenisse inne manieren inne dien gewoonelijck zijnde Gelovende die voors. ǁ vercooper als schuldenaer principael op verbant van zijnen persoon ende allen zijne goederen present ende ǁ toecomende dat hij aen voorn. Block vanden voorss.s chijns schuldighe ende gerechte sal doen warantschappe ende ǁ dat hij allen anderen commer calangie ende aentael inde voorss.s onderpanden wesende oft comende den voorn. block aff sal ǁ doen geheel Ende dat hij oijck de voorn. onderpanden voor de betaelinghe des voorss.s chijns die coopere jaerlijcke ǁ daer uuijt als voor te vergelden altijt goet genoch ende weldeugende sal gerecken ende houden Met conditien inne desen ǁ toegedaen dat die voors. vercooper den voors. chijns tot allen tijden sal mogen lossen ende quijten nteffens ǁ ende teenemael met de somme van hondert carolus gulden tot twintich stuijvers goets permissie gelts elcke ǁ gulden gerekent Ende metten loopenden jaerchijns ende achtterstellen daer aff alsdan tachter ende onbetaelt ǁ staende Behoudelijck dat men schuldich ende verbonden sal sijn den voorn. los een halff jaer te voorens ǁ wittelijck te vercondigen ende op te seggen Getuijgen waeren hier over Schepenen inne sHertogenbossche ǁ Gijsbert Kuijsten ende Laureijn van Berckel Gegeven den vierden dach der maent februarij ǁ int jaer ons heeren duijsent ses hondert tsestich

Linkermarge:

Debetsegel ǁ vermidts de ǁ gecasseerden ǁ tot de distributie ǁ van dien tegen ǁ woordich sijn ǁ diversich van ǁ [***] hiertoe ǁ [***]

Dorsale aantekening:

1686

Desen Brief den 25 merst, gelooft met den intrest van dien ǁ door Adriaen Jan Soffaerts, aen Abraham van der Schelstrate hondert vijf gulden ǁ XII 1/2 stuijver betaelt Bloockmeester [***] doen opt Hintemereijnt ten Bos desen 25 mert 1686 ǁ 100 gulden ende 5-12-8 van verlop van intrest