's-Hertogenbosch

Jan sone wylen Adriaens Jans Peeterszoon. woonende tot Tilborch, heeft wittelyck ǁ ende erffelyck vercoft ende vercoopt midts desen heeren Gerarden vanden Hovel priester, ende Beneficiaet van Sint ǁ Johans Evangelisten Cathedrale kercke binnen deser Stadt, ende heeren ende meesteren Johan van Broegel Licentiaet der Rechten ǁ tegenwoirdelyck Scepen derzelver Stadt, als momboiren ende tuteuren over jouffrouwe Maria vanden Water dochter van ǁ zaliger joncker Johan vanden Water, verweckt by oock zaliger jouffrouw Maria Thielmans, zyne wittige huyssvrouwe,  tot ǁ behoeff vande zelve jouffrouwe Maria, Eenen jaerlycken ende erffelycken chijns van Elff carolus gulden, den ǁ gulden tot twintich stuyvers goets gelts gerekent, Te betaelen alle jaer erffelyck int hoochtyt van Sint Marten des ǁ Biscops inden wynter, Ende voorden iersten termyn van betaelinge int hoochtyt van Sint Marten des ǁ Biscops inden wynter Anno sesthienhondert ende vijffentwintich, Ende in Shertogenbossche vry van alle ǁ beden ons heeren des hertochs, exactien, subventien, soo thienste, twintichste, honderste, als alle andere meerdere ǁ ende mindere penningen, commeren, scattingen ende lasten, ordinarisse, extraordinarisse, ingestelt, oft bij avonturen ǁ naemaels ingestelt te worddene, egeene lasten uutgesceyden, te leveren, ende te vergelden, Van ende uut eene ǁ huijsinge, brouwerye, henne gronden, metten brouwgetouwe daertoe behoirende, ackerlant ende weylant dyen ǁ aenliggende, groot tezamen ontrent elff lopensaten, gelegen onder de parochie ende heerlycheyt van Tilborch ǁ ter plaetse genoempt aende Horevort, tussen erve Adriaens soone Jans Peters Stevenss. aende oostzyde ǁ ende tussen erve Daniels Adriaens Danielss. aende westzyde, streckende noortwarts aende gemeynne strate, ǁ ende zuytwarts aen erve des voors. Adriaens Janss., zoo hy verclaerden, Vande voors. jouffrouw Maria ǁ vanden Water, metten erffelycken recht, te hebbene ende te besittene, Ende heeft die voorn. vercooper denselven ǁ chijns, den voors. momboiren tot behoeff derzelver jouffrouw Maria opgedragen, ende heeft helmelinge daerop ǁ vertegen in manieren in dyen gewoonlyck zynde, Gelovende die voorn. Vercooper, als sculdenaer principaell, ǁ op verbant van synen persoon, ende allen zyne goederen present ende toecomende, dat hy der voorn. jouffrouwe ǁ Maria, vanden voors. chyns sculdige ende gerechte zal doen warantscappe, ende dat hy allen anderen commer, calangie, ǁ ende aentael int voors. onderpant, wesende oft comende, den voorn. jouffrouw Maria zal affdoen geheelycken, Ende ǁ dat hij tvoors. onderpant voorde betaelinge des voors. chyns, der voorn. jouffrouw Maria jaerlicx daeruut als voor te ǁ vergelden, altijt goetgenoch, ende welduegende zal maecken ende houden, Met conditie toegedaen, dat de voorn. ǁ Vercooper desen voors. chijns tot allen tyden sal mogen lossen ende quijten ten eenenmale mette somme van ǁ tweehondert carolus gulden, tot twintich stuyvers in permissie gelde by openbaren placcate vanden Raede van ǁ Brabant gepermitteert zynde, elcken gulden gerekent, Ende dat in egeene mindere specien dan schillingen, ǁ ende metten loopenden jaerchyns ende afterstellen alsdan daeraff onbetaelt staende, Behoudelyck dat diezelve ǁ Vercooper desen loss, een halff jaer te voorens wittelyck zal vercondigen ende opseggen, Getuygen waeren hierover ǁ Scepenen in Shertogenbossche Johan vanden Leemputte ende Willem Dorenbraecken Gegeven den sevensten dach ǁ der maent Novembris int jaer ons Heeren duysent Sesshondert ende Vierentwintich

A. van Hees subscripsit

Littera impuberes

Dorsale aantekening:

Tilborch ǁ op Martini - XI gulden ǁ Jan Adriaens Happen

Numero  18

Numero 611

1624

10 stuivers betaelt op 4 julij 1649